Мемлекет басшысы Нұрсұлтан Назарбаев Қазақстан Республикасының Бас прокуроры Асхат Дауылбаевты қабылдады, деп хабарлады Қазақстан Республикасы Президентінің баспасөз қызметі.
Бас прокурор Президентті еліміздегі заңдылық пен құқықтық тәртіптің жай-күйі, оның тапсырмаларының орындалу барысы, сондай-ақ құқық қорғау қызметін одан әрі жетілдіру мәселелері бойынша қолданыстағы заңнамаларға түбегейлі өзгерістер енгізу бойынша жүргізіліп жатқан жұмыстар туралы хабардар етті. Сонымен қатар, А. Дауылбаев Қазақстанда үстіміздегі жылдың күз мезгілінде алғаш рет өтетін Прокурорлардың халықаралық қауымдастығының 6-шы өңірлік конференциясына әзірлік туралы баяндады.
Кездесудің қорытындысы бойынша Мемлекет басшысы заңдылық пен құқықтық тәртіпті қамтамасыз ету жұмыстарын жалғастыруды, сондай-ақ азаматтардың, шағын және орта бизнес өкілдерінің құқықтарын, мемлекет пен қоғамның мүдделерін қорғауды күшейтуді тапсырды.
* * *
Мемлекет басшысы Нұрсұлтан Назарбаев Қазақстан Республикасының Ішкі істер министрі Қалмұханбет Қасымовты қабылдады, деп хабарлады Қазақстан Республикасы Президентінің баспасөз қызметі.
Министр Президентті полицияны реформалау және ішкі істер органдары туралы заңнаманы жетілдіру жөніндегі жұмыстардың барысы туралы хабардар етті.