Нанотехнологияға негізделген «Биоплант-Флора» органикалық-минералды тыңайтқышының тиімділігі жайлы солтүстікқазақстандық диқандар енді-енді біліп жатыр. Осы аттас зауыттың құрылысы Қызылжар өңірінде қолға алынғанда алабөтен қуанған-ды. Зауыттың бірінші кезегін іске қосу жазға белгіленген. Оған дейін едәуір уақыт бар. Егіншілер препараттың Жамбыл ауданы «Агротехника» ЖШС-ның егіс алқаптарында сынақтан өтіп, мол өнім бергенін естігеннен кейін тәжірибелік үлгіде қолдануды жөн көрді. Облыс әкімі Серік Біләлов олардың өтініш-тілектерін ескеріп, Ресейдің «Биоплант-Флора» компаниясы басшыларына ұсыныспен шықты. Ресейліктер көп күттірген жоқ. Түрлі әдістемелік құралдарын, препараттың шыны құтыдағы үлгілерін қоса ала келді.
Аудан әкімдері мен ірі агроқұрылым басшылары қатысқан жиында органикалық-минералдық тыңайтқыштың экономикалық және экологиялық орасан пайдасын алға тартқан компания президенті Акоп Азарян қолдан келген көмектерін аямайтындарын, үш мың тоннаға дейін босата алатындарын жеткізді. Оның айтуынша, препараттың қолдану әдісі өте қарапайым, ал тиімділігі өте жоғары. Бұрыннан қалыптасқан егіншілік мәдениетін сақтай отырып сіңіруге болады. Балуызға әсері мол. Астықтың пісу мерзімін біршама қысқарта алады. Ең бастысы, бағасы қымбат улы химикаттарды қолдану барынша азаяды.
Осылайша астықты алқапта көктемгі дала жұмыстары өзгеше жаңалықпен басталғалы отыр.
Өмір ЕСҚАЛИ.
Солтүстік Қазақстан облысы.