Ардагерлерін ардақтады

Күллі еліміз Ұлы Жеңіс мерекесін тойлап жат­қан шуақты күндері ел газеті – «Егемен Қазақ­станның» редакциясы да әдеттегідей Алматы қаласында тұратын өз ардагерлерін марапаттау­ды ұмытпады. Ұлы Отан соғысының ар­дагері, белгілі журналист, жазушы Бисұлтан Аман­ғалиев – соғысқа Сталин­град майданынан кіріп, Ұлы Же­ңісті Берлинде тойлаған нағыз қазақ батыры. Журна­листік жолын соғысқа дейін Жамбыл облыстық га­зе­тінде корректорлықтан бастаған Бисұлтан аға 1946 жылдан бері қарай «Егемен Қазақстанда» («Социалистік Қазақстан») ұзақ жылдар табан аудармай еңбек етті. Қаруын қаламға алмастырған ардагер журналистік жастық шағын сағынғаны болар, 1969 жылғы Мәскеудің Кремль­дер сарайында өткен Бүкіл­одақтық колхозшылар съезін ерекше тамсанып, былайша еске алды. – Біз, мынау Хамит Бір­жанов ініміз екеуміз сол кез­дегі Кеңес Одағының басшы­сы Брежневтің колхозшылар съезінде орыс тілінде жасаған баяндамасына ілес­пе аудар­ма жасап, бірден Ал­матыға – ҚазТАГ пен «Социа­листік Қазақстанға» жедел­детіп жіберіп тұрдық. Ол заманда казіргідей техника дамымаған, бірақ, соған қа­ра­мастан, газет күнделікті дәп қазіргідей  кешікпей шыға­тын. Кремльде отырған біздер, таңды таңға ұрып елде­гі газет үшін, оқырмандар үшін қызмет еттік. Отан үшін қан төгіп жа­нын аямаған әріптес аға­сы­ның сө­зін ерекше ілтипатпен тыңдап, қол­даған тыл ардагері бүгінде Бостандық аудандық ардагерлер кеңесінің төрағасы қызметін атқаратын Хамит Біржанов ілеспе аудармадан қолы босаған сәтте газет тілшісі ретінде колхозшылар съезінен «Социалистік Қазақстанға» арнайы репор­таждар жазғанын да ұмыт­папты... «Егемен Қазақстанның» Ас­та­надағы бас кеңсесінен арнайы жіберілген ақшалай сыйлықтар мен гүл шоқ­тарын қолына алған газет ардагерлері редакцияға алғысын айтты, газеттің барша ұжы­мына зор шығармашылық табыс тіледі. Талғат СҮЙІНБАЙ, «Егемен Қазақстан» АЛМАТЫ СУРЕТТЕ: «Егемен Қа­зақ­стан» газетінің Алма­ты­дағы ар­дагер-қаламгерлері – Хамит БІРЖАНОВ пен Би­сұлтан АМАН­ҒАЛИЕВ  Суретті түсірген автор