Тәуелсіздігіміздің 20 жылдығына орай елордадағы «Бейбітшілік және келісім» сарайында «Тіл жанашыры» қоғамдық бірлестігінің бастамасымен және Мәдениет министрлігі Тіл комитетінің қолдауымен «Тіл жанашыры» Құрмет белгісімен марапаттау рәсімі болып өтті. Елбасы Жарлығымен бекітілген «Тілдерді қолдану мен дамыту» мемлекеттік бағдарламасы аясында ұйымдастырылып келген бұл марапатқа – руханиятымызға шынайы жанашырлық танытып, нақты ісімен қазақ тілінің көркеюіне үлес қосқан мемлекеттік қызметкерлер, қоғам қайраткерлері мен бұқаралық ақпарат өкілдері ие болып келген болатын.
Мемлекеттік тіліміздің қоғамда кеңірек насихатталуына ықпал ету мақсатында ұйымдастырылып келген бұл шара осымен үшінші мәрте өткізіліп, биылғы марапатқа оның жанашырларымен бірге өз қаражатымен қазақ тілі мен мәдениетіне қатысты шараларға демеушілік танытқан меценаттар да ие болып отыр.
Биылғы «Тіл жанашырлары» құрмет белгісімен – «Қазақстан-Заман» газетінің бас редакторы Ахмет Аляз, «Болашақ» қауымдастығының төрағасы Бауыржан Байбек, Қазақстанның еңбек сіңірген қайраткері, филология ғылымдарының докторы Намазалы Омашев, республика Жоғарғы Сотының қылмыстық істер жөніндегі қадағалау сот алқасының судьясы Әділ Құрықбаев, қазақ айтыс өнерінің ұйымдастырушысы, ақын Жүрсін Ерман, «Хабар» агенттігі АҚ басқарма төрағасы Айдос Үкібай, «Айқын» газетінің бас редакторы Нұртөре Жүсіп, «Алтын қыран» компаниялар тобының бас директоры, меценат Исламбек Салжанов, «Нәтиже» сүт фабрикасының директоры, меценат Ерлан Әшімов, «7»-телеарнаның директоры Бибігүл Жексенбай, «Қазнефтегазпром» компаниясының президенті, меценат Жәнібек Елекбаев, «Қазақстан» ҰТК-ның жүргізушісі Мая Веронская, «Алаш айнасы» газетінің бас редакторы Серік Жанболат, «Айгөлек» журналының бас редакторы Қымбат Әбілдина, «Қазақша «Википедия» қоғамдық қорының басшысы Рауан Кенжеханұлы, сазгер-әнші Марат Омаров пен «Жас қазақ» газетінің бас редакторы Қазыбек Иса марапатталды.
Берік САДЫР.