Ғылыми зерттеулердің берері мол

Кеше Президент жанындағы Мемлекеттік басқару академиясында «Этносаралық қатынастар және этносаясат саласында жүргізілген ғылыми зерттеулер нәтижелері бо­йынша ұсынымдар әзірлеу технологиясы» тақырыбында әдістемелік семинар-тренинг өз жұмысын бастады. Онда аталған зерттеу жұмыстарын әдіс­намалық, ғылыми-әдістемелік және кадрлық жағы­нан қамтамасыз етуді жетілдіру мәселелері сөз болды. Жиынды ашқан Мемлекеттік басқару академиясының ректоры Болатбек Әбдірәсілов осымен төртінші рет ұйымдастырылып отырған семинардың маңыздылығын атап өтті. Оның айтуынша, ғылыми зерттеулердің міндеттері мен тәжірибелік нәтижелері талқыланатын мұндай басқосудың берері мол. Сондай-ақ, ол іс-шараның өтуіне Қазақстан халқы Ассамблеясы мен Білім және ғылым министрлігінің Ғылым комитеті тікелей мұрындық болғанын жеткізді. Өз кезегінде Қазақстан халқы Ассамблеясы Төрағасының орын­басары Ералы Тоғжанов «Қоғамдық келісім және жал­пы­ұлттық бірлік саласындағы мем­­­лекеттік саясатты ғылыми-сараптамалық сүйемелдеу: мін­деттердің қойылуы және жа­ңа шешімдер» тақырыбында баян­дама жасап, ұлтаралық сая­сат және этносаралық қатынас мәселесінде ғылыми зерттеулердің бағыт-бағдары қандай болуы керектігіне тоқталды. Бұл жөнінде ол: «Қазірдің өзінде ұлтаралық саясатқа қатысты кейбір мәсе­лелердің бар екені белгілі. Ондай жағдайларды ғылыми тұрғыда зерттеп, оңтайлы деген нәтижені тәжірибеге енгізуіміз керек. Осы­лайша кез келген түйткілді оң бағытта шешуге болады. Жалпы, ұлтаралық келісім мәселесінде өмірдің шындығын, нақты саясатты ескеру керек. Сондықтан, осы тақырыпта жазылған ғылыми жұмыста елді біріктіруші фак­тордың болуы тиіс», – деді. Сонымен қатар, Е.Тоғжанов «Мәңгілік Ел» жалпыұлттық пат­­­риоттық идеясының құнды­лықтарын тілге тиек етті. «Елдің бірлігі мен біртұтастығын нығай­татын ұстын ретінде «Мәңгілік Ел» идеясының маңызы зор. Себебі, тәуелсіздіктің тұғыры да, негізі де, бағыт-бағдары да осы идеямен тікелей байланысты. Сондықтан, Елбасының осыған қатысты берген нақты тапсырмаларын жүзеге асырып, оны халыққа түсіндіру жолында күш жұмсауымыз керек», – деген ҚХА Төрағасының орынбасары Жаңа Қазақстандық Пат­риотизмді қалыптастыруда бұл жұмыстардың рөлі ерекше екенін атап өтті. Одан бөлек, семинарға қаты­сушы ғалымдар дәрістер мен тренингтер өткізу арқылы Елбасының 2012 жылғы 14 желтоқсандағы «Қазақстан-2050» Стратегиясы – қалыптасқан мемлекеттің жаңа саяси бағыты» атты Жолдауы мен «100 нақты қадам» Ұлт Жос­пары аясында еліміздің мем­лекеттік этносаясатының жаңа міндеттерін түсіндіру, аталған саладағы зерттеу жұмыстарының басым бағыттарын айқындау, олардың қазіргі жай-күйіне талдау жасау мәселелері бойынша өз тәжірибелерімен бөлісті. Сондай-ақ, шара шеңберінде ғылыми зерттеу әдіснамасы, тәжірибелік ұсынымдарды әзірлеу, алынған теориялық білімді қолданысқа енгізу, полиэтностық қоғамдағы бі­ре­­гейлік мәселелерін зерттеу, осы саладағы жаңа технологияларды меңгеру мәселелері қарастырылды. Айта кетейік, семинар-тре­­нинг бүгін аяқталады. Бағ­дар­лама бойынша екінші күні зерт­теуші ғалымдар «Этностық жә­не діни бірегейлікті зерттеу фак­торларының ерекшеліктері» та­қырыбында онлайн-дәріске қатысады. Сондай-ақ, бүгін «Эт­носаралық қатынас саласын­дағы зерттеу жобалары: тәжірибе және аралық нәтижелер» атты дөңгелек үстел өткізілмек. Еламан ҚОҢЫР, «Егемен Қазақстан»