Ленинград шайқасы ардагерінің есімін қалай қастерлесек те орынды
Үстіміздегі жылғы 27 қаңтар күні қаһарман қала – Ленинградтың фашист басқыншылары қоршауынан азат етілгеніне 68 жыл толды. Бұл күнді ТМД елдерінде үлкен қастерлі сезіммен атап өтті. Әсіресе Ресейде, оның ішінде қазіргі Санкт-Петербург, бұрынғы Ленинград қаласында қоршаудан босаған күн ежелден-ақ жалпыхалықтық, мемлекеттік деңгейде аса маңызды іс-шара ретінде, кең ауқымда аталып өтіледі.
Ленинград шайқасы ардагерінің есімін қалай қастерлесек те орынды
Үстіміздегі жылғы 27 қаңтар күні қаһарман қала – Ленинградтың фашист басқыншылары қоршауынан азат етілгеніне 68 жыл толды. Бұл күнді ТМД елдерінде үлкен қастерлі сезіммен атап өтті. Әсіресе Ресейде, оның ішінде қазіргі Санкт-Петербург, бұрынғы Ленинград қаласында қоршаудан босаған күн ежелден-ақ жалпыхалықтық, мемлекеттік деңгейде аса маңызды іс-шара ретінде, кең ауқымда аталып өтіледі.
Ленинградты жау қоршауынан азат ету күні Қазақстанда да ескерусіз қалған жоқ. Мысалы, Алматыда қоршауда болғандардың қоғамдық ұйымы бар. Осы ұйым мүшелері өткен аптада 28 гвардия-шы-панфиловшылар саябағындағы Мәңгілік алау мен «Ленинград тасына» гүл шоқтарын қойып, қоршау құрбандарын еске алды. Сондай-ақ Алматының Әуезов ауданының әкімдігі осы ауданда тұратын Ленинград соғысы ардагерлерін құттықтау жөніндегі іс-шараларға ұйытқы болып, оларға үлкен құрмет көрсетті, сый-сияпат жасады.
Қаһарман қала – Ленинград қасіреті туралы көзі қарақты адамдар тарихтан жақсы біледі. Ленинград үшін шайқас 1941 жылғы 8 қыркүйекте басталып, 1943 жылдың қаңтарына дейін созылды. Қалаға жеңіс толығымен 1944 жылдың 27 қаңтарында ғана келді. Яғни қала осы уақытқа дейін жау қоршауында болды. Ленинград халқы тұп-тура 900 күн қасірет шекті.
Осынау теңдессіз 900 күннің жыры да, сыры да ешқашан таусылмақ емес. Өліспей беріспеуді серт еткен ленинградтықтар жауға тізе бүкпей шайқасып, өшпес ерлік өнегесін көрсетті. Ұлы жырау Жамбыл Жабаев атамыздың «Ленинградтық өренім» деп тебірене, толғана жырлайтын тұсы да сол кез еді.
900 күн бойы жау қоршауында қалған Ленинград шайқасы кезінде 640 мыңнан астам адам аштықтан қырылды, жүздеген мың адам жау снарядтары мен авиабомбалардан қаза тапты, эвакуация кезінде оққа ұшқандары қаншама?!
Тарихи деректерде Ленинград қоршауы кезінде 850 мыңға жуық бейбіт тұрғын көз жұмды делінеді. Ал бұған қоршау кезінде жаумен жағаласып жүріп шейіт болған жауынгерлерді қоссаңыз, жалпы құрбандардың саны миллионның үстіне жетіп жығылатыны айтпаса да түсінікті.
Осы тақырыпқа орай біз бүгін сондай боздақтардың біреуі туралы сөз еткенді жөн көрдік. Ол – бұрынғы Қаратас, қазіргі Қазығұрт ауданындағы Қаржан ауылының тумасы, Оңтүстік өңірінен шыққан тұңғыш авиаинженер, Ленинград қоршауында бастан-аяқ болып, әскер қатарында жаумен шайқасқан жауынгер Жүніс Тасқұлұлы.
Бір өкініштісі, жергілікті мұрағаттарда ол кісі туралы тарихи деректер мүлде жоқ. Оның аты-жөні Оңтүстік Қазақстан облысында жарық көрген «Боздақтар» ескерткіш кітабына да енгізілмеген. Шымкенттегі үлкен мемориалдық ескерткіштегі тізімнен де таппайсыз. Оны айтасыз, осынау арда азаматқа тіпті өзі туып-өскен жеріндегі бес-алты көшенің атауы да бұйырмай қалған.
