Әлеуметтік сақтандырудың әлеуеті айқындалды

Оған қазақстандық сарап­шы­лар мен әлеуметтік қыз­мет­керлер, Ресей, Грузия, Әзер­бай­жан, Қырғызстан және Тәжік­стан елдерінің аталған сала маман­дары қатысты. Сондай-ақ Президент Әкімшілігінің өкіл­де­рі, Парламент депутаттары, Бірыңғай жинақтаушы зейнетақы қоры, Әлеуметтік медициналық сақтандыру қоры мен мемлекеттік аннуитеттік компанияның және Астана халықаралық қаржы орта­лы­ғының өкілдері арнайы ат басын бұрды.

– Бұл диалог алаңы сарап­шы­лар­ға әлеуметтік қауіпсіздікке қатысты өзекті мәселелерді талқылауға мүмкіндік береді. Сондықтан семинардың басты мақсаты – халықты әлеуметтік қорғау саласында талғамды тәжірибе алмасу деп санаймын. Өзекті тақырыптар төңірегінде жасалған баяндамалар еліміздегі әлеуметтік қамсыздандыру инс­ти­туттарының тәжірибесіне сер­пін береді деп сенемін, – деді Еңбек және халықты әлеуметтік қорғау вице-министрі Ақмәди Сарбасов.

Президент Қасым-Жомарт Тоқаевтың «Сындарлы қоғамдық диалог – Қазақстанның тұрақ­ты­лығы мен өркендеуінің негізі» атты Қазақстан халқына Жол­дауындағы маңызды бағыт­тар­дың бірі де осы әлеуметтік жаңғырудың жаңа кезеңі. Яғни жаңғырудың жаңа кезеңі жаңа бастамалар мен тың бағыттарды мұрат етпек. Бұл ретте, семинар жұмысынан күтілетін нәтижелер турасында Мемлекеттік әлеу­мет­тік сақтандыру қорының әлеу­метпен қарым-қатынас депар­та­мен­тінің директоры Гүлбағила Болатбекова:

– Елімізде 2011 жылдан бастап қазанның соңғы демалысы әлеуметтік сала қызметкерлерінің кәсіби мерекесі ретінде бекі­тіл­ген. Сондықтан бұл семи­нар­дың қарашаның басында ұйымдастырылуы заңды. Жалпы жаһандану дәуірінде әлеуметтік саланың алар орны айшықты дер едім. Себебі халықтың әл-ауқатын жақсарту мәселесі қай мемлекеттің болсын күн тәртібінен түскен емес. Сол себепті бүгінгі семинарда пікірталас, тәжірибе алмасу арқылы міндетті әлеуметтік сақтандыруды дамыту жолдарын жан-жақты талқылайтын боламыз. Шет мемлекеттерден келген сарапшылар Қазақ­с­тан­дағы әлеуметтік салаға зор қызығушылық танытып отыр, – деді.

Кеңес Одағы ыдыраған тұс­та тәуелсіз еліміз өзінің дара әлеуметтік саласын қалып­тас­­тырды. Сондағы даралық – көп­деңгейлікте. Яғни мемлекет, жұмыс беруші және жұмыс­кер арасындағы жекелеген жауапкершілік айқындалды. Отандық әлеуметтік саланың озық үлгі­сі турасында халықаралық әлеу­­­­­меттік қамсыздандыру қа­уым­­­дастығының Еуразия айма­ғын­­­­дағы үйлестірушісі Дмитрий Ка­расев:

– Бүгінде Қазақстан халық­ара­лық қауымдастықта зор беделге ие. Бұған себеп – әлеу­мет­тік сақтандыру жүйесінің тұрақты жолға қойылғандығы дер едім. Себебі кей мемлекеттерде әлеуметтік сақтандыру тұрғындар санының небәрі 10-20%-ын қамтыған. Ал сіздердің елдеріңізде әлеу­мет­тік сақтандыру саласы маман­да­рының назарынан тыс қалған азаматтар кемде-кем. Бұл – үлкен жетістік, – деді.

Семинар жұмысы аясында ұйымдастырылған екі панелді сессияның алғашқысы әлеуметтік сақтандыруды дамыту тәсілдерін енгізуге негізделсе, кейінгісінде қатысушылар аталған сала­ның қаржылық ағымын шоғыр­ландыру мәселесіне тоқталды. Шет мемлекеттерден келген қонақтар тәжірибесімен бөлісіп, ортаға орамды ой тастады.

Рауан ҚАБИДОЛДА