Көрпеңе қарап көсілетін, тұрмысың мен тәбетіңді табысыңа қарай шектейтін салық саясатының халықаралық заңдылығы Қазақстанға да келді.
Ешкім сырт қала алмайды
Келер жылдан бастап елімізде жалпыхалықтық кіріс пен мүлік декларациясы басталады. 2020 жыл қыр астында тұрса да, оған дайындық кемшін сияқты. Мамандар мұның себебін «қабылданған заңға бейімделуіміздің орнына, оны айналып өтуге әдеттеніп қалғанымызбен» түсіндіріп отыр. Бірақ бұл заңның осы күнге дейін қабылданған өзге заңдарға мүлдем ұқсамайтыны сезіледі.
Науқан Қазақстанның экономикалық жағынан белсенді 13 млн азаматын, ғаламтордан нан тауып отырған 15 жастағы блогерден бастап, 90 жастағы қарияға дейінгі азаматтарды қамтиды. Себебі соңғы жылдары зейнет жасынан асып кеткен қариялардың атына құны жүздеген мың АҚШ долларына бағаланатын қымбат көліктер мен зәулім үйлердің тіркелгені туралы деректер жиі айтылады. Енді қариялар да сол байлықтың қандай табыспен келетінін дәлелдеу керек. Дәлелдей алмаса, мүліктің 10 пайызын айыппұл ретінде төлейді. Бұл туралы Кәсіпкерлерге көмек орталығының директоры Дмитрий Казанцев журналистермен кездесу кезінде айтты.
Бұл ретте сарапшылар азаматтарға қолында бар дүние-мүлігі мен қаржысын жасырмай, тегіс көрсетуге кеңес беріп отыр. Себебі «Жеке тұлғаның активтері мен міндеттемелері туралы бастапқы декларация» мемлекет үшін әрбір азаматтың дәулетінің бастауы саналады. Демек, оның неғұрлым жоғары межеде болғаны маңызды.
Қандай да бір азамат жүйеге кіру декларациясында тек қараша үйі бар екенін ғана көрсетсе, сонымен бірге банкке салмай, үйінде ұстаған адал ақшасы туралы айтудан бас тартса, алайда келесі жылы сол қаражатына бірнеше бөлмелі пәтер сатып алса, оның есігін салықшылар қағатын болады. Бұл іс қозғалып, тергеу жүруіне, ірі айыппұл салынуына соқтыруы да ғажап емес.
Бұл қадамға Үкімет жемқорлыққа жойқын соққы беру, жемқорлар қолданатын сан алуан айла-шарғылар мен қулық тізбегіне тосқауыл қою үшін барып отыр. Барлық дамыған елдерде қолданылатын тәжірибе осы.
Д.Казанцев жұртшылық арасында дүрбелең мен ұзын-сонар кезек тудырмау үшін мемлекеттік кіріс органдары декларация тапсыру уақытын бірнеше айға созғанын айтты. Декларацияны цифрлы қолтаңба көмегімен ресімдеп, интернет арқылы жолдайтын адамдар үшін аталған мерзім 15 қыркүйекке дейін ұзартылды. Бұл – халықты декларацияны электронды түрде ұсынуға ынталандыру үшін жасалыпты.
Жаппай декларациялау жүйесіне қосылудан кейінгі кезеңде, яғни 2021 жылдан бастап, қазақстандықтар мен шетелдіктер жыл сайын «Табыстар мен мүлік туралы декларация» ұсынып отыруға тиіс.
– Бірақ бұл декларация екі түрге бөлінеді. Біріншісі – кеңейтілген түрі (270.00 формасы). Кеңейтілген декларацияда азаматтың бір жыл ішінде тапқан кірістері, салықтық шегерісі, сондай-ақ жылжымайтын мүлікті, көлікті, құнды қағаздарды, қатысу үлесін, инвестициялық алтынды, туынды қаржылық құралдарды сатып алуы, ақысыз сыйға алуы немесе оларды сатуы, өзгеге тегін беруі фактілері көрсетілуге тиісті. Екіншісі – қысқа түрі (260.00 формасы). Кірістер мен мүлік туралы қысқа декларация небәрі 1 парақтан тұрады, – дейді Д.Казанцев.
