Еуразия ұлттық университеті: ғылыми және мәдени серпілістер

Мемлекетіміз ел тәуелсіздігінің жиыр­ма жылдық тәжірибесінде білім мен білікті әлемдік талаптарға сай өрістетуді кезең-кезеңмен атқарып келеді. Сонау 90-шы жылдары Елбасы Н.Ә.Назарбаевтың: «Ең бастысы – адам факторы: оның еркі, күш-жігері, табандылығы мен білімі. Өркендеп даму мен тәуелсіздікке аттар табалды­рық­тың алтын кілтін осы шамадан іздеген жөн» деген сөзі елдік істердің темір­қа­зы­ғына айналды. Сонымен, заман жаңарып жатты. Күр­делі уақыт кеңестен кейінгі кеңістіктен саяси, ғылыми-мәдени серпілісті талап етті. Осы ретте 1994 жылы Мәскеу университеті мінберінен Елбасы көтерген Еура­зия­лық Одақ идеясының өміршеңдігін уақыт дәлел­деді. Мемлекет басшысы 1996 жылы 23 ма­мы­рда арнайы бұйрығымен негізін қалаған Л.Н.Гумилев атындағы Еуразия ұлттық университеті де – соның бірегей же­місі. Мұны Нұрсұлтан Әбішұлы «Еуразия жүрегінде» атты кітабында: «Ас­тана­ның жоғары білім жүйесінде тағы бір ма­ңыз­ды қадам жасал­ды. Қазіргі дүниеде қажетті білімді меңгеріп қана қоймай, сол біліммен жеңіп шығуға болатынын біз тү­сінбегенде кім түсінбек. Білім ғана дү­ние­нің қозғаушы күші бола ал­мақ» деп сипаттаған болатын. Л.Н.Гумилев есімін алған уни­вер­си­тет­тің қайта құрылып, жаңа ын­ты­мақ­тас­тық бағдарын ұстағанына 15 жыл толды. Тарихты қысқаша шолсақ, соңғы 17 жылдағы еуразиялық кеңістіктегі ықпал­дас­тықтың бастамалары Қазақстаннан, дә­лірек айтқанда Қазақстан Президентінен өрбіп отырғанын айқындайды. Бұл сон­дай-ақ, көптеген зерттеушілер пос­т­ке­ңес­тік кеңістіктегі ықпалдастық жөніндегі негізгі күш Қазақстан Президенті екенін бірауыздан дәлелдейді. Әрине, осы бағытта ЕҰУ-нің халық­ара­лық және өңірлік миссиясы да айрық­ша. Ол – Қазақстанның еуразияшылдығын ғылыми тұрғыдан салаландыру. Бұл – то­лерантты, демократиялы, жасампаз еура­зия­шылдық. 2009 жылы 10 наурызда Еуразия ұлт­тық университетінде Қазақстан Президенті Н.Ә.Назарбаевтың қатысуымен Универ­си­теттердің Еуразиялық ассоциа­ция­сы­ның ХІ съезі өтті. Жоғары деңгейдегі осы жиынға әлемнің 100-ден астам универ­си­теті­нің басшылары, танымал ғалымдар қа­тыс­ты. Елбасы осында білім мен ғы­лым­ды инновациялық бағдарда жаңғырту мен жастардың жігерін жаңашыл ізденістерге бұру туралы қадау-қадау маңызды ойлар айтып, халықаралық ғылыми-мәдени ық­пал­дастықтың басым бағыттарын ай­қын­дап берді. Осы орайда ЕҰУ әлемнің ғы­лы­ми орталықтары мен университеттері ара­сын­дағы маман әзірлеу мен ғылыми жоба даярлау бойынша келісім-шарттарды қай­та пысықтап, Елбасының жаңа тапсыр­масын орындаудың жоспарын қабылдады. Еуразия ұлттық университеті елдің бі­лі­ми-ғылыми әлеуетін көтеру бағытында Елбасы сеніп тапсырған PhD бағдар­ла­ма­сын жүзеге асыру жобасына сәйкес, әлем­дік университеттердің таңдаулы ғалым­да­рын ортақ іске жұмылдыра алды. Шетелдік профессорлардың Қазақстанға бағ­дар­лан­ған ізденістері мен жас ғалым­дары­мыз­дың дүниежүзіне белгілі зертханаларда ғылыми тәжірибеден өтуін отандық білім үшін жаңа арна деп есептейміз. Соны­мен бірге, соңғы жылдары Ресей халықтар достығы, Мәскеу мемлекеттік құрылыс, «Дубна» халықаралық табиғат, қоғам және адам университеттерімен, М.