Ливиядағы жағдай ушыға түсті. Әскерилердің біраз бөлігі оппозиция жағына ауысты. Бүгінде елдің шығысы билікке наразылардың қолына көшіп үлгерді. Египет Ливиямен шекарасын күшейту жөнінде шешім қабылдады.
Жаңа Зеландияның Крайстчерч қаласында қуаты 6,3 балдық жер сілкінісі болды. Зілзала салдарынан кем дегенде 65 адам қаза тапқан. Опат болғандар саны әлі де артатыны байқалады.
Иранның екі әскери-теңіз күштерінің кемелері Суэц каналына енді. Иран өз кемелерін аталған каналға 1979 жылдан бері алғаш рет түсіріп отыр. Израиль тарабы ирандықтар жағынан қандай да бір арандату әрекеттері байқалған жағдайда кемелерді жойып жібереміз деп мәлімдеді.
Қырғыздың оппозициялық депутаты Өмірбек Текебаев Африка елдері мен Таяу Шығыстағы соңғы оқиғалар Қырғызстанда жүзеге асқан төңкерістің нәтижесі деп жариялап жіберді.
Ресей президенті Дмитрий Медведев кеше Солтүстік Осетияның астанасы – Владикавказ қаласына ұшып келіп, Ұлттық антитеррорлық комитеттің шұғыл мәжілісін шақырды. Ол соңғы күндері туристерге қатысты бірнеше шулы қылмыстар жасалған Кабардин-Балқар оқиғаларына арналды.
АҚШ БҰҰ Қауіпсіздік Кеңесінің Иордан өзенінің Батыс жағалауында еврей қоныстарын салу үдерістері жалғасуын жазғырған қарар жобасына вето қойды. Бұл АҚШ-тың Б.Обама билікке келгелі вето құқығын алғаш пайдалануы болып табылады және Құрама Штаттардың аталған мәселеге қатысты ұстанымын білдіреді.
ҰҚШҰ Бас хатшысы Николай Бордюжа Қырғызстанның бұрынғы президенті Құрманбек Бакиев билік құрып тұрған кезде елдің күш құрылымдары есірткі тасымалын бақылауында ұстаған деп мәлімдеді. Бас хатшының айтуынша, қазіргі биліктегі күш құрылымдарының да есірткі тасымалына қатысы бар көрінеді. Сондықтан, дейді ол, қырғыз басшылығына есірткі бизнесіне қарсы күресте көмек керек.
Америка Құрама Штаттарының Ресей Федерациясындағы елшісі Джон Байерли РФ сыртқы істер министрлігіне шақырылды. Бұл шақыруға АҚШ мемлекеттік департаментінің Курил аралдарына байланысты аумақтық келіспеушілікке орай Құрама Штаттардың Жапонияны қолдаған сыңай танытуы себеп болды.
Германияның көлемі жөнінен екінші қаласы – Гамбургте өткен сайлауда канцлер Ангела Меркельдің Христиандық-демократиялық одағы (ХДО) жеңіліске ұшырады. Оппозициядағы Социал-демократиялық партия (СДП) айқын басымдықпен жеңіске жетті. Биыл сайлау тағы алты федералдық жерлерде өтеді. Меркель партиясына айтарлықтай қауіп бар.
Украинаның бас прокуратурасы елдің бұрынғы премьер-министрі Юлия Тимошенкоға қатысты тергеу жұмыстарын аяқтап, іс сотқа жіберілді. Бұрынғы премьерге қызмет өкілеттігін асыра пайдаланды, билігін және қызмет жағдайын өктемдікпен жүргізді деген айып тағылған. Сондай-ақ, ол бюджет заңдылығын бұзды деп те айыпталған болатын.
Әскери борышын грузин контингенті құрамында Ауғанстанда өтеп жүрген капрал Георгий Авалиани қаза тапты. Мина жарылуы салдарынан тағы екі грузин әскери қызметшісі жарақат алған.
Интернет материалдары негізінде әзірленді.