Кеше Астанадағы «Риксос» қонақүйінде еліміздің тәуелсіздігіне 20 жыл толуы аясында Кеден одағы және ЕурАзЭҚ-тың Бірыңғай экономикалық кеңістігін қалыптастыру мәселелері жөнінде халықаралық конференциясы болып өтті.
Кеден одағы және ЕурАзЭҚ-тың бірыңғай экономикалық кеңістігін құру мәселелеріне арналған конференция қатысушыларына Мемлекеттік хатшы – Сыртқы істер министрі Қанат Саудабаевтың арнайы құттықтауын Сыртқы істер вице-министрі Қайрат Сарыбай оқып берді. Ол өз құттықтауында Кеден одағының құқықтық-келісімшарттық негізін құрайтын іс-шаралар толығымен жүзеге асырылып, оның институттық құрылымы жасақталып, табысты жұмыс істеп жатқандығын атап өткен. Кеден одағының тиімді қызметі мен Біртұтас экономикалық кеңістікті құру елдеріміз арасындағы достық пен тату көршіліктің дәлелі болып отыр, деген өз құттықтауында Қ.Саудабаев.
«Кеден одағы: алғашқы жыл қорытындысы: БЭК жолында» тақырыбында сөз қозғаған Экономикалық даму және сауда вице-министрі Тимур Сүлейменов Кеден одағының құқықтық-келісімшарттық базасының 70-тен астам құжатты құрап отырғандығын айтты. Сондай-ақ, вице-министр Кеден одағы аясында бірыңғай кедендік әкімшілік жүйесі жұмыс істей бастағандығын жеткізді. Салық саласында жанама салық бойынша да құқықтық-нормативтік актілер жасақталған. Сонымен қатар, бизнес саласында жеңілдіктерге қол жеткізіліп, біздің кәсіпорындар мен шаруашылықтар пайдасына шешілуде, деді ол. Сондай-ақ, конференция барысында Кеден одағы аясында бірыңғай интеграцияланған ақпараттық жүйе құрылатындығы айтылып, талқыланды.
Венера ТҮГЕЛБАЙ.