В. Ломоносов атындағы Мәскеу мемлекеттік университетімен (математика-механика, ақпарат­тық технологиялар факультеттері), Ресей мем­лекеттік гуманитарлық университетімен (журналистика және саясаттану факультеті), Айова мемлекеттік ғылым және технология университетімен, Нью-Мек­си­ко университетімен (АҚШ) бірлесіп, қос дипломды мамандар даярлай бастауы – инновация аясында қарастырылатын жұ­мыс­тар. Бірлесе дайындайтын маман­дық­тардың ішінде ғарыштық технологиялар да бар. Жақында ғана Беларусь президенті А.Лукашенконың Қазақстанға жасаған рес­ми іссапарына орай ЕҰУ мен Беларусь тех­никалық университетінің негізінде ғы­лым-білім консорциумының құрылуы – отандық жоғары мектеп дамуының жаңа белесі болып есептеледі. ЕҰУ-дың халықаралық ынтымақтас­тық­ты тиімді қолдануға бағытталған тағы бір бағдары – ШЫҰ (ШОС) университеті және ТМД Желілік университеті сияқты беделді білім беру жобаларына қатысуы дей аламыз. Осы арқылы университеттің ма­гистрлік бағдарламасы жаңа арнаға бұрылды. Биылғы «Болашақтың іргесін бірге қа­лай­мыз!» атты Қазақстан халқына Жол­дауында Нұрсұлтан Әбішұлы: «Білім беруді жаңартуды жалғастыру қажет. Жо­ға­ры оқу орындарының инновациялық қыз­мет­ке өту тетіктерін әзірлеу керек. Кем дегенде 2 жоғары оқу орны үздік әлемдік уни­верситеттер рейтингісінде атап өті­ле­тін болады» деп тапсырма беріп, сеніммен отандық жоо-ға үміт артқанын көзі­қа­рақ­ты оқырман жақсы біледі. Л.Н.Гумилев атындағы Еуразия ұлттық университеті сенім үдесінен шығып, Ұлыбританиядағы халықаралық тәуелсіз рейтинг агенттігі «QS - World University Rankings» бойынша әлемдік 17 мың университеттің ішінен 2009 жылы – 600-дікке, 2010 жылы – 500-дікке кір­ді. Бұл рейтинг – ЕҰУ-дың Орталық Азия аймағындағы ең үздік университет еке­нін, ал ТМД-дағы осы деңгейдегі 5 уни­­верситеттің бірі екенін айқындайтын көрсеткіш. Біздің алдымызда жүз жылдан астам тарихы бар Мәскеу, Санкт-Петер­бург, Томск университеттері мен елу жыл­дан астам тарихы бар Новосібір мемлекеттік университеті тұр. Енді осы нәтижеге қалай қол жеткізілгеніне келейік. Ең алдымен, оқу үдерісі са­паландырылды. Екінші, ғалымдарды ын­таландырудың көзін таба отырып, импакт-факторы аса жоғары журналдарда жараты­лыс­тану мен техника саласы маман­дары­ның мақаласын жариялады. Үшінші, университет ғалымдары мен студенттері кез келген ғылыми конференцияға емес, үлкен ғылыми жетістікке құрылған баяндамасын талқылату үшін халықаралық форумдарға ғана жіберілді. Баяндама сапасы мұқият қаралды. Төртінші, РһD бағдарламасы бо­йын­ша жас ғалымдарға шетелдік қосымша жетекшілердің сапасына да, бағдарламаны орындаушының өзіне де қатаң талап қойды. Бесінші, мәдениет пен жастарға қатысты жұмыстарды бір кезең­дік коньюнктурадан гөрі ұзаққа арналған құндылықтарға сай құрды. Беделді әлем­дік білім-ғылым рейтингі де осыны талап етті. Осының бәрі Білім және ғылым министрі Б.