«Ұлы Дала елі – Тәуелсіздіктің 25 негізі» атты 25 жұлдызды күнді мерекелеу аясында Жезқазған тарихи-археологиялық мұражайы «Жұлдызды сағат» атты салтанатты кеш өткізді.
Кеш қонақтары алдымен еліміздің Тәуелсіздік жылдарындағы жетістіктеріне арналған көрмемен танысып, Ғарыштану залына экскурсия жасады. Осы жерде 25 жыл бұрын ғарышқа самғаған тұңғыш қазақ Тоқтар Әубәкіров туралы деректі әңгімелер айтылды. Сонымен қатар, құрылғанына 25 жыл толған «Ақ әжелер» фольклорлық-этнографиялық ансамбліне құрмет көрсетіліп, Тәуелсіздіктің құрдастары – №10 орта мектептің қазақ тілі мен әдебиеті пәнінің мұғалімі Жансая Сүлейменова мен тарихи-археологиялық мұражайдың қызметкері Светлана Сефербегова өмір мен еңбектегі жетістік сырларымен бөлісті. Ал мұражайдың «Аманат» театр-студиясы, Амангелді Иманов бастаған ұлт-азаттық көтерілісінің 100 жылдығына орай, көпшілік назарына «Шабуыл алдындағы түн» атты қойылымды ұсынды.
Осы шараның аясында тарихи-археологиялық мұражайдың директоры Зинаида Чумакова «Лучший из лучших» халықаралық байқауының жеңімпазы, жас әнші Райымбек Арыстановты Құрмет грамотасымен марапаттады.
«Жұлдызды сағат» кездесуіне қатысушылар ел Тәуелсіздігінің 25 жылдығына арналған деректі фильмді үлкен қызығушылықпен тамашалады. Айта кету керек, жақында Астанадағы Ұлттық музейде өткен «Үздік мұражай» республикалық байқауында Жезқазған тарихи-археологиялық мұражайы «Қалалық маңыздағы үздік мемлекеттік мұражай» деген атаққа ие болды.
«Ұлы Дала елі – Тәуелсіздіктің 25 негізі» акциясының шеңберінде Жезқазған қаласында 40-тан астам іс-шара өткізу жоспарланған. Оның ішінде жастардың түрлі шаралары, флешмобтар, байқаулар мен дебаттар, көрмелер мен дөңгелек үстелдер, тарихи-танымдық және шығармашылық кештер, спорттық сайыстар бар. Таяуда жергілікті университетте халықаралық Байқоңыров оқулары, «Мәңгілік Ел» идеясындағы Ұлытаудың тарихи мәні» ғылыми-тәжірибелік конференциясы, «Әйел. Қоғам. Дәстүр» атты әйелдер форумы, этномәдени бірлестіктердің «Ұрпаққа мақтан, дауылпаз дастан, тәуелсіз Қазақстан» фестивалі өтеді. «Жалтырбұлақ» кенішінің алтынды кендерін сілтісіздендіру мен өңдеу кешені және екі бірдей кондитерлік өндіріс те жақында осы акцияның аясында іске қосылады.
25 жұлдызды күннің соңында Жезқазған қаласының тұрғындары мен қонақтарына үлкен концерттік бағдарлама тарту етілмек.
Қайрат ӘБІЛДИНОВ,
«Егемен Қазақстан»
Қарағанды облысы,
Жезқазған қаласы