Жеңілдетілген декларацияны зейнетақыдан басқа кірісі жоқ зейнеткерлер, шәкіртақыға ғана сүйенген студенттер және еңбекақысымен күн көрген жұмыскерлер тапсырады. Олар бұл құжат арқылы 1 жыл ішінде жалақыдан басқа ешқандай табыс таппағандарын растайды. Мемлекеттік кірістер комитетінің есебінше, бұл қысқа декларацияны халықтың 70 пайызға жуығы тапсырады. Бұл қатарға негізінен, мұғалімдер, зейнеткерлер, студенттер, жалдамалы жұмысшылар мен қызметкерлер жатады.
– Барлық база таза болуы үшін құзырлы мемлекеттік органдармен бірге жұмыстар атқарылуда. е-Gov.kz порталында салық төлеушінің кабинетін аштық. Түсіндіру жұмыстарына жақсылап дайындалып жатырмыз. Сонымен қатар Мемлекеттік қызмет істері жөніндегі агенттік те бізді қолдап, жалпыға бірдей декларациялау мәселелерін мемлекеттік қызметшілердің біліктілігін арттыру бағдарламасына енгізді, – деді Д.Казанцев.
Декларацияны қағаз күйінде өткізу – қауіпті
Д.Казанцев:
– 13 миллион адам декларация өткізеді. Бұл өте көп. Маман ретінде бұл декларацияны қағаз түрінде өткізбеуге кеңес берер едім. Өйткені бұл қауіпсіз. Ал күзде, соңғы сәтте 13 миллион адам электронды базаға лап қойса не болады? Әрине, база жұмысы тежеледі. Соның салдарынан қаншама адам өзінің табыс декларациясын дер уақытында өткізіп үлгермей қалады?! Сондықтан біз халыққа бұл жайт туралы алдын ала ескертіп, хабарлап жатырмыз, – дейді.
Маман осы ретте жұрттың жария етілген табыстарын сақтайтын деректер базасында блокчейн технологиясының қолданылуы мүмкін екенін айтып қалды. Бұл адам факторының қатысуынсыз жүзеге асатын соңғы жаңалық.
– Оны іске асырудың мүмкіндігі мемлекеттік деңгейде талқыланып жатыр, – дейді ол. Ал декларация дер уақытында өткізілмей қалса, азамат әкімшілік жауапкершілікке тартылуы мүмкін.
– Үлгермесе немесе толтырған құжатта шынайы ақпарат көрсетілмесе, онда ол адамға 30 айлық есептік көрсеткіш көлемінде немесе 75 750 теңге айыппұл салынады, – деді Д.Казанцев.
Той шығыны да көрсетілуге тиіс
Д.Казанцев БАҚ беттеріндегі жалған ақпараттардың жарияланып жатқанына да тоқталды. Мәселен, той немесе жаназаға жұмсалған шығын деген арнайы талап жоқ екен. Бірақ оған жұмсалған қаржы «жеке шығындар» деген тармақшада көрсетілуге тиіс. Жеке шығындарда көрсетілген қаржы көлемі табыстан асып кетсе, қаржыны қайдан алғанын түсіндіріп беруге тура келеді.
Өте бағалы сыйлық алған кезде де сыйлаушыдан мүмкіндік болса чегін сұрап алу артықтық етпейді.
– Декларацияда құны 500 мың теңгеден асатын, болашақта сатуға болатын нәрселерді көрсетуге кеңес беремін. Бұл бағалы бұйымдар, тондар, картиналар болуы мүмкін. Ал мәселен, тойдан түскен ақшалай сыйлықты декларациядағы «тағы басқа» деген тарауға толтыруға болады. Өте бағалы сыйлық алсаңыз, онда сыйлаушыдан мүмкіндік болса, чегін сұрап алуға кеңес берер едім, – дейді сарапшы.