Бұл келеңсіздіктердің басты себебі – Ленинград шайқасына бастан-аяқ қатысушы Жүніс атамыз соғысқа өз ауылынан, өз өлкемізден шақырылмаған. Ұлы Отан соғысы басталған кезде ол кісі мүлде басқа жақта әскери борышын өтеп жүрген. Жүніс Тасқұлұлының бұл жақтағы тізімдерде жоқ болуының негізгі себебі осы ғана.
Ол кісі сонда соғыс басталғанда қай жерлерде жүрген? Жүніс атаның өмірбаяны жайлы не білеміз? Енді осы сұрақтарға жауап бере кетейік.
Жүніс Тасқұлұлы – үлкен де үлгілі отбасындағы жеті ұл баланың бірі болған. 1905 жылдың желтоқсан айында Қаржан ауылында дүниеге келген ол 1920 жылдары комсомол қатарына өткен, 1924 жылдан бастап ВКП(б) мүшесі болған.
Кеңес өкіметі орнаған жылдары жоғары жақтан әр ауылдан бір баладан оқуға жіберу жөнінде тапсырма келеді. Бұл хабардан елдің бәрі үрейі ұшып қорқып, балаларын оқуға жіберуге жүректері дауаламай тұрғанын көргенде бір үйдің екі бірдей ұлы суырылып шығып, екі ауылдың есебінен оқуға баруға бел буады. Олар – Жүніс пен оның бірге туған бауыры Үсен Тасқұловтар еді.
Ағайынды екі жігіт 1920-шы жылдардың соңында Ташкент қаласындағы Ким атындағы «ФЗУ» мектебінде білім алады. Сол тұста түскен олардың суреттері ұрпақтарының архивінде күні бүгінге дейін сақтаулы. Көненің көзіндей болған сол суреттегі оқу-білімге ұмтылған 20-21 жастағы жігіттердің жүздері ерекше жалындап, көздері от шаша қарайды.
Иә, олар бұл төңіректен шыққан тұңғыш оқымысты адамдар болатын. Бұл ешбір әсірелеусіз айтылған талассыз шындық.
Ташкенттегі «ФЗУ»-ді, яғни фабрика-зауыт училищесін, ауызекі әңгімеде «рабфак» деп аталатын оқу орнын бітіргеннен кейін ағайынды жігіттер сол деңгейде қалып қоймай, одан әрі білім алуды көздейді. Сөйтіп Үсен заңгерлік оқуды таңдаса, Жүніс авиаинженер мамандығын алуға бел буады.
Сөз реті келіп тұрғанда айта кетейік, Үсен институтты бітіргеннен кейін Ленинград қаласында бірқатар жауапты қызметтер атқарады, Ленинградта аудандық партия комитетінің хатшысы лауазымында болады. Кейіннен заң саласына ауысып, Қазақстанға қоныс аударады. Талдықорған облысының Алакөл ауданында, яғни Үшарал қаласында прокурор қызметінде жүргенде 1942 жылдың 12-қаңтарында соғысқа аттанады. Алайда, өкінішке орай, ол ағамыз соғыстан қайтып оралмады, артында үш перзенті қалды.
Әрине, мұның бәрі де өз алдына бөлек тақырып. Ал біз енді Ленинград қоршауының куәгері Жүніс ағамыздың жайына қайта оралайық.
Айрықша назар аударарлық жәйт, Жүніс ағамыз «рабфактан» кейін сол тұстағы өте сирек әрі жоғары бағаланатын мамандық бойынша Ленинград қаласындағы Азаматтық әуе флоты (ГВФ) институтына оқуға түседі. Оны 1935 жылы ойдағыдай бітіріп, авиация инженері мамандығын алып шығады.
Осы арада бір сәт ой жіберіп көріңіз. Сонау 1935 жылдары бір қиырдағы Ленинградта авиация инженері атану дегеніңіз үлкен жетістік, ерекше оқиға емес пе? Ол кезде мұндай дәрежеде білім алу түкпірдегі ауыл қазағының баласы үшін өңі түгілі түсіне де кіре бермейтін жағдай екені де рас. Егер сұм соғыс басталып кетпегенде ол кісілер әлдеқайда биіктен көрініп, халқына бұдан да зор қызмет көрсетер еді-ау деген ойға келесің.
Сонымен, Жүніс ағамыз 1935 жылы институтты бітіргеннен кейін қызыл әскер қатарына шақырылады. Әскерде Қызылтулы Балтық флотының ұшқыштар полкінде авиация инженері болып қызмет атқарады.
