Кеше Алматыда «Әділет» демократиялық партиясы «Қазақстан Республикасындағы жергілікті өзін өзі басқаруды дамыту» деген тақырыпта баспасөз-мәслихатын өткізді. Оған «Әділет» партиясының төрағасы Мақсұт Нәрікбаев және партия төрағасының бірінші орынбасары Төлеген Сыдық, сондай-ақ «Әділет» партиясынан депутаттыққа кандидаттар қатысты. Баспасөз мәслихаты барысында партия «Қазақстан Республикасындағы жергілікті өзін өзі басқаруды дамыту» туралы мәлімдемесін жария етті.
«Әділет» партиясы жергілікті өзін өзі басқаруды азаматтық қоғаммен, елдің әлеуметтік-экономикалық дәрежесімен тығыз байланысты көп кезеңнен тұратын үрдіс ретінде қарастыратынын атап өтті. Олардың ой-пікіріне сүйенсек, жергілікті өзін өзі басқару органдары елдің әрбір елді мекендерінде, ал қалаларда шағын аудандарда құрылуы тиіс. Ол жерлерде мұндай құрылымдар тұрғындардың мәселелерін шешіп қана қоймай, қаржы көздерін де анықтап, заң негізінде жергілікті жердің қаржы институтын қалыптастыруға мүмкіндік бермек.
«Біз парламенттік партияның бірі болсақ, онда азаматтық қоғамды қалыптастырудың тетіктерін Қазақстан Республикасының мемлекеттік және өзін өзі басқару туралы заңына, сондай-ақ осыған қатысты басқа да заң актілеріне өзгерістер енгізіп, олардың қабылдануын қолға алар едік», дейді әділеттіктер. Бұл ретте олар мемлекеттің мына мәселелерді назарға алу қажеттігін атап өтті. Мәселен, заң шығару блогы – жергілікті өзін өзі басқару органдарының өкілеттіліктерін және функцияларын белгілейтін, анықтайтын, сондай-ақ бекітетін нормативті-құқықтық актілердің жиынтығы болып есептеледі. Бұл блок аталған заңның тиімді және ұтымды қызмет жасауын қамтамасыз етуі тиіс.
Партия мәлімдемесіндегі көтерілген екінші бір мәселе – қаржы-экономикалық блогы. «Әділет» партиясы осы орайда жергілікті өзін өзі басқару органдары қаржылық жағынан биліктен тәуелсіз болған жағдайда ғана тиімді болады деп есептейді.
Баспасөз мәслихаты кезінде жергілікті өзін өзі басқару органдарының жеке-дара бюджетінің үздіксіз табыс алатын бөлігі негізінде өзін өзі басқару органдарын қаржыландыруға бағытталған ұлттық қор болуы тиіс екендігі айтылды. «Бірінші кезекте, ұлттық қорды дағдарыс жағдайында пайдалану үшін тұрақтандыру бөлімін ішкі жалпы өнімнің 15 пайызы деңгейіне дейін шектеу қажет, қалған бөлігін елдің әлеуметтік-экономикалық дамуына жұмсау керек», делінген мәлімдемеде.
Бұл күні «Әділет» партиясы жергілікті өзін өзі басқарудағы ұйымдастырушылық-құқықтық мәселесіне де назар аударды. Бұл ретте, партия Қазақстандағы жергілікті өзін өзі басқаруды дамытуды мемлекет тарапынан қолдау жөнінде ұлттық бағдарлама даярлауды жөн деп санайтындықтарын жеткізді.
Жалпы, «Әділет» демократиялық партиясы ұйымдастырған мәслихат кезінде жергілікті өзін өзі басқару туралы реформа әлеуметтік, құқықтық басым бағыттағы Қазақстанды құру мақсатын көздейтіні назарға салынды.
Ләйла ЕДІЛҚЫЗЫ.