Адам ағзасына қажетті азық-түлік түрлерінің қатарында сүттің алатын орны ерекше. Табиғи дәрумендерге бай сүттің өзінен ғана қаншама дастарқан мәзірін жайнатып жіберетін тағам түрлері жасалады. Қазіргі дүкен сөрелеріндегі шетелден жеткізілетін осындай өнімдерді өзімізде жасалған дәмді тағам түрлері ысыра бастады. Бұл әрине үлкен жетістік, әрі бәсекеге қабілеттіліктің алғышарты деуге болады.
Талдықорған қаласының шетіне орналасқан экологиялық жағынан табиғи таза өнім өндіретін «GSR Lactik ltd» кәсіпорнының тыныс-тіршілігі құптарлық. Өндіріс орны 2008 жылдан бері дәмділігі мен сапасы жағынан тұтынушы көңілінен шығып, сұранысты арттыратын тағам түрлерін шығарып, уақыт озған сайын тәжірибелерін толықтырып отыр. Алғашқы жылдары сүт, айран, қаймақ қана әзірленсе, енді қатық, кілегей, сүзбе, сары май, йогурттың төрт, ірімшік, сырдың 30-ға тарта түрлерін дайындауда. Өнім арнайы зертханада тексеруден өтіп, сапасы қатаң қадағаланады. Өнім сақтайтын тоңазытқыш та жұмыс істейді.
Дайын өнімдер өңірдің түкпір-түкпіріне үздіксіз жөнелтілуде. Талдықорған мен Алматы қаласындағы арнайы нүктелер арқылы шаһарлықтардың азық-түлікке деген сұранысын қанағаттандырып, саудалануда. Сүт өнімдерін әзірлеуге қажетті ескірген қондырғылар тұтастай жаңартылуда. Сондай-ақ, өндіріс заман талабына сай кеңейтілмекші. Келешекте өнім көлемін отыз бес тоннаға дейін жеткізу көзделген. Әсіресе, балаларға арналған дәруменге бай өрік-мейіз қосылған тағам түрлерін шығару қолға алынбақшы. Негізгі шикізат сүтті ауыл шаруашылығымен айналысатын шаруа қожалықтарынан жиналады екен.
– Көбіне сүттің жеткіліксіздігінен өңір халқын түгелдей өз өнімдерімізбен қамтамасыз ете алмай отырмыз. Мақсат сүтті мол беретін асыл тұқымды сауын фермасын ашу. Сонда ойлаған міндеттер толық жүзеге асырылады, – дейді бас инженер Наурыз Орындыбаев.
Қазір кәсіпорында 70-тен астам адам жұмыспен қамтылса, олардың қайтарымды еңбек етуіне барлық жағдай бар. Мәселен, жоғары оқу орнын бітірген жас мамандарды жұмыстың қыр-сырын білетін, техниканы жетік меңгерген тәжірибелі жандар қамқорлыққа алуда.
Ұтымды ұйымдастырылған жұмыс нәтижесінде еңбек өнімділігі артуда. Мәселен, бастапқыда күніне жарты тоннаға жуық өнім өндірілсе, қазіргі кезде бұл көрсеткіш жиырма бес тоннадан асып түсті.
Кәсіпорын ұжымы Қазақстан Республикасы Президентінің «Сапа саласындағы жетістіктері» конкурсы мен республикалық «Алтын сапа» көрмесінде белсенділік танытып, «Алғыс хатпен» марапатталыпты. Ауыл шаруашылығын дамытуда қосқан үлестерімен кәсіби шеберлігі, жоғарғы өндірістік көрсеткіштері үшін әр кезде алдыңғы орындардан көрінген.
Халқымыздың салт-дәстүрін алға апарған кәсіпорынның Елбасы Жолдауын қызу қуаттайтыны анық аңғарылады. Әдемі қапшықтардағы дайын өнім тұтынушыға осылай толассыз жол тартуда. Бұл отандық кәсіпорындағы отандық өнім. Ал, олардың алдағы жоспарлары да көп. Игі ізденіс, еселі еңбек арқылы оны да жүзеге асыруға болатындығы анық.
Күмісжан БАЙЖАН.
Алматы облысы.