Қорғаныс министрлігінде запастағы генералдар мен офицерлердің бастамасымен «Қазақстан Республикасы Қарулы Күштері ардагерлері» қоғамдық бірлестігінің құрылтай жиыны өтті. Оған Қорғаныс министрі Әділбек Жақсыбеков пен Парламент Сенатының депутаты Мұхтар Алтынбаев қатысты.
Бұл бірлестік болашақта республикалық мәртебеге ие болып, оны құруға еліміздің барлық облыстары мен Астана, Алматы қалаларынан делегаттар қатыспақ. Жиында қоғамдық бірлестіктің төрағасы болып Халық Қаһарманы, генерал-лейтенант Бақытжан Ертаев сайланды.
Бақытжан Ертаев ұйымды құрудағы негізгі мақсат Қарулы Күштердің ардагерлері мен олардың отбасы мүшелерінің мүддесі мен құқығын қорғау болып табылатынына тоқталды. Сондай-ақ, ұрпақтар сабақтастығын қалыптастырып, офицерлік корпустың кәсіби дайындығын арттыруда төл әскерімізге жәрдемдесу, аға буынның жауынгерлік дәстүрлерін жалғастырып, жастарды әскери-патриоттық рухта тәрбиелеу, деді.
Оксана ПАРПУРА, Қорғаныс министрлігі баспасөз қызметінің өкілі.