Табысымызға жоғары баға

Қазақстандық парламентшілердің Израиль Кнессетіне таяудағы сапары аясында «Тәуелсіздікке – 20 жыл, Бейбітшілік, жасампаздық және ынтымақтастыққа – 20 жыл» тақырыбы бойынша болған дөңгелек үстел отырысында Қазақстан мен Израильдің екіжақты, оның ішінде парламентаралық үнқатысу деңгейіндегі қатынастарды одан әрі дамыту мәселелері талқыланды, деп хабарлады Сенаттың баспасөз қызметі. Сенатор Ғ.Қасымов пікір­сай­ысқа қатысушыларды Қа­зақ­­станның халықаралық бас­та­малары, Астанада болған ЕҚЫҰ саммитінің қорытындылары ту­­ралы хабардар етті. Израиль жағынан ынтымақтастық то­бы­на қатысушы Ф.Киршин­баумның пікірінше, ЕҚЫҰ-ның табысты өткен саммиті Қа­зақстанның халықаралық бе­делін тағы да биіктетіп, оған деген сенімді күшейте түсті. «Бұл сіздің елдеріңізге жаңа жаһандық бастамалар көтеруге мүмкіндік береді», деді депутат. Талқылауда сөз алған сенатор Е.Жұмабаев заң шығару үдерістері, мемлекет құрылы­сындағы маңызды міндеттерді іске асырудағы Парламенттің рөлі туралы айтты. Парламент Мәжілісінің Эко­номикалық реформалар және өңір­лік даму комитетінің төр­ағасы С.Әйімбетов бастап бар­ған қазақстандық парламентшілер Кнессет төрағасы Р.Ривлинмен, «Қазақстан-Израиль» парламентаралық ассоциа­ция­сы­ның мүшелерімен, имми­грант­тарды бейімдеу министрі С.Ландвермен, министрдің ор­ын­басары Д.Аялонмен және са­лалық департамент басшы­лары­мен кездесті. Қазақстан парламентшілері шақырылған Израиль Парла­ментінің жалпы отырысында Кнессет төрағасы Р.Ривлин біз­дің еліміз парламентінің де­пу­таттарына үндеуді жария етті. Үндеуде дипломатиялық бай­ла­ныстар орныққан 1992 жыл­дан бастап Қазақстан Из­раиль­дің маңызды әріптесі болып та­бы­латыны атап көрсетіледі. Онда, сондай-ақ, «Қазақстан мұ­сыл­ман елі бола тұрып, батыс елдерімен берік байланыстар орнықтырды, араб және мұ­сылман елдерінде беделі өте жоғары. Президент Назарбаев­тың басшылығымен Сіздердің еліңізде жүргізіліп келе жатқан салмақты және тұрақты үде­рістерді Израиль жоғары баға­лайды», делінген. Сапар барысында қазақ­стан­дық депутаттар дүние жү­зіне белгілі «Вулкани» аг­рар­лық зерттеу орталығында бо­лып, Израильдегі қазіргі за­манғы жетекші құралдармен жабдықталған жеке «Ассута» емханасының жұмысымен та­нысты.