Жұмағұловтың жаңа қабылданған «Ғылым туралы» Заңды іске асыру шара­ларына және зерттеу университеті жоба­сына қатысты айтқан тұжырым­дамалы ой­ларымен сабақтасып жатыр. ЕҰУ рек­торы Б.Әбдірайым – Елбасы мен ел сенім артқан елорданың жетекші университетін жаңарған заман адымына сай дамытуды үйлестіріп отырған білікті басшы дер едік. Адамзатқа ортақ ойшыл Сократ: «Білім мен ғылым ізгілікке қызмет етуі керек» деген еді. Біз жаңарған Қазақстан білім-ғылымы осы бағытта деп сенеміз. 2009 жылы Еуразия университеті ғы­лыми кеңесі PhD диссертанттары үшін халықаралық беделді журналдарда мақала жариялау туралы шешім шығарып, оны жүзеге асырғанда, республика ғылыми қауымы бұл бастаманы жақсы қабылдады. Ұлттық бірыңғай тестілеу нәтижесі бойынша, 2010 жылы ЕҰУ-ды 610 «Алтын белгі» иегері таңдаған. Бұл – еліміздегі мектеп бітірушілердің үштен бірі. Университет екі жыл қатарынан осы көрсеткіштен түскен жоқ. Еуразия ұлттық университетіндегі әрбір бесінші студент – «Алтын белгі» иегері немесе халықара­лық, республикалық олимпиадалардың жеңімпазы. Кейбір мамандықтар бойынша ақылы бөлімге түсу үшін қосымша талаптар бекітілген. Мұнда оқуға түсу балы республика көлемінде алғанда ең жоғары. Ол 70-тен төмен емес. Тең жартысы «Алтын белгі» иегерлері болып келетін топқа түскен жастар үлкен бәсекелестік ортаға түсіп, талпынушылығы жоғары­лай­ды. Педагогтің мұндай ортаға дайын­дал­май келуі тіпті де мүмкін емес. Оқытушы-профессор қауымы мұны жақсы түсінеді және осы деңгейге сәйкес болуға тыры­са­ды. Сондықтан 2010 жылы «Болашақ» мемлекеттік бағдарламасы бойынша 42 оқытушы ғылыми тағылымдамадан өтуге барды. Бұл индикатор бойынша да ЕҰУ республика бойынша алда келе жатыр. Университет оқытушылары Америка, Еуропа, Ресейдің үздік университеттерінде тағылымдамадан өтеді. Бұл оқытушы­лар­дың кәсіби білігін көтеруге жақсы көмегін тигізіп жатыр. Еуразия ұлттық университеті – 2011 жылы 4 Нобель сыйлығы лауреатының (Р.Корнберг, Р.Ауманн, Д.Миррлис, Д. Нэш) шеберлік сыныбын өткізген оқу ор­ны. Сонымен қатар, мұнда респуб­лика­мыз­да алғаш рет шетелдердің Қазақстан Республикасындағы тұрақты және өкілетті елшілерінің ашық дәрісін өткізу дәстүрге айналды. Осы күнге дейін Еуродақтың бас өкілі, Латвия, Словакия, Греция, Испания, Германия, Финляндия, Чехия, Швеция, Венгрия, Ұлыбритания, Румыния, Литва, Франция, Италия, Нидерланды мемлекет­тері­нің елшілері тартымды дәрістер оқы­ды. Бұл шаралар халықаралық ғылыми ықпалдастық үшін аса маңызды болып отыр. 2010 жылы көктемде М.