Биыл медицина мамандығын бітіріп, қолына дипломын алған біраз жас маманның еңбек жолы пандемияның шарықтауымен тұспа-тұс келді. Жаспын деп қысылып-қымтырылып тұрудың тіпті реті жоқ. Індет жас-кәріге қарамай баудай түсірген бетте алдыңғы шепке осы жастар шықты.
Жазда індет өршіп тұрған мезетте Денсаулық сақтау вице-министрі Ажар Ғинаят коронавирусқа қарсы 46 мың медқызметкер күресіп жатқанын, оның ішінде 9 мыңының дәрігер екенін айтқан болатын. Ведомство өкілінің айтуынша, дәл қазір елімізге 1400-дей дәрігер, 1700-дей медқызметкер керек. Сонымен қатар отандық медицина саласы инфекционист, пульмонолог, анестезиолог, реанимотолог секілді мамандар тапшылығын қатты сезініп тұр.
Медицина мамандарын даярлайтын іргелі оқу орны С.Асфендияров атындағы Қазақ ұлттық медициналық университетін 2018 жылы 1 485 түлек бітіріп шықса, 2019 жылы 1 314 түлек тәмамдаған. Ал 2020 жылы университетті бітіріп, еңбек нарығына араласқан 1 271 түлектің 815-ін оқу орны басшылығы өздері жұмысқа орналастырса, 452 студент өз бетінше жұмыс тауып алған. Осы білім ордасында оқыған Айбек Ермекбаев студент шағынан еңбекке араласқан. Содан да болар орталық қалалық клиникалық ауруханада коронавирус дертіне шалдыққан науқастарды алғашқылардың бірі болып қабылдап, олармен тікелей жұмыс істеді. Ол эпидемия абыр-сабырға берілмеуді, жылдам әрі сапалы шешім қабылдауды үйреткенін айтады.
– Өзімді қорықпаймын деп дайындап, іске кірістім. Қорықсаң, бұл салада жүрудің өзі бекер. Індет қатты өршіген кезеңде бір күн демалып, екі тәулік қатарынан жұмыс істедік. Бір сағат бойы обаға қарсы костюмді кию, шешу, алты сағат лас аймақта дәретханаға бармай, су ішпей жүру өте қиын. Бірақ соның бәріне төздік. Жедел жәрдеммен келген науқастарды қабылдап, тіркеп, барлық анализдерін қарап шығып, тиісті орынға – ПТР-тест немесе КТ-ға жіберіп отырамыз. Шұғыл операция жасалуы керек науқас түссе, онда дереу операциялық блокқа кіріп, операцияға дайындаламыз. Бұл кезең біз үшін әрі сынақ, әрі үлкен тәжірибе болып жатыр, – дейді операциялық бөлім мейіргері Айбек.
Жас маманның сөзінше, әдепкіде коронавирус жұқтырған науқастар қатты шошып, айналасына агрессиясын танытқан.
– Олар қандай көңіл күймен келсе де қабылдап, әңгімелесіп, қорқынышын басуға тырысамыз. Мұндай күйге түспес үшін мемлекет айтып жатқан нұсқауларды орындауымыз керек. Маска тағып, антисептик сеуіп жүрумен шаруа бітпейді. Ауруды жеңу үшін адам көп шоғырланған жерлерден аулақ болып, той-жиын жасауды доғару керек. Көп адам әлі құлақ аспай жатыр, – дейді жас маман.
Алматы балалар қалалық клиникалық жұқпалы аурулар ауруханасында №5 бөлім меңгерушісінің міндетін атқарып жүрген Баян Оспанбаева да 2013 жылы С.Асфендияров университетін «Жалпы медицина» мамандығы бойынша бітіріп шыққан.
– Карантин кезі қиын тиді. Отбасымыздан жырақтап, қонақүйде тұрдық. Әріптестеріміз вирус жұқтырған кезде біздің де қорқынышымыз үдеп кетті. №12 ауруханада індет жұқтырғандар күрт көбейіп кеткен соң науқастарын бізге жіберіп, бізді «Хирургиялық бөлім» етіп жасақтады. Мен педиатрияны оқыған соң хирургияның қыр-сырына толық қанық емеспін. Сондықтан қалалық жедел шұғыл көмек көрсету ауруханасынан екі хирургті жіберді. Солармен жұмыс істеп, біраз қиындықты еңсердік. Алайда кейін ол екі хирургтан вирус табылып, тағы екі аптаға карантинге жіберді. Әйтеуір тест нәтижесі «теріс» болып шығып, қайта жұмысқа кірістік. Жұмыс уақытының таңғы 8-де басталып кешкі 6-да аяқталатынына қарамастан, жиі-жиі түн жарымға дейін қалып қоямыз. Лас аймаққа кіріп, науқастарды аралаймыз. Кім шығады, кімге кислород керек, кімнің халі ауыр, кімді КТ-ға түсіру керек бәрін анықтап, тиісті ем тағайындап, шаралар қабылдадық, – дейді Баян.
Баянның жолдасы Нұржан да қалалық жедел шұғыл көмек көрсету ауруханасында дәрігер-травматолог болып жұмыс істейді. Екеуі екі бала тәрбиелеп отыр.
Абай АЙМАҒАМБЕТ,
«Egemen Qazaqstan»
АЛМАТЫ