Жастарымыз жұлқынып тұр

Бес жігітіміз

жеңіс тұғырына көтерілді

Поль­шада бес жігітімізге жеңіс тұғы­рына кө­терілу бақыты бұйырмады. Тұ­саукесер кездесуінде Нұржан Аман­келді (69 кило) ресейлік Шераф Аша­лаевтан айласын асыра алмады. Ку­балық Брайан Леон Сальгадо Ерасыл Жақыпбековті (81 кило) сан соқ­тырып кетсе, Кенже Мұратұлы (52 кило) мен Аманат Сабырғали (+91 кило) екінші кезеңде сүрінді. Екеуі де Өзбекстанның өкілдеріне есе жіберді. Ширек финалда Мәди Алтынбаевтың (91 кило) асығы алшысынан түспеді. Қандасымыз үндістандық Вишал Гуптаға жол берді.

Ширек финалда 56 кило салмақта сайысқа түскен Ерболат Сабыр мен 64 кило салмақта күш сынасқан Са­быржан Аққа­лықовтың өнері көп­шілікті сүй­сіндірді. Екеуі де Куба боксшыларына қарсы жекпе-жекте өте сауатты тактика ұс­танып, күмәнсіз жеңіске жетті. Ерболат Сабыр Иван Родригес Хортадан әлдеқайда алымды көрінсе, Сабыржан Дариан Хавьер Кастроны қапы қалдырды. 75 кило сал­мақтағы Диас Молжігітовтің литвалық Александр Трофимчуктен мерейі үстем болды. 49 салмақтағы Санжар Ташкенбай өзбекстандық Ибрагим Исжоновтан айласын асырса, 60 кило салмақтағы Елнұр Сүйінбай бразилиялық Юри Дос Рейестен басым түсті. Осылайша, бес жігітіміз жартылай финалдық межеге жетті.

Жартылай финалда аса жеңіл салмақтағы Санжар Ташкенбай ал­ғаш­қы болып рингке көтерілді. Ол үндістандық Бишвамитра Чонгтамны жеңді. Командалық әріптесінің жеңісті жолын Ерболат Сабыр жалғастырды. Қандасымыз Еуропа біріншілігінің жеңім­пазы, ресейлік Алексей Шендрикке шаң қаптырып кетті. Елнұр Сүйінбай да ел сенімін ақтады. Ол колумбиялық Джон Оробионы жолынан ығыстырды. Сабыр­жан Аққалықовтың да айдарынан жел есті. Жалынды жас үндістандық Анкит Нарвалды еш қиналмай ұтты. Ал Диас Молжігітов пен ресейлік Ми­хаил Усов арасындағы жекпе-жек өте тартысты өтті. Алғашқы раундта Диас 1:4 есебімен ұтыл­ғанымен, келесі раун­да қарқынын күрт күшейтті – 5:0. Бәсекенің соңғы бөлігінде Диас алымды көрінген еді. Бірақ әділ­дікті белден басқан төрешілер Еуропа біріншілігінде күміс медальды иеленген Ресей боксшысының қолын көтерді.

Жарыстың соңғы күні ақтық ай­қастарды тамашаладық. Санжар Таш­кенбай ресейлік Роберт Бадалянмен кездесті. Біздің жігіт барлық жағынан басым болды. Еуропа чемпионы қанша жанталасқанымен, Ташкенбай оған адым аштырмай, үнемі орап отырды. Оң қолмен де, сол қолмен де сілтеген соққылары нысанаға дөп тиіп жатты. Нәти­жесінде, барлық төрешілер Санжардың мықтылығын мойындады.

Көп кешікпей Ерболат Сабыр рингке көтерілді. Ол Сачинмен сайысқа түсті. Жасыратыны жоқ, қандасымызға қарағанда Үндістанның өкілі алымды көрінді. Өзінің жылдам әрі жинақы қимылының арқасында Сачин әлем чемпионы атанды. Ерболат күміс ме­дальды қанағат тұтты. Сол секілді Елнұр Сүйінбай да екінші орында қалып қой­ды. Жапониялық Рейко Цуцумиге қарсы жекпе-жекте ол бойы мен қолының ұзындығын ұтымды пайдалана алмады. Қарсыласы өзінің сауатты тактикасы мен жанкештілігінің арқасында жеңіске жетті.

Ал 64 кило салмақта күш сынасқан Сабыржан Аққалықовтың мерейі үстем болды. Украиналық Бозорбой Матякубовпен айқасты басынан аяғына дейін бір деммен өткізген қазақ боксшысы қарсыласын әбден төмпештеді. Нәтижесінде, төрешілердің барлығы да Аққалықовты жеңіске лайық деп тапты. Сөйтіп Сабыржан да әлем чемпионы атанды.