Ломоносов атын­­дағы ММУ-де өткен арнайы ғылыми мәжі­лісте білім ордасының ректоры Виктор Садовничий мінберден: «Осы залда қазіргі за­манның ұлы математигі отыр, әлемнің үздік университеттері оны жұ­мыс­қа тартуды мақ­тан тұтады. Ол – Еуразия универси­теті­нің профессоры, академик Мұхтарбай Өтел­баев» деп айтқанын республикалық БАҚ жазды. Бұл – жоғары мектепті ұйымдас­тыру­шылардың көрнекті өкілінің, аса таны­мал ғалымның бағасы. Жалпы, ЕҰУ математика мектебі Қазақ­стан­нан шеткері жерлерге кеңінен таныс. Мұның ішінде әлемдік алгебра элитасы қатарына енетін Америка математика қо­ға­мының Е.Х.Мур атындағы сыйлығы­ның лауреаты Уәлібай Өмірбаев та бар. Атал­ған екі ғалым да ҚР Мемлекеттік сыйлы­ғын алды. Көптеген Еуропа университеттерінде дәріс оқып, жуырда ғана Жап­о­ния­ның Осака университетінің құрметті про­фессоры атағын алған академик Р.Бер­сімбайдың молекулярлық генетика сала­сын­дағы зерттеулері – отандық ғылымның жетістігі. Университеттің гуманитарлық са­ла­дағы табыстары да елге белгілі. Мыр­затай Жолдасбеков ұйытқы болған түрко­логиялық зерттеулер, марқұмдар академик Рымғали Нұрғали мен профессор Ақселеу Сейдім­бек­тің, Қ.Салғараұлы мен Қ.Сарт­қожа­ұлы­ның ұлт тарихы мен руханияты, мәдени мұра туралы іргелі еңбектері, академик Ж.Әбділдиннің – философия сала­сындағы, ака­де­мик М.Серғалиевтің – филология саласындағы монографиялары – елдің баға жетпес байлығы. Профессорлардан Е.Нұр­ға­лиеваның – заң ғылымы, С.Батырша­ұлы­ның – халықаралық қаты­настар, Н.Омашев­тің – қоғамдық коммуникация мен журналистика тарихы, С.Негимовтің – әдебиет­тану саласындағы жетістіктері мен зерттеулері республикаға кеңінен таныс. Л.Н.Гумилев атындағы Еуразия ұлттық университетінің ғалымдары – «Ел бірлігі» доктринасының авторы. Мұнда үш база­лық қағидат біріктірілген: бірінші, бір ел – бір тағдыр; екінші, тегі бөлек – тең мүм­кіндіктер; үшінші, ұлттық рухты дамыту. Бұл құжатты Президент бекітті және оның ең басты жетістігі - әр азаматтың елді ардақтауға деген мақтанышын арттырып, Отанының өткені мен бүгініне жауапты әрі қатысты сезімін ояту. Қазақстан үшін ел бірлігі мен ұлт тұтастығы не екенін, оның маңызын түсіндіріп жату артық. 2009 жылдың күзінде осы доктринаның алғашқы жобасы баспасөзде шыққанда, қоғамдық пікірде үлкен саяси текетірестер болғанын жасырмаймыз. Сондықтан енді мемлекет алдында әлемдік тәжірибе мен тарих тағылымын ескерген доктринаның мүлдем жаңа жобасын жасау міндеті тұрды. Осыны ЕҰУ-дың заңгер, тарихшы, саясаттанушы, филолог ғалымдары абы­роймен атқарып шықты. Мұны қазір шетелдік сарапшылар да лайықты бағалап отыр. Қазақстан мәдениеті мен тарихын әлемге танытуда – Елбасы айқындаған ЕҰУ-дың басым бағыты. Бұл орайда осы университеттің ынта-жігерімен атқары­лып жатқан шетелдік белгілі университеттерде «Абай орталығын» ашу шарасы – елдіктің маңызды ісі деуге лайықты. Мұндай орталық 2010 жылы 19 тамызда Ереван мемлекеттік