Айдынды Алакөлдің Шығыс Қазақстан аумағындағы бөлігінде 13 маусымда туристік маусым ашылып, демалыс үйлері біртіндеп жұмыс істей бастады. Иә, біртіндеп деп бекерге айтып отырғанымыз жоқ. Әлемде және елімізде қалыптасқан ахуалға байланысты биыл Алакөлде демалушыларға да, демалыс орындарының иелеріне де талап күшейіп, қауіпсіздікке баса мән беріліп отыр. Өйткені жағалаудағы демалыс орындары мен шомылатын аймақтар бір-біріне жақын орналасқандықтан вирус жұқтыру қаупі жоғары. Сондықтан да облыс басшылығы Алакөлге асыққан туристерден бірінші кезекте коронавирусқа тест тапсырып, соның нәтижесімен келуді өтініп отыр. Осы жерде ескерте кетер бір дүние, тесті бір отбасыдан бір адам ғана тапсырады. Егер демалушылар тест тапсырып үлгермеген жағдайда Алакөлдің басында тест тапсыруға жағдай жасалған. Екі мобильдік пункт дайын тұр. Бұдан бөлек көлдің іргесіндегі Қабанбай ауылында туристер ауырып қалған жағдайда медициналық көмек көрсететін 12 орындық провизор ашылған. «Демалушылардың денсаулығы үшін біз күні-түні жұмыс істейміз. Егер туристердің бірінің дене қызуы көтеріліп, өзін қолайсыз сезінсе, алдымен экспресс тестілеуден өтеді. Аурудың белгісі болған жағдайда ПТР тапсырады. Провизорда 2 тыныс алу аппараты бар» дейді Қабанбай ауылдық ауруханасының аға дәрігері Гүлмира Жақиянова.
Әзірге қонақүйлер демалушылардың 50 пайызын қабылдайды
Төрткүл дүниені әлекке салған індетке байланысты биыл Алакөлдегі демалыс үйлерінің иелеріне де қатаң талаптар қойылып, үлкен жауапкершілік жүктеліп отыр. Жұқпалы дерт облыс аумағында азаймай тұрғандықтан оларға әзірге демалушылардың тек 50 пайызын қабылдауға рұқсат берілген.
Жақында Алакөлдің туристік маусымға дайындығын тексеруге Өскеменнен арнайы келген облыс әкімі Даниал Ахметов кәсіпкерлермен кездесу өткізгенде демалушылардың қауіпсіздігі бірінші орында тұруы керектігін қадап тапсырды. «Демалыс үйлеріміз ашылмай қала ма деп алаңдап отырғандарыңызды да түсінеміз. Егер 13-23 маусым аралығында көл жағалауында коронавирус инфекциясы тіркелмесе, демалыс орындарының басшыларына қонақүйлердің жобалық сыйымдылығына сәйкес 75 пайызға дейін адамдарды орналастыруға рұқсат етіледі. Одан кейінгі уақытта жағалаудағы жағдай тұрақты болса, барлық нысан 1 шілдеден бастап толық жұмысқа кіріседі. Біз өз тарапымыздан барлық жағдайды жасап отырмыз. Енді сіздер өздеріңізге жүктелген міндетті лайықты деңгейде атқаруларыңыз қажет. Ең маңыздысы, халықтың денсаулығы. Сондықтан барлық санитарлық талаптар сақталуы тиіс» дейді аймақ басшысы.
Санитарлық талаптар демекші, көл жағалауындағы демалыс үйлерінің барлығы тексеруден өткізілген. 5 маусымнан бастап арнайы үш мониторингтік топ Алакөлде жұмыс істеуде. Олар көл жағасындағы 175 қонақүйдің дайындығын, санитарлық талаптарды қаншалықты орындап жатқандығын тексеруде. «12 маусымдағы рейд қорытындысы бойынша 60 демалыс орнының ішінара дайын екеніне көз жеткіздік. Қазір осы 60 демалыс орнында санитарлық-эпидемиялық нормаларды сақтау жұмыстары жүргізілуде. 14 демалыс орнына «Туристерді қабылдауға дайын» деген акті берілді. Аталған демалыс орындарында келушілердің 50 пайызы (712 адам) орналаса алады. 101 демалыс орны дайындықты әзірше бастаған жоқ. Себебі бұл демалыс орындарының дені 2-3 жағалауларда орналасқан. Сәйкесінше, олар 20 маусымға таман ашылады» дейді облыстың бас санитар дәрігері Марат Исмаилов.
Алакөлде туристерді қабылдауға ең бірінші болып рұқсат қағазын алған «Парус» демалыс орнының иесі Жанна Рамазан барлық санитарлық-эпидемиялық талаптарды орындауға дайын екендіктерін айтады. «Ресми түрде жұмыс істеуге рұқсат алдық. Әрбір шығаберіс есікте санитайзерлер қойылып, әлеуметтік қашықтық сақталған. Қорғаныс құралдары да бар. Қазақстандықтарға айтар өтінішіміз, жедел тесттен өткеніңіз туралы анықтаманы ұмытпай ала келулеріңізді сұраймыз» дейді ол.