1940 жылы олардың әскери полкі Таллин қаласына көшіріледі. Жүніс Тасқұлұлы Ұлы Отан соғысын сол жақта қарсы алады. 1941 жылдың жазында, яғни соғыс басталған кезде Балтық флотының ұшқыштар полкі Ленинград қаласына жіберіледі. Міне, Жүністің бұдан кейінгі жауынгерлік өмірі осы қаламен тікелей байланыста өрбиді.
1941 жылдың күзінде Ленинград қаласы жау қоршауында қалған кезде алда 900 тәулікке созылатын азапты күндер күтіп тұрғанын ол кезде кім болжапты дейсіз? Жүніс ағамыз да мыңдаған ленинградтықтармен бірге барлық ауыртпашылықты бастан кешіреді. Аштықтан, суықтан, жау бомбасынан ондаған мың адам ажал құшып жатқан шақта Жүніс ағамыз да жараланып әрі ауыр науқасқа шалдығып, госпитальге түседі.
«Қырық жыл қырғын болса да ажалды өлер» деген емес пе, сондай алапат ажал апанынан аман шығу да тағдырдың тартқан сыйы шығар.
Алайда, бір өкініштісі, Жүніс ағамыз Ленинград қоршауынан айықпас дерт жапсырып шығады. Соғыстың соңғы жылдары ағамыз соғыс мүгедегі ретінде әскерден босатылады. Бұл тұста ол көптеген жауынгерлік наградалармен марапатталған.
Жүніс ағамыз соғыс басталмай тұрып-ақ отбасылы болатын. Оның жұбайы мен қызы бастапқыда Ленинград қаласында тұрған. 1942 жылы олар қоршаудағы қаладан тылға эвакуацияланған елдің қатарында Татар АССР-ін паналайды. Ал соғыс аяқталар тұста Жүніс ағамыз отбасымен табысып, 1945 жылы Ташкент қаласына оралады. Сол жылдары ол Өзбек ССР-і Ет және сүт өнеркәсібі министрлігінде министрдің орынбасары болып қызмет атқарады.
Ол кездерде оқыған, көзі ашық азаматтардың аз кезі ғой. Жүніс ағамыз дені сау, өзі аман болғанда бұдан да үлкен жауапкершілік жүгін арқалар ма еді, бірақ, әттең, ол кісінің ғұмыры ұзақ болмады. Ленинград қоршауы кезінде тапқан ауруы асқынып кетіп, ақыры дауасыз дерт дегенін істеді. 1955 жылдың тамыз айында қазіргі «Алтынтөбе» ауылында тұратын туған ағасы Омардың үйіне келген ол көп ұзамай осы жерде көз жұмады. Сонда ол 50-ге әлі толмаған екен.
Көңілге бір медеу болары, кезінде туған жерден жыраққа кетіп, оқу-білім соңында жүрген, ел-жұртының үлкен үмітін арқалап, сан түрлі қызмет атқарған, содан сұрапыл соғысқа тап болып, Отан үшін от кешуді де бастан өткерген абзал азаматқа түбінде өзі туған жердің топырағы бұйырыпты. Ол кісінің бейіті қазіргі «Алтынтөбе» ауылының шығыс тұсындағы зиратта жатыр. Жұбайы Әсия мен қызы Ғалия сол заманның өзінде оның бейітінің басына арнайы түрде алыстан әкеп құлпытас орнатқан екен. Ары өткен – бері өткенде ол құлпытас әлі күнге дейін менмұндалап көзге түседі. Содан бері арада алпыс жылға жуық уақыт өтіпті.
Жүніс ағамыздың артында жалғыз ғана тұяқ қалды. Ол – Ғалия Жүнісқызы Тасқұлова. Кезінде ол кісі ұзақ жылдар бойы өзі туып-өскен Ленинград қаласында ғұмыр кешті, сол жақта отбасылы болды, екі ұлынан бірнеше немере сүйді. Ал осыдан біраз жыл бұрын олар Израиль мемлекетіне қоныс аударды.
Асылдың сынығы, тұлпардың тұяғындай болып арда азаматтың артында қалған Ғалия Жүнісқызы алдағы ақпан айында мерейлі жетпіс бес жасқа толмақ.
«Өмір – өзен» деген осы да. Су ағады, тас қалады. Отан үшін отқа түсіп, елі үшін етігімен су кешкен ерлердің есімдері де ерекше құрметпен еске алынып, әрдайым жадымызда жаңғырып тұруға тиіс.
Иса ОМАР.
Шымкент.