Шаһарға жақында облыс әкімі Бердібек Сапарбаев арнайы келді. Алдымен аймақ басшысы қала әкімі Айбек Кәрімовпен бірге шаһардың орталығында салынып жатқан дене шынықтыру-сауықтыру кешенінің қосалқы ғимаратын көрді. 1988 жылы құрылысы басталып, аяқсыз қалған бұл нысанды «Туған жерге тағзым» акциясы аясында қайта тұрғызуға бекінген жергілікті кәсіпкерлер екен. Құрылыс жобасымен танысқан соң өңір басшысы бұл жұмыстарға «Бизнестің жол картасы» аясында қолдау көрсету мүмкіндігін қарастыратынын айтты. Бұдан соң аталмыш ғимаратпен іргелес тұрған бұрынғы зооветеринария институты ғимаратын қалпына келтірмек болған азаматтардың жобасымен танысты. Кезінде өртеніп кетіп, берік қабырғалары ғана қалған нысан сауда, әкімшілік, ойын-сауық кешені болып қайта салынбақшы. Құрылысты 2014 жылы аяқтау көзделуде.
Сондай-ақ, әкім мемлекеттік жеке-меншік әріптестік аясында жаңадан ашылған 75 орындық «Ақбұлақ» балабақшасының тыныс-тіршілігімен де танысты. Қазір мектепке дейінгі бұл мекемеде 60 бала тәрбие алып жатыр. Олардың 50-і мемлекеттік топтарға, ал 10-ы жекеменшік топқа барады. Осылайша, 3 пен 5 жас аралығындағы балаларға рухани, адамгершілік тәрбие беруге жаңашыл сипатта ерекше ден қойылып отыр.
Осыдан соң Б.Сапарбаев Семейдегі 343 кварталда орын тепкен жаңадан салынған дене шынықтыру-сауықтыру кешенінің бас ғимаратында болып, оның ішкі құрылысын, спорттық жабдықтар мен жаттығу залдарын, жүзу бассейнін тамашалап шықты. Тіпті, үлкен теннис алаңында өзі де қалақпен доп ұрып байқап көрді. Жаңадан бой көтерген бұл кешенді салуға мемлекеттен 1 миллиард 120 млн. теңге бөлінген болатын. Аумағы 10 мың шаршы метрді алып жатқан алып ғимаратта бір мезетте 700 адам спорттың әр түрімен айналысуына барлық мүмкіндік жасалған. 3 спорт залы, жүзу бассейні бар. Мемлекет жастар саясатына жан-жақты қолдау көрсетіп келеді және алдағы уақытта да солай бола береді, дейді бұл жайында түсінік берген жергілікті билік өкілдері.
Таныстырулардан соң меймандар Семей жастары ұйымдастырған «Біз – тәуелсіздіктің құрдастарымыз» атты форумға қатысты. Бұл шараны өткізуге 1991 жылы туған 3 мыңнан астам бозбала мен бойжеткен атсалысты.
Мұнан кейін облыстың әр түкпірінен келген жас өрендер жалынды жырлары мен әуезді әндерін көпшілік назарына ұсынды. Олар өз сөздерінде қоғамдағы ұлтаралық келісім мен татулық қана табыстарға бастайтынын айтып, әрбір қазақстандықты тәуелсіздігіміздің 20 жылдығын осылай бірлікпен атап өтуге шақырды.
Сондай-ақ, студенттер қауымы мен спортшылар мемлекеттің қамқорлығына риза екенін жеткізіп, ыстық ықыластарын білдірді.
Тәуелсіздіктің 20 жылдығы қарсаңында Шығыс Қазақстан облысында бірнеше мектеп, балабақша, әлеуметтік нысандар бой көтеріп, жолдар жөнделмек. Ел тарихындағы айтулы мерекеге әрбір тұрғын өз үлесін қосуға дайын.
Дәулет СЕЙСЕНҰЛЫ,
Қуаныш ҚОЖАЕВ, журналист.
Семей.