Қуаңшылық салдарынан жабайы жануарлар сатылымға шығарылады

АСТАНА. 13 мамыр. Зимбабве Республикасының билігі қуаңшылық салдарынан қорықтағы жабайы жануарларды жаппай сату туралы шешім қабылдады. Бұл туралы 24.kz-ке сілтеме жасаған egemen.kz тілшісі хабарлады. Жан-жануарларын асырауға су таппаған қорық қызметкерлері жекенің қолына беруге мәжбүр болып отыр. Шөлдің салдарынан аң-құстардың басым бөлігі зардап шегуде. Мәліметтер бойынша, тіпті қырылып қалудың алдында тұр. Сонымен қатар, арнайы қоршалған аймақта мекендейтін жануарлар саны да шамадан тыс көбейіп кеткен. «Жабайы тіршілік иелерін өзімізде сақтап қалсақ, оларға зиянымызды тигізіп аламыз. Биылғы қуаңшылық қиындау болып тұр. Жануарларды қоректендіретін су мен жем-шөп қоры жоқтың қасы. Қорықтың кей бөліктерінде су тартылып қалды. Ал мұндағылар сусыз ұзаққа шыдамайды», ­­–­ дейді қорық қызметкері Эманнуэль Фундира. Зибабве қорықтарын ауа райындағы Эль-Ниньо құбылысы салдарынан құрғақшылық жайлаған. Су тапшылығынан ауыл шаруашылығындағы егістік қурап, мемлекет қазынасына айтарлықтай шығын келтірген. Аян Әбдуәли. Дерек, фото: 24.kz.