Қос құраманың қуанышы

Астанада грек-рим күресінен Қа­зақстан Республикасы Президенті Нұр­сұл­тан Назарбаевтың Кубогы жолын­дағы ІІ халықаралық турнир аяқталды. «Самұрық-Қазына» ҰӘҚ» АҚ-тың бас демеушілігімен, Туризм және спорт министрлігінің қолдауымен өткен турнир бас-аяғына дейін қызықты және тартысты өтті. Онда құрамалар екі топқа бөлініп, «А» тобында Қазақстан-2, Өзбекстан, Қыр­ғызстан, Әзірбайжан мен Венгрия командалары күш сынасса, «В» тобында түйе балуан Нұрмахан Тінәлиев бастаған Қазақстанның бірінші құрамасы, Оңтүс­тік Корея, Жапония, Қытай мен Беларусь балуандары белдесті. Осы топтарда үздік шыққан төрт команда жартылай финалда кездесіп, шешуші сынға жолдама алды. Сөйтіп, жартылай финалда қарсылас­тары­нан есе жіберген Қазақстан-2 құра­масы мен Оңтүстік Корея балуандары үшінші орын үшін белдессе, финалда Қазақстанның бірінші құрамасы Венгрия командасымен кездесті. Осы екі кездесу де білікті бапкер Мұ­рат­бек Қасымханов басқаратын құрама­лары­мыз үшін оңай болған жоқ. Әсіресе, финалда біздің балуандарымыз бен бапкерлеріміз біраз қара терге түсті деуге болады. 7 салмақ дәрежесінде өткен финалда Қазақстан-1 командасы қарсылас­тарын 4:3 есебімен жеңіп, бас жүлдеге ие болды. Бұл бәсекеде Асхат Құдайбер­генов (55 кг.), Асхат Ділмұхаммедов (74 кг.), Алмат Кебісбаев (60 кг.) пен аса ауыр салмақтағы Нұрмахан Тінәлиев венгрлерді жеңсе, Дархан Баяхметов (66 кг.), Алзахор Өздиев (84 кг.) пен Марғұлан Әсем­беков (96 кг.) есе жіберіп алды. Финалда Тінәлиев пен Дик-Бардос Михалидидің белдесуі тартысты өтті. Сол күні екі алыптың күресіне дейін таблода есеп 3:3 болып тұрды. 74 кг. салмаққа дейін Қазақ­стан құрамасы 3:1 есебімен жеңіп жатқан болатын. А.Өзиев пен М.Әсембековтің жеңілісі венгрлерге есепті теңестіруге мүм­кіндік берді. Алайда, біздің түйе балуан­ның намысқа тырысып, соңғы сәтте венгрді алып соққанда «Дәулет» спорт кешеніне жиналған мыңдаған жанкүйерлердің ес-түсі кетті десе болады. Осы кезде Нұрмахан өзіне лайықты батыр деген атты тағы да дәлелдеді. Ал үшінші орын үшін кездесуде Қазақстан-2 құ­рамасы Корея балуандарын 5:2 есебімен ұтты. Біздің командада Нұрбақыт Теңіз­баев (60 кг.), Айбек Еңсеханов (66 кг.), Әсет Әділов (74 кг.), Жанарбек Қаб­долов (84 кг.), Есенгелді Жалғасбаев (120 кг.) жеңіске жетсе, Бекжан Мырзалиев (55 кг.) пен Жасұлан Сыдықов (96 кг.) есе жіберді. Сөйтіп, қола жүлдені иеленген екін­ші құрамамызға 10 мың АҚШ дол­лары, екінші орындағы Венгрияға 15 мың АҚШ доллары, ал бас жүлдені жеңген Қазақ­стан-1 командасына 25 мың АҚШ дол­лары табыс етілді. Ал қалған коман­даларға 5 мың АҚШ долларынан тара­тылды. Осы турнирде қазақ балуандары тек біздің екі құрамамызда ғана емес, шетел командаларының сапында да өнер көр­сетті. Мысалы, Қытай құрамасында Ғы­лым­бек Қанапияұлы, Есжан Мұхтаржан белдессе, Беларусь сапында бір жылдан бері осы елдің азаматтығын алған Ербол Қалабаев күш сынасты. Ол білікті бапкер Сапуновтан тәлім алған көрінеді. Тағы бір айтатын нәрсе, турнирге халықаралық күрес қауымдастығының президенті Ра­фаэль Мартинетти мырза да келген бо­латын. Ол осы мүмкіндікті пайдаланып, еліміз күресін өркендетуге қосқан үлесі үшін бір топ азаматтарға FILA орденін табыс етті. Сөйтіп, FILA-ның «Алтын» ор­дені Туризм және спорт министрі Тал­ғат Ермегияевке, Олимпиада чемпионы Жақсылық Үшкемпіров пен білікті бапкер Вадим Псаревке берілсе, «Күміс» орден еңбек сіңірген жаттықтырушы Таңат Сағындықовқа, Күрес федерациясының вице-президенті Рая Үдербаева мен бапкер Мұхтар Абдулинге табыс етілді. Ал «Самұрық-Қазына – Астана» қорының бас директоры, даңқты балуан Дәулет Тұр­лыхановты Рафаэль Мартинетти құр­мет пен достықтың белгісі ретінде FILA-ның төс белгісімен марапаттады. Дастан КЕНЖАЛИН.