Иә, кәсіпкерлер жауапкершілік жүгі салмақты екендігін түсініп отыр. «Демалыс орнын ашпастан бұрын арнайы дезинфекциялық құралдар, дезинфекциялық кілемдер, қолға арналған антисептиктер, маскалар мен бас киімдер алынды. Сонымен қатар демалушылар қауіпсіздік шараларын білсін деп жадынамалар шығардық. Біздің басты міндет – адамдардың денсаулығын сақтау. Біз үшін адамдардың емін-еркін демалуы маңызды» дейді «Рассвет» демалыс орнының әкімшісі Татьяна Калугина.
Облыс әкімі кәсіпкерлермен кездесуде мониторингтік топ құрамына демалыс үйлерінің иелері де кіріп, санитарлық-эпидемиялық талаптардың сақталуын тексере алатындығын айтқан болатын. «Кездесуде аймақ басшысы мониторингтік топпен бірге жұмыс істеуді ұсынды. Қазір біз топ мүшелерімен бірге демалыс орындарының қонақтарды қарсы алуға қаншалықты дайын екенін тексеріп жатырмыз. Өйткені демалушылар мен қызметкерлердің денсаулығы біз үшін бірінші орында» дейді «Інжу» және «Алакөл Арасан» демалыс орындарының иесі Анар Батымова.
Үржар үлгілі ауданға айналады
Соңғы жылдары Алакөлдің Шығыс бөлігі айтарлықтай өзгергені белгілі. Әсіресе жағалауды абаттандыру жұмыстары қарқынды түрде жүргізілуде. «Көл жағалауын абаттандыруға 2016 жылдан бері 6,2 млрд теңге қаражат жұмсалды. Биыл бұл бағытқа тартылған инвестиция көлемі 3,9 млрд теңгені құрап отыр. Көл жағалауында 345 кәсіпкерлік нысан тіркелген. 11 мыңнан астам орынға шақталған 175 демалыс үйі, 36 қоғамдық тамақтану орны, 27 дүкен, 104 дүңгіршек, 3 дәріхана бар. Биыл 8 демалыс орны салынды. 11-і аумағын кеңейтті. Сөйтіп қосымша 650 орын пайда болды. Сонымен қатар 200 орындық «Alakol love» туристік кешенінің құрылысы басталды. Бұдан бөлек «Жұмыспен қамтудың жол картасы» бағдарламасы бойынша екі ауқымды жоба қолға алынды. Жоба аясында су және электр желілері тартылады. Биылғы жаңалық, жалпы аумағы 2,5 шақырымды құрайтын веложол мен 5 жаңа модульді сауда павильондарының құрылысы аяқталды. Жақында көл жағалауында жаңа дәретханалар, киінуге арналған кабиналар, құтқарушы бекеттері іске қосылады» дейді Үржар ауданының әкімі Нұржан Тоқсейітов.
Алакөлге инвестиция құйып, демалушыларға арналған жаңа нысандар тұрғызып жатқан кәсіпкерлер де аз емес. Солардың бірі – Арман Ахметқанов. Кәсіпкер ашық аспан астында 3,5 мың адам сиятын ALAZONE ARENA атты шағын қалашық салуды жоспарлап отыр. Юрмала қалашығының үлгісімен бой көтеретін нысанда сахна, қонақүй, қойма, ас үй, би алаңы, VIP терасса, балалар алаңы, бар, касса, автотұрақ, көрермен алаңы, караоке, жасыл газон, демалу аймағы болады. «Облыс әкімінің бастамасымен инвестор ретінде сәуір айында жұмысты бастап кеттік. Мақсатымыз – Алакөлдегі туризм деңгейін көтеру, демалушылар санын көбейту. Жоба екі жыл көлемінде жүзеге асады» дейді кәсіпкер.
Бұдан бөлек тағы бір инвестициялық жоба қолға алынбақ. Облыстық Туризм және сыртқы байланыстар басқармасы басшысының орынбасары Инара Бодукованың айтуынша, жоба аясында төрт жұлдызды қонақүй бой көтермек. Қазіргі уақытта оның құрылыс жұмыстары басталып та кеткен. Туристік нысанда демалушыларға қажетті барлық жағдай жасалады. Сондай-ақ онда бассейн мен балаларға арналған ойын алаңы салынады.
Алакөлге жасаған жұмыс сапары барысында облыс әкімі Даниал Ахметов тек көл жағалауына ғана емес, алдағы уақытта аудан орталығы – Үржар ауылына ерекше көңіл бөлінетінін жеткізді. «Үржарды қалай абаттандырамыз? Ең әуелі Үржардағы әуежайда қайта жөндеу жұмыстары жүргізіледі. Ұшу-қону жолағы ұзартылады. Бұл өз кезегінде кез келген ұшақтың мұнда ұшып келуіне мүмкіндік береді. Осы бағыттағы жұмыстар келер жылдың соңына дейін жүзеге асырылады. Ал Үржар ауылын абаттандыруға 2,2 млрд теңге бөлінеді. Үш жылдан кейін Үржар адам танымастай өзгереді» дейді аймақ басшысы.
Шығыс Қазақстан облысы,
Үржар ауданы