университетінде, 2011 жылы 13 мамырда Баку мемлекеттік университетінде ашылды. Енді осындай қазақтың тілін, мәдениетін және тарихын насихаттайтын орталықтар Қытай, Ресей, Беларусь, Украина, Иордания, Үндістан, Польша, Румыния университеттерінде бой көтермек. Мұнда ЕҰУ-дың оқытушы-ғалымдары іссапармен барып, тұрақты дәрістер жүргізіп тұратын болады. Университетте ғылыми-зерттеулерді ын­таландырудың жаңашыл әдістері қол­данылады. жоо-ның әлемдік рейтингі ғы­лы­ми басылымдардағы жарияланымының саны мен сапасына байланысты екенін ескеріп, әр бағыт бойынша жоғары импакт-факторлы ғылыми журналдар белгіленген. Сондықтан ЕҰУ-да халықаралық дең­гей­дегі басылымдардағы зерттеулерін ынта­ландыру үшін ғалымдар мен зерттеушілерге сыйлықтар қарастырылған. Ғылыми кеңес шешімі бойынша осындай жария­ланымы үшін әр профессор бір мың дол­лар көле­мін­де сыйақы алады. Аталған бастама өз нә­ти­жесін беріп келеді. Университетте рейтингтік журналдарға жыл сайын тұрақты мақала жариялап тұратын М.Өтелбаев, Р.Берсімбай, Н.Темірғалиев, И.Іргебаева, Р.Мырзақұлов, Р.Ойнаров, С.Сауыт­беков, Е.Нұрсұлтанов, Қ.Күтер­беков, Т.Нұр­ахметов, А.Дәулет­бекова, Р.Омаров, Ә.Ақыл­беков, Н.Тілеуханова, Е.Сүлеймен, т.б. профессорлар бар. Бұл уәждеме нәтиже бергенін көріп, университет PһD докторанттарына да талап қоя бастады. 2010 жылы 5 докторант ха­лық­аралық рейтингтік журналдарға ма­қа­ла жариялады. Ал, биыл жараты­лыстану ғылымдарының барлық бағыты бойынша докторанттардың еңбектері жарық көре бастады. ЕҰУ-да барша кафедра жұмысының нәтижесі 3 көрсеткіш бойынша бағалана­ды: бі­рінші – жыл бойы шығарған кітап­тары мен монографияларының саны; екінші – рей­тингтік журналдарға жария­ланым­дары­ның саны; үшінші – әр алуан гранттар мен білім беру бағдарламалары бойынша ұтып алған қаржысы. Бұған кафедра қызмет­керлерінің біліктілігін жоға­ры­лату да кіреді. Университеттің тағы да бір елеулі жұмысы – физика-техникалық (мұнда ға­рыштық мамандықтар бар) және журналистика және саясаттану факультеттерін ашты. Математиктердің әлеуетін ескеріп, оларды ақпараттық технологиялардан бөлек факультет етіп қайта құрды. Сөйтіп, ЕҰУ-да 13 факультет, 20-дан астам ғылы­ми орталық жұмыс істей бастады. Әрине, факультеттер мен ғылыми зерт­ханалардың елеулі деңгейі конференциялармен өлшенеді. ЕҰУ-да жыл сайын өте ма­ңызды ғылым салалары бойынша ғылы­ми жиындар өтеді. Мысалы, 2009 жылы өткен А.Холландер атындағы 15 халықаралық курс, 2010 жылы өткен Гумбольдт-Коллег ІІІ халықаралық конференция мен «Еуразия өңірінде қауіпсіздік пен тұрақтылықты қам­тамасыз ету контексіндегі Қазақстанның ЕЫҚҰ-ға төрағалық етуі» атты конференция, сондай-ақ түркі­тану, тарих, тіл, саясаттану, журналистика мәселелеріне арналған халықаралық конференциялар тек Еуразия университетінің ғана емес, Қазақстанның ғылыми беделін әлемге танытты. ЕҰУ-да еуропалық жоғары оқу орын­дары­мен тығыз ынтымақтасу «Эрасмус Мундус» және «Темпус» сияқты Еуроп­а­лық Одақтың білім беру бағдарламалары шеңберінде жүзеге асады. Бүгінгі таңда Л.