Соңғы бірер айдан бері Абай елінде біршама жарқын істер жүзеге асырылды. Оның өз жалғасын тауып отырғаны және көңіл қуантады. Айталық, ел Тәуелсіздігінің жиырма жылдық мерекесі қарсаңында ауданда бірқатар игі шаралар жүзеге асырылды. Екі мыңнан астам тұрғыны бар іргелі Саржал ауылында таза су мәселесі ұзақ жылдар бойы өз шешімін таппай келген еді. Енді, міне, «Ақбұлақ» бағдарламасы аясында мұнда жалпы ұзындығы жиырма шақырым су құбыры пайдалануға берілді. Сөйтіп, осындағы екі жүзге жуық үй таза сумен қамтамасыз етілді. Кешегі Семей атом полигонының нақ іргесіндегі ауыл үшін бұл мереке алдындағы ерекше сый болды.
Ауданда біріне бірі жалғасқан осындай айтулы оқиғаларға облыс әкімі Бердібек Сапарбаев арнайы келіп қатысты. Ол Саржал ауылындағы күніне бір мың литр қымыз өндіретін цехта да болды. Саржалдың сары қымызы жаз айларында Астанаға дейін жіберіліп жатады. Қымыз цехында он адам жұмыспен қамтамасыз етілген.
Сол күні келесі Медеу ауылында күрделі жөндеуден соң клуб үйі қатарға қосылды. Жүз орындық бұл мәдениет ордасында енді ауыл өнерпаздары өз өнерлерін одан әрі шыңдай түсуіне барынша жағдай жасалған. Мұнда бес жұмыс орны ашылды. Ал аудан орталығы Қарауылда хоккей корты ашылып, спорт модулінің іргетасы қаланды. Жалпы аумағы бір мың шаршы метрге жуық жалпы құны жүз қырық миллион теңгедей бұл спорт модулінің құрылысы келер жылдың мамыр айында пайдалануға тапсырылмақ.
Қарауылда осыдан бір ай бұрын 16 пәтерлі тұрғын үйге күрделі жөндеу жұмысы жүргізіле бастаған еді. Сол үй бір ай ішінде қатарға қосылды. Мереке қарсаңында жайлы пәтерге жайғасқан жандардың қуанышында шек болмады. Сондай-ақ, мұнда «Туған жерге тағзым» акциясы аясында 12 орындық қонақүй пайдалануға берілді. Осы орайда бұл шараның осы елдің тумасы, Л.Н.Гумилев атындағы Еуразия университетінің ректоры Ерлан Сыдықовтың демеушілігімен жүзеге асырылғанын айта кеткеніміз жөн болар.
Ұлылар еліндегі мерекелік шаралар Қарауылда Әз Тәукенің кеңесшісі болған, Қазақ елінің бірегей заңы «Жеті жарғының» жазылуына тікелей атсалысқан, Төле, Әйтеке, Қазыбек сынды үш бидің ұстазы Әнет баба ескерткішінің ашылуымен қорытындыланды. Ғұлама баба деп Шәкәрім қажы бағасын беріп кеткен би ескерткіші халықтан жиналған қаржы күшімен тұрғызылды. Ал ол мұндай құрметке әбден лайық жан еді.
Ескерткіштің ашылу салтанатында сөз сөйлеген облыс әкімі Бердібек Сапарбаев тарихсыз болашақ жоқ, ел тұтастығына еңбек сіңірген бабаларға бас иіп, құрмет көрсету біздің борышымыз дей келіп, осының бәрі ел тәуелсіздігінің, Елбасымыздың дана саясатының арқасы екендігін тілге тиек етті.
Бұдан кейін ел ағасы, шежіреші-этнограф Молдабек Жанболатұлына сөз берілді. Ол осы оқиғаға орай «Әнет баба» атты дерекке бай көлемді кітапты құрастырып шығарып әкелген екен. Кітаптың алғысөзін білікті заңгер Сұлтан Сартаев жазса, сондай-ақ мұнда ғалымдар Салық Зиманов, Манаш Қозыбаев, әдебиетші ғалым Жаңғара Дәдебаев, белгілі жазушылар Мұхтар Мағауин мен Софы Сматаевтардың Әнет баба туралы ой-пайымдары топтастырылған. Еліміз тәуелсіздікке қол жеткізгеннен бергі жерде Әнет бабаның сүйегі қасиетті Түркістандағы Қожа Ахмет Ясауи мазарында жерленгені анықталып, ондағы көктасқа есімі жазылды. Сол Түркістан қаласы мен Алматыдағы бір-бір көшеге, Семей қаласындағы қос мұнаралы мешітке аты берілді, деді М.Жанболатұлы. Ол солай дей келіп, енді Астана, Семей, Өскемен қалаларында Әнет бабаға көше аты беріліп, ескерткіші орнатылса, әділет оқу орындарына да аты берілсе, ондағы озат студенттерге баба атындағы стипендия тағайындалса, ар ілімі, құқық қорғау, ұлттық дүниетаным, салт-дәстүр үлгісін насихаттайтын орталығы ашылса деген ұсынысын жеткізді. Енді бір ширек ғасырдан соң туғанына төрт жүз толатын ғұламаға құрмет осылайша жалғасын табуы керек.
Жиынның ашылу салтанатында ескерткіш авторы, белгілі мүсінші Әскербек Сәкіжан мен баба ұрпағы, педагог-ғалым Серғазы Қалиев сөз сөйледі. Жиын соңында абыз бидің құрметіне ас беріліп, құран бағышталды.
Дәулет СЕЙСЕНҰЛЫ.
Семей.