Соңғы үш айда Үкімет адам капиталын дамытудың жалпы стратегиясы аясында үш негізгі құжатты қабылдады. Бірінші құжат адам капиталын дамытудың жалпы стратегиясының бөлігі ретінде еңбек заңнамасына өзгертулер енгізу бойынша бірқатар түзетулерді қамтиды. Осы стратегияда қарастырылған шаралардың бірі еңбек қатынастарын формализациялауға бағытталған. 2020 жылға қарай «Электрондық еңбек келісімшарттары» ақпараттық жүйесі іске қосылады деп болжануда.
А. Сарбасовтың айтуынша, 17 мыңға жуық жұмыс беруші аталған пилоттық жобаға қосылған. 700 мыңнан астам электронды еңбек келісімшарты электронды жүйеге енгізілген.
«Бұл жұмыстың түпкі мақсаты – азаматтарымыздың еңбек қатынастарына қатысуын арттыру. Осы жүйе арқылы біз қанша азамат еңбек қатынастарымен қамтылғанын, олардың еңбек қызметтерінің қандай екенін, жұмыс уақытының режимі қандай екенін көретін боламыз. Бұл шаралар бізге белгіленген көрсеткіштерге, соның ішінде жұмыс орындарын ашу индикаторларына тиімдірек қол жеткізуге мүмкіндік береді», деді вице-министр.
Екінші құжат қызметкерлерге тиісті еңбек жағдайларын жасауға әкімшілік жауапкершілікті күшейтуді қарастырады. А. Сарбасовтың айтуынша, бүгінде жалақы төлеуде тең жағдайлар жасау үшін жауапкершілік қойылған. Барлық басқа еңбек жағдайлары үшін мұндай жауапкершілік жоқ.
ҚР Еңбек және халықты әлеуметтік қорғау министрлігі аталған әкімшілік құқықбұзушылықтың құрамын нақтылау бойынша жұмыстар жүргізуді жоспарлап отыр. Қабылданған шаралар жұмыс берушілерді, ең алдымен шетелдік жұмыс күшін тартатын компанияларды тиімді мемлекеттік бақылауға мүмкіндік беруі керек. Тамыз айында осындай кәсіпорындарға талдау жасалады. Ұлттық еңбек нарығын қорғауға бағытталған тиісті шешім қабылданады.
Үшінші құжат аясында Министрлік еліміздің жалдамалы жұмысшыларының жартысынан көбін қамтитын кәсіподақтармен жұмысты күшейтуді жоспарлап отыр.
«Біз жұмысшылардың еңбек құқықтарын қорғаудың тиімділігін арттыруға бағытталған заң жобасы аясында бірқатар шараларды ұсынамыз. Онда қауіпсіз еңбек жағдайларын жасау шаралары, денсаулықты қамтамасыз ету және өмірді сақтау мәселелері қарастырылған», деді А. Сарбасов.
Соңғы үш жылда Қазақстанда өндірістік жарақаттану 7 пайызға төмендегені айтылды. Кәсіптік сын-тегеуріндерді азайту жөніндегі жұмыс жалғасады.
А. Сарбасов, сондай-ақ, осы жылдың мамыр айында ұжымдық еңбек дауларын, еңбек жанжалдары деп аталатын жағдайлардың алдын алуға бағытталған іс-шаралар жоспары қабылданғанын хабарлады. Жоспарда мемлекеттік органдар, жұмыс берушілер және кәсіподақтар арасындағы іс-қимылдардың нақты алгоритмі қарастырылған. Осы шараларды іске асыру аясында жұмыс берушілер мен қызметкерлер арасындағы өзара әрекеттесу рейтингі жоғарылайды деп күтілуде.