Н. Гумилев атындағы ЕҰУ отандық жоо арасында «Эрасмус Мундус» бағдарлама­сына қатысу көрсеткіші жөнінен алдыңғы орынды иеленеді. Елбасының тапсырмасына сәйкес, әлем­нің белгілі ғылыми орталықтарынан жоғары ғылыми дәрежесі мен табысы бар ғалым­дар­ды тарту шарасы да ЕҰУ-да жүйелі жүргізіліп отыр. Осы мақсатта Германияның беделді университеттерінде тағылымдама­дан өткен – физик В.Жү­нү­шәлиев, математик А.Нұрақунов, Ұлы­британиядан – математик В.Буренков, Аме­рикадан – биотехнолог Р.Омаров шақы­ры­лды. Олар қазір отан­дық ғылымды да­мытуға бел шеше кірісіп кетті. Соңғы жыл­дары ЕҰУ-да оқуға шектес өңірлерден бөлек АҚШ, Қытай, Корея, Ресей азамат­тары тілек білдіре бастады. Со­лар­дың ішінде қазір тілдік курстан өтіп жүр­гендері де бар. Еуразия университеті ірі халықаралық конференцияларға қатысатын студенттер мен магистранттарға ғылыми ортада жаңа идеялар мен тәжірибе алмасуы үшін қар­жылай көмек көрсетеді. Әр бағыт бо­йын­ша әлеуметтік қолдау көрсету қарас­ты­рылған. Үздік студенттер жыл бойына 50 доллар көлеміндегі қосымша атаулы шәкір­тақымен ынталандырылады. Көп балалы отбасынан шыққан немесе жетім 500-дей студент университет асханасынан тегін түскі ас ішеді. Ғылыми үйірмелерге, көркемөнерпаздар бірлестігіне белсенді қатысатын студенттерге тегін жол жүру билеті беріледі. ЕҰУ-да талантты жас­тарға арналған Өнер ордасы бар екенін, онда вокал, хореография, поэзия, КТК, театр өнері үйлестірілгенін айта кеткен орынды. Бұл ретте студенттердің оқу үдерісі мен ұжымдағы «Нұр Отан» ХДП бастауыш ұйымының жұмысын үйлестіріп жүрген проректор Ж.Нұрманбетова, сту­дент­тердің мәдени-әлеуметтік жұмысын дамытып жүрген проректор Л.Есмұхан еңбегін атап өткен ләзім. Әлемдік тәжірибеден белгілі жайт: мемлекет үшін жоғары оқу орны – ғылым, білім және мәдениеттің тоғысқан жері, зерде биігі. Қазақстанда ұлттық университеттерге, соның ішінде астаналық жетекші университетке қоятын Мемлекет басшы­сы­ның талабы да жоғары. 2009 жылдан бері әрбір жаңа оқу жылы басталған сайын ЕҰУ-да «Ауқымды елдік дәрістер» айлығы жүр­гізіледі. Бұл дәрістер ел жүрегі – Астананың жетекші оқу орнында Университеттердің Еуразиялық ассоциа­ция­сы ХІ съезіндегі Елбасымыздың тап­сырмасына және университет ғылыми кеңесінің шешіміне сәйкес айқындалған еді. Дәрісті оқитындар – өз елімізге және шетелдерге танымал білікті профессорлар, қай­рат­керлер. Бұл шарада Мемлекет бас­шысының Еуразиялық идеясы мен миссиясы, отан­шылдықпен біте қайнасқан қазақ тарихы мен мәдениетінің елеулі кезеңдері, гумилевтану, білім мен ғылым ықпалдастығы туралы кеңінен сөз қоз­ғалады. Осы шара барысында мыңға жуық таң­даулы студент жиналған аудиторияға А.Сей­дімбек, М.Өтелбаев, Р.Берсімбай, Ә.Ах­метов, С.Батыршаұлы, Қ.