Басқарма басшысы

бас дәрігерлерден пара алған ба? Соңғы жылдары Жамбыл об­лыстық денсаулық сақтау басқар­масының басынан дау кетпей қойды. Мәселен, осыдан бірнеше жыл бұрын денсаулық сақтау басқар­масына басшы болған Қ.Құралбаев деген азаматқа дәрі-дәрмек тендер­лерін дұрыс өткізбеді деген айып тағылып, істі болып, қызметінен босатылды. Одан кейін басшы болған Б.Жетібаев қызметтік каби­нетінде 3 миллион теңге пара алып жатқан жерінен ұсталып, сегіз жылды арқалап шыға келді. Жетібаевтан кейін облыстың денсаулық сақтау саласының тізгінін ұстаған В.Овсянников бірнеше жыл жап-жақсы қызмет етіп, Шығыс Қа­зақстан облысына тура сондай қызметке ауысып кеткен-ді. Жақында ғана ақпарат құралдары В.Овсянниковтың да сол қызметінде парамен ұстал­ғанын жарыса жазды. Енді міне, апта басында бірнеше сайттарда Жамбыл облыстық денсаулық сақтау басқармасының басшысы Е.Масалимовтың жә­не оның екі орынбасарының, сон­дай-ақ, мемлекеттік сатып алу, экономика және бюджет­тік жоспарлау бөлімдері жетек­шілерінің пара алды деген күді­кпен ұсталғандары туралы ақ­параттар жарияланды. Олар қызметтік өкілеттіктерін теріс пайдалана отырып дәрі-дәрмек және меди­циналық жабдықтардың тендер­лерін өткізуде заңсыз әрекеттерге барған көрінеді. – Үстіміздегі жылдың 25 ақ­па­нында Жамбыл облыстық ден­саулық сақтау басқармасының бас­шыларына қатысты қыл­мыстық іс арнайы тіркеуге алынып, жасырын түрде тергеу әрекеттері жүргізілді, – дейді бұл жөнінде Сыбайлас жемқорлыққа қарсы іс-қимыл ұлттық бюро­сының Жам­был облысы бойынша депар­таменті басшысының орынбасары Рауан Рамазанов. – 19 сәуір күні басқарма басшысы ұсталып, тергеу әрекеттері әрі қарай жал­ғасуда. Қазір Е.Ма­салимов уақытша қа­мауға алынды. Масалимов және оның екі орынбасары және бөлім меңгерушілері жүйелі түрде бас дәрігерлерден 300 бен 10 000 дол­лар көлемінде пара алып отырған. Әзірге бұл жөнінде 7 факті анықталды. Оның ішінде қы­зметке тағайындау және жеке стоматологиялық клиникалардың мемлекеттен бөлінетін субси­дияларға қол жеткізумен тендерлерде жеңімпаз атану үшін берілген паралар бар. Алдағы уақытта басқарма басшысының екі орынбасарының және бөлім меңгерушілерінің, сондай-ақ пара берген тұлғалардың бас шарасы анықталатын болады. Әрине, тергеу бітпей жатып біреуді кінәлаудан аулақпыз, істің ақ-қарасын тиісті органдар тексере жатар. Әйтсе де Жамбыл облыстық денсаулық сақтау депар­таментіндегі бұл жағдай әлі біраз «жыр» болатыны анық. Оралхан ДӘУІТ, «Егемен Қазақстан» Жамбыл облысы