(«ЕҚ», «Дендробақ демеу күтеді». 28 маусым, 2016 жыл)
Бүгінгі әлемде орман алабының материалдық маңызы (ең алдымен ағаш дайындау) екінші кезекке ысырылып, ондағы экожүйенің экологиялық құндылықтарына айрықша көңіл бөлінуде. Әсіресе, орман құрылымының климатты реттегіш, санитарлық-гигиеналық, су және топырақ құнарын сақтау мен қорғаудағы қарымына жақсы баға берілуде.
Тәуелсіз Қазақстанның Тұңғыш Президенті Н.Ә.Назарбаев Ақмола облысына 2007 жылғы 3 маусымдағы жұмыс сапары барысында біздің орман шаруашылығы ғылыми-зерттеу институтына арнайы атбасын бұрды. Бұл еліміз үшін қарбалас кезең еді. Міндет – Астананың «жасыл белдеуін» қалыптастыру. Осыдан болса керек, Нұрсұлтан Әбішұлы бірден қала іргесіндегі дендробаққа аялдаған. Елбасы негізгі орамдарды аралап көріп, «Сіздерге бұдан да биік міндеттер жүктеледі» дегенде, жоғарыда айтылғанындай, әлемдік ауқымдағы қадам жасау қажеттігін меңзегені белгілі. Жалғыз ауыз сөздің астарында жас өскіннің түрі мен тегін, будандық аудандастырылуын, сұраныстағы тұқым дайындауды, оған қатысты ғылыми негіздемелер мен ұсыныстарды басшылыққа алу қажеттігі жатқаны айқын. Ал жауапты тапсырманың тиянақталатын жері нақ осы дендробақ.
Ғылыми-зерттеу институты Елбасы тапсырмасын ойдағыдай орындап отыр деп айта аламыз. «Жасыл белдеудің» аумағы қазіргі күні 100 мың гектарға жуықтады. Онда Бурабай ғалымдарының жаңа патенттерімен өсірілген бағалы ағаштар, саялы өскіндер жайқалып өсіп тұр. Бұл бағыттағы ізденіс әлі де жалғаса беретіні анық. Тек әлеуеті мол ғылыми ордаға тиісті қамқорлық керек.
Дәл осы тұста, еліміздің бас газеті «Егемен Қазақстан» әлеует пен қамқорлыққа қатысты «Дендробақ демеу күтеді» (28 маусым 2016 жыл) деген тақырыппен меншікті тілші Б.Амалбектің мақаласын жариялауы үлкен қоғамдық пікір тудырғанын айтқым келеді. Автордың мынадай деректер келтіруі уақыт әуезіндегі қозғалыс сағаты туғанын алға тартады: «Аумағы 44,3 гектарды алып жатқан дендробақ 1960 жылы құрылды. Мұнда өсімдіктің 2 мыңнан астам түрі зерттелген. Бүгінде соның 30 ұялас тармағы мен 95 текті құрайтын 800 түрі сақталып қалды. Жағрапиялық тегін тарқатсақ, дендробақтағы өскіндердің 25,6 пайызы еуропалық, 22,5-і сібірлік, 21,1-і солтүстікамерикалық, 14,4-і қиыршығыстық, 9,2-сі жапон-қытай аумақтық, 7,2 пайызы орталық азиялық түп тамырға жатады. Олар ағаштар, бұталар, саялы өскіндер және жартылай бұтақ тарамдары болып үш дәлізді төрт топқа бөлінеді.
Дендробақпен қолтықтас орналасқан арборетум мен популетумның табиғи құндылықтарымызды еселеудегі орны да өлшеусіз. Мұнда жолы түскен кісі өсімдіктер әлемінің қиял-ғажайып құшағына еніп кеткендей сезінері сөзсіз. Табиғаттың қаталдығына қарамастан, осынау 11 гектарлық алқапта аса құнды өсімдіктер жайқалып тұрады. Қазіргі сақталғанының өзі 350 түрді қамтиды екен. Сан-алуан мақсатта пайдаланылатын ағаштарды айтпағанда, дәрілік шөптер, сан-алуан гүлдер, саялы бұтақтар, жеміс-жидектердің қалыңдығы қайран қалдырады. Бүгінде Бурабай дендробағына қатысты 150-ден астам ғылыми еңбек жазылып, ұжымдық жинақтарды қоспағанда, 70-ке тарта кітап жарық көрді. Сондай-ақ, оннан астам кандидаттық және докторлық диссертацияның қорғалуы дендробақ жүйесінің маңыздылығын дәлелдей түсетіндей».
Одан әрі мақалада: «Бурабай бүгін үлкен өзгерістер құшағында. Оған қуанғанымызбен де, көзқарастың біржақтылығы қынжылтады. Бәрінен де барымызды сақтауға дәнекер болып отырған ғылыми дендробақтың бағы тайғанын айтсаңызшы. Соңғы он жылда маңызды нысанның қаржыландырылуы жұтаңдап барады. Орман шаруашылығы ғылыми-өндірістік орталығы жоқтан бар жасап отыр», деген талдамалық түйін жасалады.
Аталған мақаланың сенатор Жабал Ерғалиевтің Қазақстан Республикасының Премьер-Министрі Бақытжан Сағынтаевтың атына депутаттық сауал жолдауына негіз болғанына қуаныштымыз. Онда былай делінген: «...Міне, соңғы 20 жылдан бері коллекциялық өскіндерді өсіруге, оларды күтіп, баптап ұстауға қаржы бөлінбей келеді. Бурабайдың тұмса табиғатының ажырамас құрамдас бір бөлігі болып қалыптасып отырған Қазақ орман ғылыми-зерттеу институты мен агроорманмелиорация шаруашылығының дендропаркі мен арборетумын талапқа сай күтіп, ұстап тұруға жыл сайын қажетті 22 миллион 523 мың теңге, ал дендропарк пен арборетумның нысандарын көріктендіру үшін 69 миллион 101 мың теңге мөлшерінде бір мезеттік қаржыландыру және де осы дендропарк пен арборетумды сақтап қалу мәселесінің жан-жақты ойластырылуын сұраймын».
Біз, институт ұжымы, Үкімет тарапынан тиісті шешімдер қабылданып, жағдайдың жақсара түсетініне сенімдіміз.
Осы ретте, Қазақ орман шаруашылығы ҒЗИ дамуына әлемдік ғылыми интеграция да оң ықпалын тигізіп отырғанын айта кеткім келеді. Біз Корея, Польша, АҚШ, Куба,Чехия, Португалия, Германия, Түркия, Словакия, Қытай және ТМД мемлекеттерінің жетекші ғылыми ордаларымен тығыз ынтымақты байланыс орнатқанбыз. Бұл ғалымдарымыз бен студенттердің, орман шаруашылығы қызметкерлерінің теориялық білімін жетілдіріп, тәжірибе жинақтауына ықпал етуде. Сондай-ақ, бірлескен жобаларды қаржыландыру мәселесінде де игі қадамдар жасалуда. Мәселен, осы қазан айының 5-8-і күндері Германияның орман экожүйесі институты мен «Umwelt-Gerate-Technik GmbH» фирмасының өкілдері біздің дендробағымызда да болып, өздері ала келген 10 мың еуролық «Лизиметрлік құралдар кешенін» орнатып, кең ауқымды таныстырылым жасады.
Болат МҰҚАНОВ,
Қазақ орман шаруашылығы ҒЗИ бас директоры, ауыл шаруашылығы ғылымдарының докторы, профессор
Ақмола облысы