Премьер-Министрдің орынбасары – Ауыл шаруашылығы министрі Асқар Мырзахметов Ақтөбеге жұмыс сапарымен келді. Министр еліміздің агроөнеркәсіптік кешенін дамытудың 2017-2021 жылдарға арналған мемлекеттік бағдарламасы тұжырымдамасын түсіндіруді Батыс өңірінен бастады.
Сапар аясында А.Мырзахметов Алға ауданына барып, «Жұмыспен қамтудың жол картасы-2020» аясында құрылған «АкТеп» ЖШС ірі қара бордақылау алаңы мен «Актюбинский мясной кластер» ЖШС ет комбинатында болды.
А.Мырзахметов жұмыс сапары барысында «Жұмыспен қамтудың жол картасы-2020» бағдарламасы аясында құрылған сүт өңдейтін, сүт қабылдайтын пункттердің жұмысымен танысты.
«АЙС-плюс» ЖШС-нің өндірістік цехын аралап көрді. Серіктестік директоры Қуаныш Ищановтың айтуынша, ауысымына 50 тонна сүт өңдейтін зауытта 50-ге жуық сүт өнімдері шығарылады. Кәсіпорын қайта жарақтандырылып, Германияның технологиялық қондырғысы орнатылған. Қазір технологиялық желінің қуаты небәрі 50 пайыз ғана пайдаланылуда. Бұған өңірде өндірілетін сүттің жетіспеушілігі қолбайлау болуда.
Түстен кейін Асқар Мырзахметов еліміздің агроөнеркәсіп кешенін дамытудың мемлекеттік бағдарламасын түсіндіру мақсатында арнайы жиын өткізді. Алқалы жиынға Ақтөбе, Маңғыстау, Атырау және Батыс Қазақстан облыстары әкімдерінің орынбасарлары, ауыл шаруашылығы салаларының басшылары, фермерлер мен кәсіпкерлер, қоғамдық ұйымдар өкілдері мен мәслихат депутаттары қатысты.
Жиынды облыс әкімі Бердібек Сапарбаев жүргізіп отырды.
А.Мырзахметов «Ағымдағы жылғы 9 қыркүйекте Үкіметтің кеңейтілген отырысында Мемлекет басшысы Үкіметке АӨК бағдарламасын ағымдағы «Агробизнес-2020» үкіметтік бағдарламасы негізінде әзірлеуді тапсырған еді»,– деді. Сондай-ақ, ол жаңа бағдарламаның мақсаты мен міндеттерін тарқата баяндады. «Мемлекеттік бағдарламаның мақсаты – нарыққа қажетті бәсекеге қабілетті АӨК өнімдерінің өндірісін қамтамасыз ету»,– деді А.Мырзахметов.
Мал шаруашылығы саласын мал азығымен қамтамасыз ету қажет. Осыған орай, елдік азықтық теңгерім әзірленіп, енгізілетін болады, азықтық дақылдардың алаңдары ұлғайтылады, құрамажемдерді өндіру және тұтыну ынталандырылады, сондай-ақ жайылымдарды пайдаланудың тиімділігін жоғарылату бойынша жұмыс жүргізіледі. Сонымен қатар, мемлекеттік қолдау көрсету арқылы асыл тұқымды малдың үлесін арттыру бойынша шаралар қабылданады.
Бұдан басқа, АӨК-ті инфрақұрылымдық қамтамасыз ету үшін өнімді өткізу бойынша ауылдық кооперативтер құруды ынталандыру, ауыл тұрғындарына несие беру және оларға сервистік қызмет көрсету, сондай-ақ қаржылық қолдауға қолжетімділігін қамтамасыз ету бойынша іс-шаралар іске асырылады. Асқар Мырзахметов бағдарламаны жүзеге асырудың жоба-жоспарларын нақтылап, түсіндірді, күтілетін нәтижені қолға ұстатқандай дәйекті деректермен дәлелдеді.
Жиында шығып сөйлеушілер еліміздің агроөнеркәсіп кешенін дамыту бағытындағы ойларын ортаға салды. Министр, салалық департаменттер мен компаниялардың басшылары жиынға қатысушылардың сұрақтарына жауап берді.
Сатыбалды СӘУІРБАЙ,
«Егемен Қазақстан»
Ақтөбе облысы