Ақсу қаласы аумағына қарасты бұл ауылдың әуел бастан-ақ жолы болғандай. Ертіс өзенінің жағасында, айнала үлкенді-кішілі көлдер, үлкен жолдың бойы, бір шеті облыс орталығы, келесі шеті Ақсу қаласы, екі қаладан шыққан жолаушылар таситын автобустар Айнакөлге соқпай кетпейді. Әкіміне қарап ауылын таны. Бұрын азаматына қарап ауылын таны деуші едік, қазір ол заманға сай өзгерді. Өйткені бүкіл бір ауылдың тыныс-тіршілігі жалғыз әкімге қарап қалды. Ауыл әкімі Аманжол Жабайұлы «Егеменнің» әр санын жібермей, ұқыпты түрде оқып отырады екен. Онысы әңгіме барысында байқалып тұрды, көзі ашық, оқыған-тоқығаны мол, әр мақалаға мән беріп, өз пікірін білдіріп те қояды. Негізі осы Айнакөл ауылдық аумағына қарасты Сынтас, Көктас, Қараой деп аталатын тағы үш ауыл бар екен. Ақсу қаласы аумағына қарасты үлкенді-кішілі 33 ауыл бар. Бұл күндері оларда 28 мыңдай халық тұрады. Ауылдар өткен жылы 7,4 миллиард теңгеге ауылшаруашылық өнімдерін, атап айтқанда, 6 мың тоннадан астам ет, 27,5 мың тонна сүт, 39 миллион дана жұмыртқа өндірсе, мұның ішінде Айнакөл ауылының да үлесі бар екені сөзсіз.
Бүгінгі күні ауылда ірі қара мал, қой, жылқы бар, әр ауланың отбасында қосалқы шаруашылық бар, бұл әл-ауқаттың жақсарғаны. Жәрмеңке сайын қала халқын тамсандырып ет-май, сүт, қаймағын, құрт-ірімшігін ала жөнелетін де осы қалаға жақын орналасқан ауылдар. Ақсудың әкімі сол үшін қаладан «Ауыл» деген үлкен жәрмеңке өткізетін базар ашып қойды. Келесің де делдалсыз өнімдеріңді сата бересің. Тұрмыс жақсы. Мал өсіргеннің пайдасы осы.
Қазір Жаңа жыл алдындағы жәрмеңкеге қызу дайындалып жатырмыз. Өткен жылы 51 рет жәрмеңке өтті. Бұл – байлық, молшылық. Тіліміз тасқа. Тіпті, бұл бар ғой, кәдімгі бәсеке, әр ауыл барын салып, жарысқа түскендей болады, деп ауыл әкімі бір күліп алды. Айнакөлдің өзінде негізін жергілікті ұлт құрайтын 171 орыс, 92 украин, 12 неміс, 4 шешен ұлтының өкілдері ағайындас-туыстай болып кетіпті. Жұмыс жоқ деп екі қолды қусырып отыратындай емес, дәл қастарында түтіні будақтап Ақсудың қос бірдей алып зауыты – бірі электр энергиясын, бірі ферроқорытпа өндіреді. Содан кейін, тау баласы тауға қарап өседі демекші, үйінің ауласында ойнап жүрген ауыл баласы техникалық мамандық алып, сол зауытқа жұмысқа түскенше асығады екен.
Біздің Айнакөлдің суындай таза су жоқ шығар-ау деп ойлаймыз, КБМ де орнатып алдық, жалпы, ауыл судан таршылық көрген емес, дейді ауыл әкімі бізбен әңгімесінде. Жаз шыға ауылдан 8 табын мал өріске шығады. Онымен бірге мал шаруашылығымен айналысатын 16 шаруа қожалығы бар. Олар ауыл ішінде болып қалатын өлім-жітімде, той-томалақта, мерекелерде демеушілік жасап, көмектесіп отырады.
Міне, күз де келеді. Қысқа дайындық. Кәдімгі науқан. Тіршілік деген осы. Ауылдың ет-сүт, майы жетеді. Дастарқан мол. Зейнетақыны уақытында алады. Көмірлерін, отын-суларын дайындап ауыл халқы қысқа әлдеқашан әзірленіп алған. Бұрынғыдай біреуге масыл болып, өкімет жасап береді деген жоқ, әркім өз тыныс-тіршілігі үшін, бала-шағасының қамы үшін еңбек етуде. Облыста қабылданған «Жайлау» бағдарламасы арқылы ауыл тұрғыны Бақтыбай Қасымханов 100 қой алып, әйелі, балалары бәрі бағып, төрт түлік мал басын көбейтуге үлес қосуда. Балығын аулаймын, демаламын десе – өзен-көл қасымызда. Өткен жылға өкпе жоқ. Ауыл көшелері қоқыстан тазартылды, қоршаулары жөнделді, шамдар орнатылды.
“Жол картасы” бағдарламасының кезінде ауылдың кіреберіс жолдарына жөндеу жүргізілді. Көктас ауылындағы бастауыш мектепке телефон байланысы орнатылып, интернетке қосылды. Айнакөлдің өзінде 20 балаға арналған шағын орталық ашылды. Ауылдық дәрігерлік амбулатория автокөлікпен қамтамасыз етілді, енді Сынтасқа, Көктасқа, Қараойға баруға мүмкіндік туды, телефондандырылды, жас мамандар келді. Облыс әкімінің тапсырмасына орай дәріхана ашылды, дәрігерлік бөлімше, мәдениет үйі, мектеп бәрі де қысқа дайын, жөндеу жүргізіліпті. Биыл 7 ана «Күміс Алқа», «Алтын алқа» иегерлері атаныпты. Шоқанның досы Г.Потаниннің атын алып тұрған ауыл мектебіне келгенімізде таңқалдық, жайнап, жарқырап тұр, ұқыпты қолдардың, тәртіп пен жүйеліліктің бары байқалады. Мектеп директоры Мұрат Айдарбековтің өзі алдымыздан шықты. Кең де жарық спорт залда ауыл балалары жаттығуда. Директордың өзі спортшы, сондықтан ауыл балалары да спортқа жақын көрінеді. Мұрат пен Аманжол сияқты жігіт ағаларының және мәдениет үйінің директоры Светлана Байманқұлова апайдың туған ауылдарының тірлігін өз қолдарына алғандары, оның болашағы үшін, көркеюі үшін жанашырлықпен қызмет жасап жүргендеріне риза болып, Айнакөлдей атына заты сай ауылдарымыз көбейе берсін деп тіледік.
Фарида БЫҚАЙ.
Павлодар облысы.