Шетелге барсаңыз Қазақстаннан келген делегацияның құрамы әр түрлі болса да қазақ деп қабылдайды. Спорт жарыстарында да солай. Мәселен, Геннадий Головкин шаршы алаңда. Жарысты жүргізіп отырған орыс комментаторы “бұл қазақ” деп сөзін сабақтайды. Өзіміздің орыс қой демейді.
Өйткені, Геннадий – Қазақстанның азаматы. Осында туған, өсіп-өркендеген. Бүгінде шетел шаршы алаңдарында жұдырықтасып жүр. Әйтсе де қазақ аты қалған жоқ. Жүрек жылиды. Азаматым-ай дейсің. Туған топырағын тәу етіп жүрген.
Қазақстан – сан алуан ұлт пен ұлысқа атамекен болып отыр. Ешқайсысын бөтенсің деп кеудеден итерген емес. Ендеше, олардың тарапынан да Отанына деген ыстық ықылас болу керек қой.
«Қазақтелеком» акционерлік қоғамы осындай игі іске ұйытқы болды.
2011 жылғы 15 наурызда «Қазақтелеком» АҚ-та мемлекеттік тілді енгізу мен дамытудың 2011-2013 жылдарға арналған бағдарламасының бірінші кезеңін жүзеге асыру мақсатында шешім шығарып, оны бастап кетті.
Шымкенттегі ОҚО телекоммуникация дирекциясының ғимаратында өткен байқауға жеті ұлттың өкілінен 18 маман сынға түсті. Мамандықтары да әртүрлі. «Қазақтелеком» АҚ-тың осындай байқау өткізуінің де өз мәні бар. Өйткені, қызмет бабымен осында адамдар жиі келеді. Қазір шетелдерден тарихи Отанына оралып жатқан қандастарымыз көп. Ғұмырында орыс сөзін естіп көрмегендері бар. Шаруасымен «Қазақтелекомға» көп кіреді. Шүлдірлеп отырған шіркін кеудеден итергендей қылады. Әрі-беріден соң – Қазақстанның мемлекеттік тілі – қазақ тілі. Оны осы мекеме қызметкерлері тәрк етіп жатса басқа қайтпек?!
«Қазақтелеком» АҚ басшылығы осы оқылықтың орнын сөзбен емес іспен толтыруға көшіп жатыр. Оны байқау барысында таныдық.
– “Қазақ қазақпен қазақша сөйлессін” дегенді малданбайық. Басқалар да сөйлесін. Неге орыс пен украин, неміс пен кәріс, ұйғыр мен өзбек кездесе қалғанда бір-бірімен мемлекеттік тілде сөйлеспейді.
Меніңше, Отанға деген патриоттық сезім осындайдан басталады, – дейді “Алматытелеком” телекоммуникация дирекциясының маманы Алексей Тынянов.
Рас-ау. Алексей бауыр құдайшылығын айтады. Қазақ тілі – қазақтың ғана емес Қазақстанды Отаным деп білетін, ешқайда көшіп кетуді ойламайтын, түп-тұқиянын осы елмен байланыстыруды көздейтін әрбір ұлт пен ұлыстардың тілі болса керек. Қазақтың ширек бөлігі дүние жүзінің әр мемлекетінде өмір сүріп жатыр.
Өзі өмір сүріп жатқан мемлекеттің тілінде сөйлемеймін деп айта алмайды. Өмір сүруі үшін қажет. Осындай қажеттілік Қазақстандағы диаспора өкілдеріне де туып келеді. Бұл – өмір заңдылығы. Алексейдің пікірі бәріне жақын дейтініміз сондықтан. Байқауда қазақ әндері шырқалды. Шәмші ән болып, Мұқағали жыр болып құйылды. Абыз Абай ұлылықтан сыр шертті. Қазақ билері биленді. Телекоммуникация саласындағы қиын терминдер қазақша тәржімаланды.
“Қазақтелекомға” ісі түсіп келетіндердің көп екендігін айттық. Сервис желісі қызметкерлері мен тұтынушылар арасында әр түрлі келіспеушілік болып жатады. Осындай қиын жағдайда оператор тығырықтан шығарда неге жүгінеді, жанжалды басу үшін қалай сөйлеуі керек?!
Бұл да байқау қойған шарттардың бірі.
Алматы, Астана және республикамыздың облыстарынан келген үміткерлер мейлінше жақсы жағынан көрінуге тырысып бақты. Бәрі біздей жақсы десек қателеспесек керек. “Көш жүре түзеледі”.
Байқау қорытындысы бойынша Ақмола облыстық телекоммуникация дирекциясының бірінші санаттағы маманы Дмитрий Тюрин бірінші орын алды. “Қазақстандағы барлық ұлттар мен ұлыстар қазақша сөйлессін” деп көпшіліктің көкейіндегі ойды қозғаған “Алматытелеком” қызметкері Алексей Тынянов пен павлодарлық Магра Ягудина екінші орынға ие болды. Ал, атыраулық Елена Солодникова мен қостанайлық Евгения Вылкова үшінші орынға шықты.
Мемлекеттік тілді қолдауда ең бірінші орындардың бірінде тұруға тиіс “Қазақтелеком” АҚ тіл үйренемін деушілерге осындай мереке сыйлады. Мемлекеттік тілдің қолдану аясын кеңейту мақсатында үлкен шара өткізді. Ел үшін керек. Қазақстанды Отаным, байтақ жұртты – елім дейтін әрбір адам үшін керек іс.
Қолдауға, тілі мемлекеттік тілде сынбай жүрген мемлекеттік мекемелер іліп әкететін жақсы бастама, жақсы үрдіс бұл.
Бақтияр ТАЙЖАН.
Шымкент.