Жұма, 2 наурыз 2012 7:01
Түркия мен Қазақстан арасындағы қарым-қатынасқа – 20 жыл
Түрік Республикасы мен Қазақстан Республикасы арасында дипломатиялық қарым-қатынастың орнағанына 20 жыл толып отыр. Түрік және қазақ халықтары араларындағы жер шалғайлығына және бір-бірлерінен ұзақ жылдар ажырап қалғандарына қарамастан тілдері бір, өткені мен мәдениеті ортақ екендігін ешқашан ұмытпай, әрдайым бір-біріне тілектес болып келді. Осы қасиетті құндылықтар мен ортақ тілектер қарым-қатынасымыздың негізін құрады.
Жұма, 2 наурыз 2012 7:01
Түркия мен Қазақстан арасындағы қарым-қатынасқа – 20 жыл
Түрік Республикасы мен Қазақстан Республикасы арасында дипломатиялық қарым-қатынастың орнағанына 20 жыл толып отыр. Түрік және қазақ халықтары араларындағы жер шалғайлығына және бір-бірлерінен ұзақ жылдар ажырап қалғандарына қарамастан тілдері бір, өткені мен мәдениеті ортақ екендігін ешқашан ұмытпай, әрдайым бір-біріне тілектес болып келді. Осы қасиетті құндылықтар мен ортақ тілектер қарым-қатынасымыздың негізін құрады.
Ортақ тарихымыз, мәдениетіміз, тегіміз, тіліміз бен қасиетті құндылықтарымыз елдерімізді тығыз байланыстырып тұр. Қожа Ахмет Ясауи және Мұстафа Кемал Ататүрік сынды түркі әлемінің ұлы даналары мен жетекшілері де елдеріміз бен халықтарымыздың мәңгілік мақтаныштары. Осындай достық пен туыстықтың белгісі ретінде Астана қаласының ең көрікті орындарының бірінде Түркияның негізін қалаушы Ататүрікке, Анкара қаласының ең әсем саябақтарының бірінде тәуелсіз Қазақстанның тұңғыш Президенті Нұрсұлтан Назарбаевқа ескерткіш орнатылды.
Түркия мен Қазақстан арасында жоғары деңгейлі байланыстар мен сапарлар Қазақстан тәуелсіздігін жарияламас бұрын басталды. Түрік Республикасының сол кездегі Президенті Тұрғыт Өзал 1991 жылдың наурызында Қазақстанға алғаш сапарын жасаған болатын. Осы сапар барысында Түрік Республикасы мен Қазақ Кеңестік Социалистік Республикасы арасында Достық және ынтымақтастық туралы шартқа қол қойылды. 1991 жылдың күзінде Президент Өзал Орталық Азиядағы бес республика Президентін Анкараға шақырды. Бұл шақыру бойынша алғаш болып Президент Нұрсұлтан Назарбаев 1991 жылдың қыркүйек айында Түркияға алғашқы сапарын жүзеге асырды.
Терең тарихи байланыстары бар Түркия әрдайым Қазақстанның қасынан табылды және тәуелсіздігін жариялаған күннен бастап халықаралық қоғамдастық арасында лайықты орнын алуы үшін қажетті қолдаудың бәрін көрсетті. Екі ел арасындағы бауырластықтың белгісі ретінде 1991 жылдың 16 желтоқсанында Қазақстан өз тәуелсіздігін жария еткеннен кейін екі сағат өтпей Түркия Қазақстанның тәуелсіздігін таныған алғашқы ел болды. Екі ел арасындағы жоғары деңгейлі жүздесулер кезінде Қазақстан жағының мұны әлі күнге дейін ризашылықпен еске алуы біз үшін үлкен мақтаныш.
Екі мемлекет арасындағы дипломатиялық қатынастар Түрік Республикасының сол кездегі Сыртқы істер министрі Хикмет Четиннің Қазақстанға жасаған сапары кезінде қол қойылған хаттамаға сәйкес, 1992 жылғы 2 наурызда құрылды және сол жылдың 18 сәуірінде Алматы қаласында Түрік Республикасының елшілігі ашылды. Қазақстанның Түрік Республикасындағы алғашқы Төтенше және өкілетті елшісі Қанат Саудабаев 1992 жылдың 20 мамырында өз қызметіне кірісті.
Қазақстанмен қарым-қатынасымыз жоғары деңгейге жетіп қана қоймай, Қазақ елі өңірдегі ең маңызды саяси және экономикалық әріптесімізге айналды. Елдеріміз арасында жоғары деңгейде жүзеге асырылып жатқан жиі сапарлар екі елдің қарым-қатынасын одан әрі нығайта түсуде.