Салғараұлы, А.Тас­болатов, Н.Омашев, Ғ.Шалахметов, Н.Темір­ғалиев, С.Негимов, В.Буренков (Кардифф университетінің профессоры), Д.Қамза­бекұлы, З.Қабылдинов, Р.Омаров (Техас университетінің профессоры), С.Төлеу­баева, т.б. өз саласын жетік білетін ғалым­дар мен қайраткерлер дәріс оқыпты. Сөз ретіне қарай айтар болсам, былтыр ЕҰУ-дағы Елбасының аудиториясында мен де дәріс оқыдым. Жастармен ғылыми дидарласудан алған әсерім ерекше. Жас азамат қашанда еліктегіш келеді, олар үлгі-өнеге іздейді десем, дәріс оқыған тұлғалар студенттерге үлкен ой тастап, серпілтеді. Қазіргідей жауапты шақта мұндай дәріс­тер аса қажет. Абай хакім: «Жүректе қай­рат болмаса, ұйықтаған ойды кім түртпек» демеп пе еді?! Білуімше, ЕҰУ мұны түрлі форматта жал­ғастыра бермек. Мысалы, әрбір факультетте ғылыми кеңес залы, сондай-ақ ұжымға ор­тақ М.Қашқари, Абай, Пушкин, Ататүрік, А.Байтұр­сын­ұлы, Н.Төреқұлұлы, Ә.Мар­ғұ­лан, Г.Әлиев, С.Зиманов, К.Ақышев, С.Қи­рабаев, Ж.Әбділдин, Р.Нұрғали, А.Сейдімбек атын­дағы атаулы аудиториялар, залдар, мемо­риал­дық кабинеттер жұмыс істейді. Мұ­­ның бәрі ортақ елдік істі салаландыру үшін қажет екені түсінікті. Мысалы, оқу үде­­рі­сін, ғылым мен елдік талапты ұш­тас­тырған ЕҰУ-дың профессор-оқыту­шылары 2009-2011 жылдары мемлекеттік тілде 30-дан аса оқулық даярлап, жария­лаған. Бұл мәселеде университет жастардың мәдени деңгейін көтеру шараларына да бөлек қарамайды. Республика бойынша резонанс туғызған «Қыз Жібек», «Ер жігіт», «Ардақты ана» байқаулары, жастар театрының жаңашыл ізденістері – ЕҰУ-дың осы бағыттағы табыстары. Осы тұста біз Еуразия ұлттық универ­си­тетінің танымалдығын Қазақстанның танымалдығынан бөліп қарамай­тыны­мыз­ды айтқымыз келеді. Мысалы, қазір ЕҰУ web-сайты – ең көп тұтынушысы бар сайт. Бұ­рын ол дәстүрлі қазақ-орыс-ағылшын тілдерінде ақпарат берсе, бүгінде аясын қытай, түрік және араб тілінде кеңейтті. Ал жақын болашақта ақпарат беру тілінің қатарына француз, испан, неміс тілдері қосылмақ. Университеттің алда атқаратын жұ­мыс­тарына келсек, негізгі мақсатының қатары­на бар мүмкіндікті пайдаланып, оқытушы-профессорлар құрамының жұмысы мен студенттердің оқуына қолайлы жағдай ту­ғызу; халықаралық біліми-ғылыми қатын­астарды жаңа деңгейге көтеру; жаңашыл, әлеуетті ғалымдарды қызметке шақыру; уни­верситеттің ғылым бағытын, соның ішінде іргелі зерттеулерді, магистратура мен РһD бағдарламасын жаңа сапаға кө­теру; университеттің ішкі құрылымын әлемдік озық тәжірибелерге сай етіп жүйелеу; мә­дени жұмыстарды студент­тердің шығарма­шы­лығын айқындайтындай етіп құру кіреді. Таңдаулы профессор-оқытушылар, таң­даулы студенттер, жоғары техноло­гия­лық зертханалар, сапалы білім беру үдерісі – жаңашыл университеттің іргетасы. Елба­сының айқындап берген жолымен Еуразия университеті осы меженің үдесінен шығып отыр. Ғарифолла ЕСІМ, Парламент Сенатының депутаты, академик.