Тағы бір айта кетерлігі, азаматтар банк картасы арқылы жөн-жосықсыз ақша аударымын жасай алмайды. Мұның неге апарып соғарын былай түсіндіруге болады. Досыңыз немесе бауырыңыз «картаңнан ақша аудартып ала қояйын» деді делік. Егер ол үлкен сома болса, жағдай қиын. Өйткені салықшыға сіз оның қандай ақша екенін дәлелдей алмайсыз. Біреу картаңызды пайдаланып, 1 миллион теңге жөнелтті делік. Сол 1 миллион теңгенің салығы сізден алынатын болады, себебі ол декларацияланбаған.
Кірісті жасыру мүмкін емес
Талап қою мерзімі – 2020 жылдан бастап 3 жыл. Демек, 2023 жылы салық мекемесі сізге 2022, 2021, 2020 жылдар бойынша декларацияланбаған табыс пен мүлік бойынша кінәрат таға алады.
Экономист Айдар Әлібаевтың айтуынша, Қазақстанда шетел тәжірибесіне сүйеніп жасалған реформалар мен идеялар әбден пысықталмай жатып жүзеге асығыс асырылады. Бұл – шенеуніктердің қателігі. Декларация тапсырған әрбір азамат сонда көрсетілген кіріс пен шығындарын анық көрсетіп, оның бір-біріне сәйкес болуын қадағалауы керек. Өйткені біздің елде кей шенеуніктердің шығындары заңды табысынан артық.
– Қаржы мәселесіне қатысты көптеген сұрақтар дәл декларация тапсырған кезде туындауы мүмкін. Сол кезде мемлекеттік қызметте отырғандар ол сұрақтарға жауап бере алмасы анық. Бұл талап осы себептен әлі енгізілмей отыр. Бізде жұмыссыздар мен өзін өзі жұмыспен қамтушылар көп. Олар қай табыстарын көрсетеді?! Декларация тапсыруға оларды қалай мәжбүрлейді?! Салық органдары қызметкерлерінің біліктілігі өте төмен. Олар бір мезгілде миллиондаған адамның декларациясын қабылдай алмайды. Ал оларды дайындауға бірталай қаражат пен уақыт керек. Ауылдық жерлердің көбі интернетке қосылмаған, – дейді А.Әлібаев.
Мамандар табыс декларациясын тапсыру кезінде жұмыссыздар саны нақтылана түсетінін айтады.
– Тағы бір мәселе, табысы аз адамдарды алаңдатып, жеке тұлғаларды кірістерін декларациялауға міндеттеудің қажеті жоқ. Сондай-ақ жұмыс берушілердің жеке табыс салығын, зейнетақы аударымдарын төлеуі арқылы барлық тұрғындардың кірісі туралы мәліметтер алудың басқа да тәсілдерінің бар екенін ескерген жөн, – дейді экономист.
Салық органдары мамандарының бәрі бірдей бұл шараға дайын емес екенін Д.Казанцев те мойындайды. Олар заңның қабылдануын күтіп, ұйықтап отыр. Оны іске асыратын салық органдары қызметкерлерінің басым көпшілігінің біліктілігі сын көтермейді.
Мамандардың пайымдауынша, табыс салығын жариялауға қоғамның өзі мүдделі болуы керек. Бізде ауқатты адамдар мен табысы өте төмендердің арасы тым алыстап кетті. Бұл әлеуметтік наразылықты туғызады. Сондықтан жемқорлықтан ада, таза қоғамның қалыптасуына бәріміз бірдей мүдделі болуымыз керек. Бұрын қоғамның қаржылық сауаттылық деңгейі туралы көбірек айтсақ, енді салық мәдениеті, салық сауаттылығы туралы айтуға тура келеді.
Гүлбаршын САБАЕВА,
«Egemen Qazaqstan»
АЛМАТЫ