Зиялы ұрпақ –– ел ертеңі

Кеше «Нұр Отан» ХДП жанындағы Құқықтық кеңес Мәдениет министрлігімен және «Әріптес» үкіметтік емес ұйымдардың Алматы кон­федерациясымен бірлесіп, «Зиялы ұлтты қалыптастырудағы отбасының рөлі» тақырыбында республикалық дөңгелек үстел отырысын өткізді. Дөңгелек үстелдің жұмысына Президент Әкімшілігінің жауапты қыз­мет­­керлері мен Парламент депутат­тары, мемлекеттік органдардың, аза­маттық қоғам институттарының, жастар ұйым­дарының өкілдері және ғалымдар мен сарапшылар қатысты. Қазақстандық зия­лы ұлтты қалыптас­тыру бүгінгі күн­нің өзекті мәселесі ретінде алғаш рет Елбасы, «Нұр Отан» ХДП Төрағасы Нұрсұлтан Назарбаевтың 2009 жылғы қазанда Әл-Фараби атындағы ҚазҰУ-де жаса­ған жария дәрісінде көтеріліп, қоғам алдына осы міндет қойылған болатын. Отырысты осылай деп бас­таған Парламент Мәжілісінің депутаты Нұрлан Әбдіров сөзін: «Зиялы ұлтты» қалып­тастыру – XXI ғасырда қоғамды жаңғыртудың жолы, онда дамудың басты көзі креативті адам болады. Шығармашылық – бұл адамның өзін өзі жұмылдыру үдерісі, ол әркімнің өзінің рухани байлығы болуын, жеке тұлғаның даралығы мен төл қасиет­терінің болуын көздейді. Сондықтан да бағзы заманнан бүгінге дейінгі тарихи-мәдени мұраның барлық саналуандығы болашақтың рухани негізі мен қайнар көзі болып шығады, олар­ды сақтау мен толықтыру үрдісімен біздің «зиялы ұлтқа» ұмтыл­ған жолы­мыз да шын мәнінде басталып кетті деуге болады. Сондықтан зиялы ұлтты қалыптастыру сияқты жаһандық проблема туралы әңгімелесу үшін отбасы тақыры­бының таңдалуы тегін емес. Бұл ретте зиялы ұлт білім мен дағдыларды қолдану ретіндегі техно­краттық құбылыс тұрғы­сында ғана бейнеленбеуге тиіс. Ол ұлттық мәдениет ретінде танылып, ал оны қалып­тастыру біздің қоғамымыздың мақсаты болуы тиіс», деп жалғастырған еді. Шынында да, егер әлемдік озық дә­режеге жеткен мемлекеттердің тари­хы­на үңілсек, онда ел халқының зиялылық деңгейі жоғарылаған сайын сол жұрт­тың соншалықты дәрежеге көтерілгенін көруімізге болады. Ұлтты биіктерге жетелейтін игі мақсатқа жұмылмасақ, онда заманауи ғылыми жетістіктерге жетпек түгіл, өзгелер жасаған құндылық­тарды игеріп әке­туіміз де екіталай. Бұл жайында Парламент Мәжілісінің депу­таты Камал Бұрханов қынжыла сөйледі. Біздің бала­ла­рымыз тігінші, шаштараз, аспаз сияқты қызмет көрсету саласы маман­дарының оқуын оқымайды. Қазір­дің өзінде қалта­ларында 5 дипломға дейін бар жастарды кездестірдім. Алайда, олардың көпші­лігі өз маман­дықтары бо­йынша жұмыс таба ал­май­ды. Мәсе­лен, біздің елімізде 100 мың төлейміз деп «КамАЗ» көлігімен жүк таситын адам таба алмай отыр­ған кәсіпорындар бар. Есесіне, осын­­дай жұмыстардың барлығын сырт­тан келген мигранттар атқарып, өз қазына­мызды толтырар қаражат шетке ағылып жатыр, деді депутат. Дөңгелек үстел отырысында Президент Әкімшілігі Ішкі саясат бөлімі меңге­рушісінің орынбасары Әлібек Асқар, Президент жанындағы Әйел­дер ісі және отбасылық-демогра­фиялық саясат жөнін­дегі ұлттық комиссия хатшы­лығының меңгерушісі Рәшида Нәубе­това сөйлеп, шешендер қазіргі күні әлемде еңбектің жаңаша бөлінісі орын алып отырғанын, ал зияткерлік еңбек саласында, ғылыми және мәдени өнді­ріс пен қызмет көрсету саласында білім экономи­касы туындай­ты­нын айтып, адам капиталының алға шығатынына тоқталды. Қазақстан болашақтың керуеніне ілесу үшін бар күш-жігерін осы мүд­деге жұмсай алады және жұмсауға да тиіс деген пікірге тоқайласқан жұрт­шылық отырыстың аяғында ұсыным қабылдап, онда Парламентке осы мәселеге қа­тысты арнайы тыңдау өткізу қажеттігін ұсынды. Ал Үкімет­ке зиялы ұлтты қалыптас­тырудағы отбасы рөлі­нің маңыздылығын ескере отырып, осы жұмысты барынша қолдау мақса­тында қаржы бөлуді әлеумет­тік тапсы­рыс есебінен ұлғай­ту жайын қарастыру елдік іс екендігі көрсетілді. Анар ТӨЛЕУХАНҚЫЗЫ.