– Бізде әрбір екінші мектептің шатыры ескіріп кеткен, – деді білім бөлімінің бастығы Наталия Фесенко. – Сондықтан да қай мектепті қалай жөндеу керектігін директорлар жиынында анықтап отырамыз. Бір өкініштісі, жыл сайын бюджет қоржыны ұлғайса да, білім ордаларын қалпына келтіруге, жаңа оқу жылына дайындауға ақша аз бөлінеді. Осы жағы түсініксіз. Семейде көптеген мектептер өздерінің кезегін күтуге мәжбүр. Басым көпшілігінің жөндеу көрмегеніне 50-60, 90 жылдай болған. Олар шатырын жөндеуді жылдап күтуге шамалары жете ме, жоқ па, ол жағы белгісіз. Мәселен, биыл №35 мектепте ылғал салдарынан бір сыныптың төбесі құлап түсіпті. №28 мектепте төбе мен қабырғасы көгеріп, зең басып кеткен. Сондықтан да, шағын спортзалды жауып тастауға мәжбүр болған. Бұл жерде бұрындары бастауыш сынып оқушылары жаттыққан екен. – Балалардың денсаулығы үшін тұтынушылар құқығын қорғау басқармасының мамандары зеңнен көгеріп кеткен мектептерге балаларды кіргізуге тыйым салды. Бұл дұрыс. Біз білім ордаларының басшыларына демеушілермен жұмыс істеуді тапсырып отырмыз. Қоғамдық және халықаралық ұйымдармен бірлесе жұмыс істеңдер деп жатырмыз. Жапониялық «Шөп тамыры» атты жоба бойынша қаладағы кейбір мектептер ескі терезелерін пластикке айырбастап алды. Ал ауылдағы бірнеше мектептер Жапония елшілігіне жобаларын ұсынды. Және ата-аналар бірлестігімен де жұмыс істеу керек, – деді Наталия Фесенко. Алдағы уақыттарда мектептерде демеушілер атындағы кабинет ашылмақ. Бұл оларды қаржылық жағынан тартуға арналған шараның бірі болса керек. Кәсіпкер атындағы қайырымдылық бөлмесі қала мектептерінің бірінде ашылған да екен. Десек те, мұның дұрыс-бұрыстығын алдағы уақыт көрсетер. Ал әзірше Семей мектептерін жөндеуге қосымша қаржы көзі жетпей жатыр. Бұл мәселені арнайы шешу үшін облысқа өтініш жаздық, жауабын тосып отырмыз, дейді Наталия Фесенко.
Раушан НҰҒМАНБЕК
Семей
Суретті түсірген автор