Ұлан ауданының орталығы – Қасым Қайсенов атындағы кентте ел есінде қалатындай елеулі оқиға болды. Осы ауданның тумасы, ауған соғысының ардагері, таяуда ғана кәсіпкерлікті дамытуға қосқан ерекше үлесі үшін «Құрмет» орденімен марапатталған, алдыңғы жылы Елбасының қолынан «Парыз» сыйлығын алған Қайрат Мусин өз қаржысына соққан, ішіне 500 адам еркін сыятын еңселі мешітті жерлестеріне сыйға тартты.
Облыс әкімі Бердібек Сапарбаевтың бастамасымен осыдан екі жыл бұрын «Туған елге – тағзым» акциясы жүзеге аса бастаған. Оның мақсаты – жергілікті жерден шыққан қалталы азаматтарды кіндік қаны тамған өлкеге бастарын бұрып, мектеп, балабақша, спорт кешендері мен мешіттерді өз қаржыларына салғызу болатын. Соның нақты дәлелі емес пе, екі жылда өңір басшысының бастамасына үн қосқан елуге тарта азамат жерлестерінің алғысына бөленді. Енді, міне, Ұландағы еңселі мешіт ел игілігіне айналды.
Мешіттің ашылуына өңір басшысы Б.Сапарбаев, Ауғанстанда Қ.Мусиннің командирі болған еліміздің біртуар азаматы, «Халық Қаһарманы» Бақытжан Ертаев, Шымкент, Тараз, Семей, басқа қалалардан кәсіпкердің достары арнайы келді, қуаныштарын бірге бөлісті.
«Қайрат сияқты елінің келешегін ойлаған азаматтарға алғыстан басқа айтарымыз жоқ. Ол бұдан бұрындары да спорт, мәдениет сайыстарына демеушілік жасайтын. Бүгін құны 200 миллион теңгеден асатын мешітті жерлестеріне сыйлап тұр», деді өңір басшысы.
«Қайрат мен басқарған батальонда ерлікпен шайқасты. Қазір оның омырауында жиырмадан астам жауынгерлік наградалар бар. Жақында Елбасының Жарлығымен «Құрмет» орденімен марапатталды. Біз Ауған соғысының ардагерлері атынан Қайратқа ақбоз ат сыйлаймыз», деп Б.Ертаев кәсіпкердің иығына шапан жауып, тұлпарға мінгізді.
Оңдасын ЕЛУБАЙ.
Шығыс Қазақстан облысы.