Көк Есілге аққудайын қонып, қос қанатын құлаштай жайған ару Астана Елбасының ұлы арманының, жасампаз еңбегінің жемісі. Ол күннен күнге құлпырып, ХХІ ғасырдың әсем қалаларының біріне айналуда десек, Президенттің арнайы Жарлығымен 2000 жылы осы қалада дүниеге келген Күләш Байсейітова атындағы Ұлттық опера және балет театры бүгінде қанаты қатайған іргелі өнер ордасына айналды.
Иә, республикамыздағы ең жас музыкалық театр небәрі 10 жыл ішінде еліміздің маңдайалды өнер ұжымының бірегейіне айналғанын үлкен мақтаныш сезіммен айтуымызға болады. Ұлттық театр өз жұмысының көркемдік-кәсібилік деңгейін бұл саладағы әлемнің өркениетті деген елдері театрларының терезесімен тең етті, халықаралық бәсекелестік ортада қашанда алдыңғы қатардан көрініп келеді. Бұл – феноменді құбылыс Мемлекет басшысының өнерге деген шынайы қамқорлығының арқасында жүзеге асуда.
Міне, дені жастардан тұратын осы театр ұжымы Алматыда болып, ондағы жұртшылық назарына бес сахналық қойылымды ұсынды. Атап айтқанда, Алмас Серкебаевтың «Астана» мюзиклі, Әділ Бестібаевтің «Бәйтерек», Левенсхольдтің «Сильфида», Л.Минкустің «Баядерка» балеттері, Дж.Пуччинидің «Богема» және «Манон Леско» опералары. Бұл К.Байсейітова атындағы опера театры тарихында Алматы қаласына барған үшінші гастрольдік сапары.
Бір айта кететін жайт, барлық қойылымдар толық аншлагпен өтіп, театр әншілерінің, бишілерінің, оркестр және хор әртістерінің өнері Алматы көрермендерінің биік талғамынан шыққанына куә болдық. Ұлттық опера театрының барлық шығармашылық-техникалық топтары мен қызметкерлері домбыраның қос шегіндей үндестікте қызмет жасап, көрерменнің зор ықыласына ие болды. Бұдан театр ұжымында шығармашылық-кәсібилік талаптардың биік деңгейде екені танылды.
Құрамында 400-ден аса адамы бар опера театрының Алматыға баруына жағдай жасап, ондағы жұртшылыққа отандық және озық классикалық туындыларды көрсету – мол көлемдегі қаржыны талап ететін шаруа. Бұл тұрғыда биік өнерді дамытуға бар көмегін беріп келе жатқан Мәдениет министрлігінің нәтижелі жұмысын ерекше атағанымыз жөн. Әсіресе, осы министрліктің соңғы жылдары арнайы қаржы бөліп, музыка және драматургия салалары бойынша «Тәуелсіздік толғауы» республикалық конкурсын өткізіп келе жатуы өнерге деген шынайы қамқорлықтың белгісі.
Министрліктің осындай келелі істерінің арқасында көптеген талантты туындылар дүниеге келді. Қуаныштысы сол, жеңімпаз атанған туындылар республиканың жетекші театрлары мен концерттік ұйымдарының сахнасында қойылды. Бұған отандық композиторлар Алмас Серкебаевтың «Астана» мюзиклі, Әділ Бестібаевтің «Бәйтерек» балеті айғақ. Аталған туындылар талғамы биік Алматы көрермендерінің көңілінен шыққаны осының дәлелі деп білеміз. Бұл туындыларды әлемнің ең беделді сахналарынан ұялмай көрсетуге болады.
Кілең талантты жас өнерпаздарды биік шығармашылық мақсатқа жұмылдырып, бір жеңнен – қол, бір жағадан – бас шығарған Қазақстанның еңбек сіңірген қайраткері, театр директоры Төлеубек Әлпиев бастаған ұйымдастырушылық-шығармашылық топтың жемісті еңбегін де айта кеткеніміз жөн.
Ақордалы Астананың белді де белгілі музыкалық мәдени ошақтарының бірі К.Байсейітова атындағы Ұлттық опера және балет театрының Қазақстан тәуелсіздігінің 20 жылдығына арналған гастрольдік сапары Елбасының «Мәдениеті өскен ел-өркениетке көшкен ел» деген қанатты сөзінің айқын көрінісі.
Жоламан ТҰРСЫНБАЕВ, композитор, Қазақстанның еңбек сіңірген қайраткері.