Түркия мен Қазақстан арасындағы сауда-экономикалық байланыстар әртараптанып, артуын жалғастыруда. Қазақстан – Түркияның аймақтағы ең сенімді сауда-экономикалық әріптесі. 2011 жылдың аяғындағы жағдай бойынша екіжақты сауда айналымы 3,5 миллиард АҚШ долларынан асып түсті. Түрік компанияларының Қазақстандағы жалпы капиталы 2 миллиард доллар шамасында. Түркия, энергетика саласын қоспағанда, Қазақстанға инвестиция салу жағынан төртінші орынды иеленеді. Түркиялық құрылыс компаниялары жүзеге асырған жобалардың жалпы құны 15 миллиард доллардан асты. Екі елдің мемлекет басшылары, әсіресе, сауда-экономикалық, инвестиция салаларында ынтымақтастықты әртараптандыру мақсатын алға қойып отыр. Осының аясында соңғы уақыттарда қорғаныс өнеркәсібі саласында елеулі табыстарға қол жеткізілді. Түркия мен Қазақстан арасында туризм саласында да ынтымақтастық қарқынды түрде дамып келеді. 2011 жылы Түркияға келген Қазақстан азаматтарының саны 2010 жылмен салыстырғанда 28 пайызға өсіп, 316 мыңға жетті.
Білім және мәдениет салаларындағы ынтымақтастығымыз қарым-қатынасымыздың маңызды өлшемдерінің бірін құрайды. 1992 жылдан бері өткен мерзім ішінде көптеген қазақстандық студент Түркияда жоғары білім алды. Осы күнге дейін Түркияда білім нәрімен сусындаған қазақстандықтардың саны 3000-ға жетті. Түркияда және Қазақстандағы түрік университеттері мен қазақ-түрік мектептерінде оқыған және білім алып жатқан қазақ жастары, Қ.А.Ясауи атындағы қазақ-түрік университеті мен басқа да білім орындарында оқыған және оқып жатқан түрік жастары екі елдің ортақ келешегінің негізін қалайды.
Қазақстандағы түрік мәдениеті мен тіліне деген қызығушылыққа ризашылығымызды білдіреміз. Осы орайда, Түркия Президентінің 2010 жылдың мамырында Қазақстанға жасаған сапары кезінде Астана қаласында Юнус Эмре атындағы мәдениет орталығының ашылуы өте орынды болды деп есептейміз.
Түркия мен Қазақстанның өңірлік және халықаралық аренадағы ынтымақтастығы да қарқынды түрде дами түсуде. 1992 жылы Анкарада алғаш өткізілген Түркітілдес мемлекеттер басшыларының саммиті нәтижесінде екі елдің жетекшілігімен құрылып, 2010 жылғы 15-16 қыркүйек күндері Ыстамбұл қаласында жалғасын тапқан саммит шешіміне сәйкес өз жұмысын бастаған Түркітілдес елдердің ынтымақтастық кеңесін Түркия мен Қазақстанның Еуразия өңіріндегі бейбітшілік пен тұрақтылық бағытындағы ынтымақтастығының нақты жемісі деп бағалауға болады. Ынтымақтастық кеңесі алғашқы саммитін 2011 жылғы 21 қазанда Алматы қаласында өткізді. ТҮРКСОЙ халықаралық ұйымының ұсынысы бойынша Астана қаласы 2012 жылы, Эскишехир қаласы 2013 жылы Түркі әлемінің мәдени астанасы болып жарияланды.
Қазақстан Нұрсұлтан Әбішұлының ұсынысы бойынша құрылған Азиядағы өзара іс-қимыл және сенім шаралары жөніндегі кеңестің төрағалығын 2010 жылы Түркияға тапсырды. Түркия мен Қазақстан, сонымен қатар, өздері мүшелері болып табылатын Біріккен Ұлттар Ұйымы, Ислам Ынтымақтастығы Ұйымы, Еуропадағы қауіпсіздік және ынтымақтастық ұйымы және Экономикалық ынтымақтастық ұйымы секілді халықаралық ұйымдар шеңберінде де белсенді ықпалдастық үлгісін көрсетуде.
Қазақстанның Президент Нұрсұлтан Назарбаевтың көрегенді жетекшілігі арқасында тәуелсіздігін алғалы бері өткен қысқа мерзім ішінде қол жеткізген жетістіктері мен халықаралық қоғамдастық алдындағы беделін жоғары бағалаймыз. Түркия мен Қазақстан ортақ тіл, дін, тарих және мәдени құндылықтардан қуат алатын және стратегиялық әріптестік дәрежесіндегі қатынастарды барлық салада нығайта түсетін зор әлеуетке ие. Қос елде қарым-қатынасымыз бен ынтымақтастығымызды әртараптандырып, тереңдету үшін қажетті саяси ерік-жігердің бар болуы қуантарлық жәйт.
Түркия мен Қазақстан арасындағы дипломатиялық қарым-қатынастың орнағанына 20 жыл толуына орай дос және бауырлас ел – Қазақстан халқына деген құрмет сезімдерімді білдіремін.
Лале ҮЛКЕР, Түрік Республикасының Қазақстан Республикасындағы Төтенше және өкілетті елшісі.