Соңғы жылдары қуаңшылықтың зардабын шеккен шаруа адамы қашан жаз ортасы болғанша күпті көңілде жүргені шындық. Ылғалды көктем жаңбырлы жазға ұласқанда ғана көңілін демдеп, табиғат берген мол ырыздықты жеткілікті жинап алудың қам-қарекетіне білек сыбанып кіріскен-ді. Қолдағы малға қажетті жем-шөпті жинап алудың өзі күшке түскен өткен жылдың ащы сабағын ұмыта қоймаған ауылдықтар шөп пісіп-жетілісімен шабындыққа шалғы салды. Өңірді тегіс қамтыған жауын-шашынның молдығынан құмақтың, сай-саланың, қойнау-қолаттың шөбі биыл айтарлықтай қою да биік болып өсті. Сондықтан да болар мал азығын дайындау жұмыстары алғашқы күннен қарқын алып, пішеншілердің еңбегі өнікті болды.
Бұған облыста мал азығын дайындаудың екпінді екі айлығы жариялануы да кәдімгідей серпін берді.Үстіміздегі жылдың 13 маусымы мен 7 тамызы аралығындағы екпінді екі айлық кезінде облыста 1,5 миллион тонна пішен дайындау көзделуде. Әр ауданға екпінді айлық кезінде дайындауы тиіс пішен мөлшері белгіленіп, нақты тапсырма берілді. Тапсырманы орындауына қарай ақшалай сыйлық та белгіленді. Мұның өзі екіжақты тиімділікті түсінген пішеншілерді ыждағатты қимылдауға ықпал етті. Облыс пішеншілері үстіміздегі жылдың 10 шілдесіне 806,6 мың тонна мал азығын дайындап үлгерді. Бұл тапсырманың 53,8 пайызы орындалды деген сөз. Мал азығын дайындау жұмыстарын ұтырлы ұйымдастырған Әйтеке би, Қобда және Ойыл аудандарының көрсеткіштері бұдан да жоғары.
Екпінді екі айлықтың екі аптасының тапсырмаларын барлық аудандар асыра орындауға қол жеткізді. Көш басындағы Қобда ауданы екі апталықтың тапсырмасын 124 пайыз орындаса, Ойыл ауданы 118,6 пайыз, Ақтөбе қаласы 114 пайыз жүзеге асырды. Қобда ауданында 164 шөп бригадасы жұмыс істейді. Мұнда науқандық жұмысқа 270 шөп шабатын агрегат, мыңға жуық адам жұмылдырылған. Аудандағы мал ұстайтын 4284 жеке қожалықтың 1200-інен астамына қазірдің өзінде қысқа жетерлік мал азығы түсірілді. Жақында Ойыл ауданының Қараой аулында болғанымызда биылғы шөптің шығымына көңіліміз толды. Ауылдықтар құмақтағы шабындықтың гектарына 10 центнерден астам түсім беріп тұрғанына, биылғы жаздың берекелі болғанына қуаныштарын жасырмады. Ауылдағы шаруа қожалықтары шөптің нәрлі кезінде қызу қимылдауға жұмылған. Шалқар аудандық ауыл шаруашылығы бөлімінің бас маманы Бауыржан Базарбаев та биылғы шабындықтың өнімділігіне тәнтілігін жасырмады.
– Жауын-шашын мол, жер іріп тұр. Шаруа адамына қысқа жетерлік мол жем-шөп қорын жасап алуға еш кедергі жоқ. Арзандатылған бағамен жанармай бөлінді. Қазіргі қарқынмен тапсырманы асыра орындаудың мүмкіндігі мол, – дейді ол.
Қазір шаруалар өздерінен артылған пішенді сатып, қаржы табуға дағдыланып алды. Шаруашылық құрылымдары, шаруа қожалықтары пішен бизнесіне құлшына кіріскен. Барлық аудандарда бұған мән бергендіктен сатымға шығарылған пішеннің бағасы да түсе бастады. Бәсеке жүрген жерде бағаның арзандауы заңдылық. Бұл пішен дайындауға өз күші жетпейтін мал ұстайтын шаруа адамына тиімді болып тұр. Яғни, мал басын көбейтудің де мүмкіндіктері молая түсуде.
Сатыбалды СӘУІРБАЙ,
Ақтөбе облысы.