Алматыда «Мемлекеттік тапсырыс-2012» акциясы аясында кеңес болып өтті. Бұл басқосуға Алматы қаласының әкімі Ахметжан Есімов және «Самұрық-Қазына» ҰӘҚ АҚ басқармасы төрағасының орынбасары Қуандық Бишімбаев қатысты. Акция аясындағы кеңесте «Самұрық-Қазына» ұлттық әл-ауқат қоры мен қалалық әкімдік арасында 2012 жылға ынтымақтастық меморандумына қол қойылды.
Алматы қаласының әкімі Ахметжан Есімовтің айтуынша, «Самұрық-Қазына» компаниясы мен қалалық әкімдік арасындағы «Мемлекеттік тапсырыс» акциясының өткізіле бастағанына биыл екі жыл толған. Көпшілікке белгілі, Мемлекет басшысы Нұрсұлтан Назарбаевтың мемлекеттік сатып алу саласында қазақстандық үлесті одан әрі ұлғайту жөніндегі тапсырмасы өз нәтижесін беріп, жоғары көрсеткіштерге қол жеткізуде.
– Шын мәнісінде, бұл бағытта бірқатар табыстарға қол жетті. Мәселен, биылғы 2011 жылдың өткен тоғыз айында Алматы қаласы кәсіпкерлері мен ұлттық компаниялар қоры арасында жалпы сомасы 566 миллиард теңгені құрайтын он жеті мыңнан астам келісімшарт жасалды. Сондай-ақ, 118 миллиард теңгенің қызметі көрсетіліп, 141 миллиард теңгенің жұмысы орындалды.
Ал, енді алдыңғы жылы, біздер бұл акцияны алғаш рет өткізгенде 118 миллиард теңгенің ғана келісімшарты жасалған болатын. Қазір оның көлемі төрт есеге дейін ұлғайып отыр. Сонымен бірге, «Самұрық-Қазына» компаниясының мемлекеттік тапсырыстарының көлемі 3,2 триллион теңгені құрауы да көп нәрседен хабар берсе керек, – дейді қала әкімі өз ойын ортаға салып.
Сөз реті келгенде атап айтарлығы, ұлттық компаниялардың сатып алудағы қазақстандық үлестің ұлғаюы, тұтастай алғанда оңтүстік астананың әлеуметтік-экономикалық көрсеткіштеріне айтарлықтай ықпал етті. Биылғы жылдың өткен он айында өнеркәсіптік өнім өндіру он бес пайызға ұлғайып, 352 миллиард теңгеден астам өнім шығарылды.
«Самұрық-Қазына» ұлттық қоры басқармасы төрағасының орынбасары Қуандық Бишімбаевтың есептеуінше, «қазақстандық үлестің уақыт өткен сайын арта түсуі – бұл стратегиялық маңызды міндет». «Самұрық-Қазына» компаниясы келер жылы да бұл бағыттағы іс-шараларды одан әрі жалғастырмақ. Бұл орайда ұзақ мерзімді келісімшарттарға, отандық өндірушілерді несиелендіруге қатысу және өзге де жобалар қолға алынбақ.
Бақыт БАЛҒАРИНА.