Қарғалы өзені тағы да тасыды

Өткен жылғы маусымда лай араласқан селден соң Алматы тұрғындары арнасы шағын, елеусіз сылдырап ағатын Қарғалы өзеніне назары ауған еді. Неше күн толассыз жауған ақ жауын сол Қарғалының атын тағы да шығарды. Таудан аққан жауын суы бұл жолы былтыр қатты зардап шеккен Наурызбай ауданынан сарқырай ағып өтіп, етектегі Алатау ауданының бірқатар көшелерін суға толтырды. Барлығы 15 үйдің ішіне су кіріп, тұрғындарды әбігерге салды. Су басқан аумақтың зардабын жоюға Алматы қаласының төтенше жағдайлар департаменті жедел кірісті. Бірінші күннен бас­тап өрт сөндіру және апаттық-құтқару жұмыстары қызметінен – 40 адам, азаматтық қорғаныстың сумен қамту қызметінен – 46 адам, азаматтық қорғаныстың инженерлік қызметінен – 26 адам, жылумен қамту қызметінің 50 өкілі, жолдар мен көпірлер қызметінен – 120 адам, 20 техника, Алматы әкімдігі жанындағы құтқару қызметінен (109) барлығы – 30 адам, 8 техника, Құрлық әскерлерінің әскери институтынан 161 адам, 5 техника іске жаппай жұмылдырылды. Зардап шеккен аумақта бұдан тыс барлығы 342 адам мен 13 техника бірлігі жұмыс істеді. Қазір жағдай тұрақталған секілді. Көшелер балшық пен қоқыстан тазартылды. Тек бір ғана Қарғалы өзенінің жағасына барлығы 45 тонна құм аралас топырақ төгіліп, құм салынған 2000-дай қапшықтар қойылды. Кіші Алматы, Есентай, Үлкен Алматы өзендері де анда-санда арнасынан асып ағып қояды. Жаңбыр Алматыда, әсіресе, түні бойы жауады. Синоптиктер Алматы қаласы мен Алматы облысында ақ жауын әлі бірнеше күн үздік-создық сір­кіреп жауады деген мәлімет беріп отыр. Төтенше жағдайлар депар­та­менті мобильді телефондар желі­сі арқылы таулы аймақтарда сел қау­пі барын қайта-қайта ескертуде. Талғат СҮЙІНБАЙ, «Егемен Қазақстан» АЛМАТЫ