Келешекте халықаралық аренада ел намысын қорғайтын мықты спортшы болуды армандаған Шыңғыс 2003 жылы Алматыға келіп, Қазақтың көлік және коммуникация академиясына оқуға түседі. Сол жерде жүріп, әуелде муай-таймен шұғылданды. Одан кейін джиу-джитсуға аңсары ауды. Өзіне таңсық өнер үйірмесінің табалдырығын аттағанына небәрі екі апта болғанына қарамастан, ел құрамасын жаттықтырып жүрген Қанат Тілеуімбетов пен Мейіржан Қашағанов сынды майталман мамандар бойына күш-қуаты сыймай, жалындап тұрған тұлғалы жігітті Қазақстан чемпионатына қатыстыруды құп көрді.
– Бокс пен муай-тай мектебінен өткендіктен аяқ және қолмен жақсы соққылар жасау маған еш қиындық туғызған жоқ, – деп бастады өз әңгімесін Шыңғыс Қасымов. – Тек күрес жағы ғана ақсап тұрды. Соған қарамастан Павлодардағы жарыста қос қарсыласымды жеңіп, жартылай финалда ұтылдым. Нәтижесінде ел біріншілігінде қола медальды иелендім. Қысқа ғана мерзім аралығында қол жеткізген бұл табыс мені қанаттандырды. Джиу-джитсуға деген құштарлығымды оятты. Осы спорт түрінің қыр-сырына әбден қанығып, шеберлігімді шарықтау шегіне жеткенше шыңдау үшін жаттығу залында аянбай тер төктім. Ерен еңбек еш кеткен жоқ. Бірте-бірте биік белестерді бірінен кейін бірін бағындыра бастадым.
Расында да, содан кейінгі кезеңдер Шыңғыс үшін толағай табыстарға толы болды. Атап айтсақ, қазақтың қайсар ұлы 2005-2013 жылдар аралығында өткен елішілік жарыстарда алтын тұғырдан төмендеген жоқ. Ауыр және аса ауыр салмақ дәрежесінде күш сынасқан ол Қазақстан чемпионатында барлығы 8 рет топ жарып, ел кубогын сан мәрте олжалады. Үш реттен әлем және Азия чемпионы атанып, әлем кубогында екі мәрте топ жарды. Қарт құрлықта өткен дүбірлі додалардың барлығын тегістей ұтып шықты. Осы жеңістерінің арқасында ол жауынгерлік джиу-джитсудан Қазақстанға еңбек сіңірген спорт шебері атанды. Қасымовқа дейін ондай атақ осы спорт түрін серік еткен бірде-бір отандасымызға бұйырған жоқ еді.
– Жауынгерлік джиу-джитсу Олимпиада бағдарламасына енбегендіктен, біздер үшін ең үлкен мансап – әлем чемпионы атану. Алланың қалауымен айтулы жарыста үш мәрте топ жару бақыты бұйырды. 2011 жылы Днепропетровскіде үш кездесуде де айқын басымдықпен жеңіске қол жеткізіп, Қазақстан спортшылары арасынан ересектер дуында алғашқы болып әлем чемпионы атандым. 2012 жылғы жарыс Киевте ұйымдастырылды. Дүниежүзілік жауынгерлік өнер фестивалі аясында өткен дүбірлі додада да асығым алшысынан түсіп, айдарымнан жел есті. Соңғы рет 2013 жылы Польшаның Краков қаласында жалауы желбіреген жарыста да бабым мен бағым қатар шауып, үшінші рет төрткүл дүниенің теңдессізі атандым. Осы жеңістерімнің әрқайсысы мен үшін ерекше қымбат. Себебі сол табыстардың барлығы да маңдай тер және ерен еңбек арқылы келді, – дейді кейіпкеріміз.
Жауынгерлік джиу-джитсудан бөлек Шыңғыс Қасымов жекпе-жек өнерінің басқа да түрлерінен елеулі табыстарға қол жеткізді. Мәселен, қоян-қолтық айқастан ел чемпионы атанып, спорт шеберінің күміс белгісін кеудесіне тақты. Құқыққорғаушылар арасында үздіксіз өтіп тұратын дәстүрлі жарыстарда осы өр мінезді, соққысы ауыр, рухы биік жігіттің жасындай жарқырағанын жанкүйерлер ұмыта қойған жоқ.2009 жылы Президенттің күзет қызметкерлері арасында Ақтөбеде өткен ел біріншілігінің ақтық сайысында сақа спортшы Антон Аманбаевтан 0:4 есебімен ұтылып жатып, ақырында айқын басымдықпен жеңіске жеткені де есімізде. Сол кезде спорт кешеніне жиналған барша көрермен Қасымовтың қайсарлығына сүйсінген еді. Сонымен қатар біздің кейіпкеріміздің жолы еліміздің танымал спортшысы, ережесіз жекпе-жектен бірқатар халықаралық турнирлерде топ жарған апайтөс Шахмарал Жетпісовпен түрлі жарыстарда екі мәрте қиысқан екен. Бұл бәсекенің екеуі де Шыңғыстың күмәнсіз жеңісімен аяқталды.
27 жастан асқан шағында джиу-джитсумен қош айтысқан Шыңғыс Қасымов бәрібір де үлкен спорттан алыстап кете алмады. Алматыдағы екі бірдей іргелі оқу орындарын ойдағыдай тәмамдап, инженер және заңгер мамандығының дипломын алды. Үйленіп, отбасылы болды. Бұл күндері қазақтың нар тұлғалы азаматы бразилиялық джиу-джитсуға мықтап ден қойды. Енді ол осы спорт түрі бойынша биік белестерді бағындырып, әлемдік додаларда топ жаруды көздейді.