Санитарлық авиацияны үйлестіру орталығы ашылды

Өткен сенбіде Премьер-Министр Кәрім Мәсімовтың қатысуымен Ұлттық меди­ци­на­лық холдинг базасында рес­публикалық санитарлық авиа­цияны үйлестіру орталы­ғы­ның таныстырылымы бо­лып өтті. Оған төрт министр қатысып, арнайы бұйрыққа қол қойды. Мемлекет басшысы Н.На­зар­баевтың тапсырмасына сәйкес, халықтың денсаулығын нығайту бағытында көптеген іс-шаралар жүзеге асырылуда. Соның бірі елдегі Денсаулық сақтау сала­сын дамытудың 2011-2015 жыл­дарға арналған «Саламатты Қа­зақ­стан» мемлекеттік бағдарламасы. Осы бағдарлама аясында медици­налық көлік авиациясын дамыту есебінен еліміздің алыс және бару жолы қиын аудандарында тұра­тын халыққа көрсетілетін меди­ци­налық көмекті сапалық жаңа деңгейге көтеру ісі төрт жылдық бағдарламаның алғашқы жылын­да-ақ өз нәтижесін беріп отыр. Ол үшін республикалық бюджет қа­ра­жаты есебінен 50 жыл­жымалы медициналық кешен (оның 11-і қазіргі уақытта тұрғындарға консультативтік кеңес беруде), 16 тік­ұшақ сатып алу, 3 пойыз-ем­ха­наны іске қосу жөнінде шешім қабыл­данған. Жылжымалы ме­дициналық көмек аясында «Жәр­дем», «Ден­сау­лық» пойыздарының еліміздің шалғай аймақтары тұрғындарына жоғары медициналық көмек көр­сетуінің маңызы зор. Елбасының тапсырмасын орын­­дау мақсатында Астана қала­сын­да­ғы Ұлттық медици­налық холдинг базасында республикалық сани­тар­лық авиацияны үйлестіру орта­лығының таныстырылымына Денсаулық сақтау министрі С.Қа­йырбекова,  Ішкі істер министрі Қ.Қасымов, Төтенше жағдайлар министрі В.Божко, сондай-ақ, Кө­лік және коммуникация министрі Б.Қамалиев қатысты. Кездесу барысында аталған төрт министрлік  жол апаты кезінде алғашқы медициналық көмек көрсету үшін бірігіп жұмыс істеу негізіндегі бұйрыққа қол қойды. Санитарлық авиацияны дамытудағы басты мақсат – республикалық және об­лы­стық маңызы бар трассаларда жол-көлік апаттары кезінде зардап шеккендерге шұғыл меди­ци­налық көмек көрсету. Бұл ретте, Денсаулық сақтау министрлігі зардап шеккендерге медициналық көмек көрсетсе, Төтенше жағ­дайлар министрлігі қажет болған жағдайда дәрігерлерді тікұшақ­пен қамтамасыз етіп, оқиға орны­нан зардап шеккен адамды жедел түрде облыстық немесе респуб­ликалық маңызы бар аурухана­ларға жеткізбек. Ал, Ішкі істер және Көлік және коммуникация министрліктері оқиға орын алған трассаларда жол қоз­ғалысы қауіп­сіз­дігін қамтама­сыз етпек. Сон­дай-ақ, Қазақстанның барлық ай­мақтарындағы жол-көлік оқиға­лары туралы ақпарат санитарлық авиациалық орта­лық­қа келіп түс­пек. Ақпарат келіп түскен жағ­дайда, оқиға ор­нына жақын маң­дағы меди­ци­налық көмек бри­гадасы жіберіледі. Тағы бір ескерте кететін жәйт, республикалық санитарлық авиа­цияны үйлестіру орталығы шілде айының аяғында толығымен іске қосылмақ. Жұлдыз БАЙДІЛДА.