«Нұр Отан» халықтық-демократиялық партиясы Маңғыстау облыстық филиалы мен облыстық мәдениет басқармасы бірлесе ұйымдастырған «Тәуелсіз Қазақстанымды әнге қосамын!» атты патриоттық әндер байқауы жоғары деңгейде өтті. Жас ұрпақтың санасына ғасырлар бойы армандап, қол жеткізген тәуелсіздігіміздің қадір-қасиетін өнер тілімен жеткізуді мақсат еткен игі шара есте қаларлықтай болумен қатар, осы тақырыпқа арнап жазылған біраз әсем әндерді өмірге әкелді.
Қазақстанның еңбек сіңірген қайраткері, белгілі сазгер-дирижер Р.Мадреевтің айтуынша, бұл байқаудың нәтижесінде әншілер шеберліктерін шыңдап, жергілікті сазгерлер қатары да көбейе түскен. Музыканы әрлеп, нәрлеп жеткізуде де жетістіктер байқалыпты. Соның бір дәлеліндей, сазгерлер номинациясы бойынша ел арасынан келген Б. Нәдіров бірінші, С. Нұрғожаев екінші орынды иемденіпті. Тағы бір қуанышты жайт, сазгерлер арасынан жүлдегер атанғандар қатарына Т.Үсенова, А.Әбдіразақова, М.Балжанова сияқты қыз-келіншектер қосылған. Вокал номинациясы бойынша бас жүлдеге Б.Ретбаев, бірінші-екінші орындар Ә.Бөлекбаев пен Т.Жақыпов, А.Берікке бұйырыпты. Ел Тәуелсіздігінің 20 жылдығына арналған өнер байқауына қатысқандардың бәрі де арнайы сыйлықтарға ие болып, алғыс хаттармен марапатталды.
Жоламан БОШАЛАҚ.
Ақтау.