Тұңғыш Президент күніне орай «Қазақстан Республикасының Тұңғыш Президенті: жасампаздық пен қарқынды дамудың 30 жылы» атты халықаралық дөңгелек үстел өтті. «Рухани жаңғыру» қазақстандық қоғамдық даму институтының ұйымдастыруымен өткен жиында отандық, халықаралық сарапшылар мен қоғам қайраткерлері еліміздің егемен мемлекет ретінде қалыптасуы жолындағы Елбасы Нұрсұлтан Назарбаев құрған даму стратегиясы мен маңызын жан-жақты талқылады.
Жиынға Ақпарат және қоғамдық даму министрі Аида Балаева, «Рухани жаңғыру» қазақстандық қоғамдық даму институтының басқарма төрағасы Данияр Есин, қоғам қайраткерлері Бүркіт Аяған мен Жапсарбай Қуанышев, Парламент Мәжілісінің депутаты Нұрлан Әлімжанов, Қазақстан халқы Ассамблеясы Төрағасының орынбасары Майя Бекбаева, Еуропалық құқық және адам құқықтары институтының директоры, Қазақстан Президенті жанындағы Ұлттық қоғамдық сенім кеңесінің мүшесі Марат Бәшімов және Қазақстан стратегиялық зерттеулер институты директорының орынбасары Санат Көшкімбаев қатысты.
Жиынның беташар сөзін алған министр Аида Балаева алда келе жатқан 1 желтоқсан – Қазақстан Республикасының Тұңғыш Президенті күні мерекесімен құттықтай келе, мейрамның елдігіміз бен мемлекеттігіміздің адами символы екендігін әрі тұрақтылық пен бейбітшіліктің бірегей кепіліне айналған айшықты күн екенін атап өтті.
– Өйткені тәуелсіздігіміздің негізін қалап, егемендігімізді бекіткен Нұрсұлтан Әбішұлының тарихи тұлғасы мен саяси қайраткерлігі қашанда зор құрметке ие. Расында да, «қазақ» деген ұлтты әлемге танытып, «Қазақстан» деген елді дүниенің төріне оздырған – Елбасының парасаты мен әлем сарапшылары «Назарбаев жолы» деп атап кеткен салиқалы саясаты. Содан болар, бұл мереке бір тұлғаның емес, тұтас ұлттың, тәуелсіз жұрттың ортақ қуанышы деп нық сеніммен айта аламыз. Келесі жыл – еліміз үшін тарихи жыл. Тәуелсіздігімізге – 30 жыл. Бұл мәртебелі мерейтой мемлекетіміз үшін ел Президенті Қасым-Жомарт Тоқаевтың жаңа кезеңдегі ауқымды реформалары аясында аталып өтеді. Мұның өзі – жасампаз даму жолындағы ұрпақтар сабақтастығының шынайы өнегесі мен Елбасы саясатының табысты жалғасын дәріптейтін уақыт болмақ, – деді министр Аида Балаева. Сондай-ақ Семей полигонын жабудағы және әлем елдеріне ядролық қарудан бас тартуға үлгі көрсетудегі Елбасы Нұрсұлтан Назарбаевтың рөлі жайында баяндай келе, Мемлекеттік тәуелсіздікті жария ету, бейбітшілікті ұстаным ете отырып, елді ұзақ мерзімді жетістіктерге жетелеген көшбасшы қайраткерлігін үлгі етті.
Қазақстанның көпвекторлы сыртқы саясатын дамытуда үлкен үлес қосқан және республиканың БҰҰ мен ЕҚЫҰ-ға кіру жөніндегі келіссөздерге қатысқан, тәуелсіз Қазақстанның тұңғыш Сыртқы істер министрі болып қызмет еткен Төлеутай Сүлейменов Президент Н.Назарбаевтың стратегиялық көрегендігі дамудың қазақстандық озық үлгісін айқындағанын, сондай-ақ Қазақстанның орнықты өсіп-өркендеу жолында айрықша ықпал еткенін жеткізді. Дипломатиялық қызметтегі алғашқы қадамдарын еске алған қайраткер Елбасы байыпты халықаралық бастамаларымен еліміз биік халықаралық беделге ие болып, ғаламдық ядролық қарусыздану қозғалысының көшбасшысына айналғанын тілге тиек етті.
– Нұрсұлтан Назарбаев мемлекет құру жолында үлкен жауапкершілік арқалай отырып, саяси көрегенділігімен болашақ ел үшін жаңа жетістік құра алды, бұл – оңай шаруа емес. Маңызды тарихи кезеңде еліміздің келешек бағытын айқындай алуының арқасында, Қазақстан халқы болашақтағы жетістікке негіз болатын табысқа қол жеткізді. Мен өзім туып-өскен өлкедегі ядролық жарылыстың алғашқы куәгерімін, ол кезде небәрі 12 жаста болдым. Тұңғыш Перезидент – Елбасының ядролық сынақты тоқтату жөніндегі шешімі ұмытылмас тарихымызға айналды, – деген Т.Сүлейменов ғаламдық қауіпсіздікті аймақтық қауіпсіздік мәселелерімен ұштастыра білген Нұрсұлтан Назарбаевтың парасатты реформатор ретіндегі саяси көрегендігі жайында кеңінен әңгімеледі.
Сондай-ақ дөңгелек үстелге Ресей Федерациясының Қазақстан Республикасындағы Төтенше және өкілетті елшісі Анатолий Бородавкин, Скандинавия Академиялық ұтқырлық институтының ректоры Элина Ванхемпинг, Өзбекстан ұлттық университетінің профессоры, философия ғылымдарының докторы Нигинахон Шермухамедова сынды Қазақстанда аккредитациядан өткен дипломатиялық корпустың өкілдері мен халықаралық сарапшылар да қатысып, ел тәуелсіздігін қалыптастыру жолындағы мемлекетіміз бағындырған биік белестер жайында ой қосты. Бұл ретте ҚХА кафедрасының меңгерушісі, ЕҰУ ҚХА кафедралары қауымдастығының төрағасы, саясаттану ғылымдарының докторы Наталья Калашникова Нұрсұлтан Назарбаев құрған бейбітшілік пен келісімнің қазақстандық моделі жайында сөз қозғай келе, этносаралық қатынастарды дамыту мәселелерін шешуде жоғары деңгейде ықпал еткенін айрықша атап өтті.
– Демографиялық және көші-қон процестерінің жоғары динамикасы Қазақстанның тәуелсіздік алғаннан кейін әлемдегі ең көп этностық және поликонфессиялы мемлекеттердің біріне айналуына ықпал етіп, әртүрлі этностық топтар мен конфессиялар арасындағы өзара әрекеттесу процестерін оңтайландыру бойынша Қазақстанның тәжірибесін ашық көрсете отырып, бар проблемаларды дұрыс атады. Бұл жаңа әлеуметтік-экономикалық жағдайлар, ақпараттық-коммуникациялық технологиялар тудырған әлемдік саясаттағы өзіндік дағдарыстарға дер кезінде жауап болды. Адамгершілік, сенім, рухани байланыстар, толеранттылық және бір-біріне деген құрмет қатынастары – Нұрсұлтан Назарбаев құрған қоғамдық келісім мен ұлттық бірліктің қазақстандық моделінің негізі, – деді Наталья Калашникова.