Мемлекет басшысының атына Оңтүстік Қазақстан облысы, Төле би ауданының бір топ жастарынан хат келді, деп хабарлады Қазақстан Республикасы Президентінің баспасөз қызметі.
Хат иелері Елбасы бастамасымен жүзеге асқан «Болашақ», «Дипломмен – ауылға», «Жұмыспен қамту-2020» мемлекеттік бағдарламалары нәтижесінде жастар шет елдерде білім алып қана қоймай, оқу бітіріп келген жас мамандардың жұмысқа орналасуына мүмкіндіктер жасалып отырғанына ризашылықтарын білдірген.
Одан әрі: «Сіздің көшбасшылығыңызбен еліміз небәрі 20 жылда дүние жүзі елдерімен терезесі тең, қуатты мемлекетке айналды. Қазақстан – бүгінде береке-бірліктің киелі мекені. Туған елдің толағай табыстары бізді зор мақтаныш сезімге бөлейді. Өңірлерде жастарға барлық қамқорлық жасалуда. Жеке кәсібін құрғандарға жаңа мүмкіндіктер ашылды. Мемлекеттің келешегі – жастар. Сіздің артқан сеніміңізді, үкілеген үмітіңізді ақтаймыз деген сенімдеміз», деп жазады хат иелері.
Елбасына деген ықыласты сезімдерін білдірген хатқа Ш.Қалдаяқов атындағы халықаралық байқаудың дипломанты Мадияр Ниязбек, облыстық байқаудың жүлдегері Ботагөз Досалиева, самбодан екі дүркін Азия чемпионы Олжа Рысбектегі, бокстан екі дүркін Азия чемпионы Қайыргелді Дәуітбек және «Шамшырақ» жастар ұйымының мүшесі Асқарбек Алиқұлов қол қойған.