Қаланы дүрліктірген қанды оқиға

Орал қаласына таяу маңдағы ор­ман алқабынан аналы-балалы Ре­­сей азаматтарының қатыгез­дік­пен өлтірілген мүрделері табыл­ды. Орал қаласының 55 жастағы Л. деген тұрғыны Рязань қа­ласынан келген туысқан­да­ры­ның іс-түссіз жоғалып кеткендігі жөнінде қалалық ішкі істер бас­қармасына қарасты Абай полиция бөліміне шағымданған. Оқиға былай болыпты. Ана­лы-балалы рязаньдықтар Орал қаласына мұраға қалдырылған пәтерді сату үшін келген екен. Осынау қайғылы оқиға болатын күні олар алдын-ала телефон арқылы сөйлесіп жүрген сатып алушылармен кездесуге асы­ғып­ты. Бірақ, олар таңертеңгілік үйден шығып кеткеннен қайтып оралмаған. Күте-күте төзімі тау­сылған туысы бір жамандықтың болғанын іші сезгендей, ертесіне полицияға хабарласқан. Келесі күні полиция қызмет­керлері аталған факті бойынша ҚР ҚК 96-бабы 2-бөлімі «а» тар­мағы бойынша қылмыстық іс қозғап, жедел іздестіру шара­лары қолға алынған. Жүргізілген іздестіру шаралары барысында қыл­мыс жасады деген күдікпен Орал қаласының төрт тұрғыны қолға түсті. Аталған күдік­ті­лер­дің Ресей азаматтарын пәтерді иелену үшін өлтіргені белгілі бол­ды. Олар пәтер сатыла­тын­дығы жөнінде жарнаманы жергілікті газеттен көріп, сатып алу­шылар кейпінде пәтер иесіне хабарласқан. Яғни, өздерінің жы­мысқы әрекетін бүге-шігесіне дейін жоспарлаған тә­різ­ді. Уағ­даласқан уақытында пәтер иелерімен кездескен бойда қару­мен қорқытып, қаладағы нота­риус­­тардың біріне алып келген. Кө­ліктің ішінде анасын тапаншамен қорқытып, кепілдікке алған. Ал мұрагерлікке қалдырылған пә­тер иесі болып табылатын бала­сын нотариуске кіргізіп, сатып алу-сату туралы келісім-шартқа қол қойдырған. Одан әрі жәбір­ле­нушілерді темір жол маңайын­дағы адам көп жүрмей­тін жерге апарып, қылғындырып  өлтірген. Адам қанын мойнына жүктеуден тайынбаған төртеу мүрделерді қалаға жақын орна­ласқан Щапов ауылының ма­ңын­дағы орман ал­қа­бына  апа­рып, қалың қарға жа­сыр­ған. Жедел іс-шаралар бары­сында тәр­тіп сақшылары күдік­тілерді алаяқтық жолмен қол жеткізген пәтер орналасқан тұрғын үйдің қасынан қолға түсірді. Ұй­ым­дасқан топтың барлық мү­ше­сі де Орал қаласындағы кафе­лер­дің бірінде жұмыс жасайтын жас жігіттер болып шықты. Ол­ар­дың үлкені – 1985 жылы, ең жасы 1992 жылы туған. Қазір қылмыстық іс бойын­ша соттық сараптама тағайын­дал­ды. Тергеу амалдары жүргізілуде. Фатихолла МАШТАҚОВ, полиция полковнигі. Батыс Қазақстан облысы.