НЕБӘРІ 7 АЙДА ЖАҢҒЫРЫП ШЫҒА КЕЛДІ
Тараз қаласындағы қаңырап тұрған төрт қабатты ғимаратты қайта қалпына келтіруге 100 миллион теңгеден астам қаржы жұмсалды. Жеті айға созылған тиянақты жөндеу жұмысынан кейін ине-жіптен жаңа шыққан бұйымдай жарқыраған жатақханада қазір 55 отбасына арналған секция бар. Әрине, бойдақтарға арналған бөлмелер де ұмыт қалмаған. Әр қабаттың өз асханасы мен тынығатын орындары да ойластырылған. Сондай-ақ, жатақханадан баспана бұйырған жас отбасылар тәй-тәй басқан бүлдіршіндеріне арналған және түрлі ойыншықтармен жарақталған кең де жылы бөлмені көргенде, тіпті қайран қалды. Олар осынау жан-жақты қамқорлық үшін айына небәрі 12 мың теңге төлеп тұратын болады. «Қазфосфат» ЖШС бас директоры Мұқаш Ескендіровтің айтуынша, қаңырап тұрған жатақхананы сапалы жөндеуден өткізіп, зауыт жұмысшыларына тарту ету мәселесі жас мамандардың көктемде өткен форумында көтерілген екен. Міне, осы ұсыныс назарға алынып, ол небәрі жеті айдың ішінде, яғни жыл аяқталмай орындалған. Көсемәлі СӘТТІБАЙҰЛЫ. Жамбыл облысы.
•
30 Желтоқсан, 2011
15 жыл қаңырап тұрған ғимарат еді...
339 рет
көрсетілді