Осылайша, Қазақстанның жас­тар қ­ұ­рамасы Польшадағы жарысты 2 алтын, 2 күміс және 1 қола медальмен қо­рытын­дылады. Осы нәтижемен жалпы­командалық есепте екінші орынды иелендік. Алдымызда – Ресей боксшылары. Олар 2 алтын, 3 күміс және 2 қоланы олжалады. Үшінші орында – Өзбекстан құрамасы. Олар 2 алтын мен 2 қоланы қоржынға салды. Сондай-ақ Украина (1 алтын+2 күміс+2 қола), Үндістан (1+0+3), Жапония (1+0+0), Куба (1+0+2), Польша(0+1+0), Армения (0+1+0) және Черногорияның (0+1+0) был­ғары қолғап шеберлері үздік ондықтың қатарына қосылды. Барлығы бұл жарыста 17 мемлекеттің өрендеріне жеңіс тұғырына көтерілу бақыты бұйырды.

Осыған дейін ұйымдастырылған жастардың әлем біріншілігінде Қазақ­станның әнұраны екі реттен артық шыр­қалған емес. Ең елеулі табысқа біз осыдан жеті жыл бұрын қол жеткізген едік. 2014 жылы Софияда өткен байрақты бәсе­кеде Шалқар Айқынбай мен Абылайхан Жүсіпов бас жүлдені олжалап, барша қазақ жанкүйерлерін қуантты. Сол жарыс­та Сұлтан Зәуірбек пен Вадим Казаков ақтық сынға дейін алқынбай жеткенімен, шешуші тұста ұтылып, күміс медальды мойындарына ілді.

Бұрымдыларымыз

бес жүлде алды

Қыздар арасындағы жарыста да барлық 10 салмақ дәрежесі бойынша бақ сынадық. Өкінішке қарай, Арайлым Марат (48 кило), Гүлнар Тұрапбай (51 кило), Айшагүл Елеу­баева (54 кило), Назерке Серік (57 кило) және Милана Аюпова (64 кило) жарысты мерзімінен бұрын аяқтады. Ал қалғандары жартылай финалға дейін жетіп, жүлделі орындар үшін таласу мүмкіндігіне ие бол­ды. Бұл межеде 60 кило салмақтағы Жұл­дыз Шаяхметова өзбекстандық Диль­фуза Бековадан басым түссе, 75 кило салмақтағы Дана Дидай сол елдің тағы бір өкілі Со­хиба Рузметовадан айласын асырды. Осы кездесулердің екеуінде де біздің қыздардың үстемдігі еш күмән туғыз­ған жоқ. Ал Жас­мин Қизатова (69 кило) польшалық Барбара Марчинковскаға, Әсел Сағатова (81 кило) ресейлік Ксения Олифиренкоға және Елдана Тәліпова (+91 кило) молдовалық Дарья Козорезге жол беріп, қола медальды қанағат тұтты.

Финалда қазақтың қос қызы Үндіс­танның өкілдерімен қолғап түйістірді. Байрақты бәсекеге үнділердің керемет даяр­лықпен келгені бірден бай­қалды. Үн­ді елінің жеті қызы ширек финалға дейін жетіп, олардың бар­лығы да өз қар­сыластарынан басым болды. Жартылай финалда да әлгі жетеу­дің жолы болды. Ақтық сайыста да үндіс­тандықтар мерейі үстем болды. Шешуші тұста Жұлдыз Шаях­метова Винкаға, ал Дана Дидай Санама Чану Токчомға қарсы шықты. Өкінішке қарай, Жұлдыз қарсыласының қарқынды шабуылына төтеп бере алмады. Нәтижесінде, Винка алтын алса, Шаяхметова күміс медальды қанағат тұтты. Көп кешікпей рингке Дана көтерілді. Бұл бәсеке шиеленіске толы болды. Екі жақ та аянып қалған жоқ. Десек те төрешілер жеңіске Токчомды лайық деп тапты.

Жалпыкомандалық есепте Үндістан құрамасы алдына жан салмады. Олар жеті алтынды олжалап, төрткүл дүние жан­күйер­лерін тамсандырды. Екінші орындағы Ресейдің қоржынында 1 алтын, 2 күміс және 1 қола медаль бар. 1 алтын, 1 күміс және 4 қоланы еншілеген Өзбекстанның өкілдері үшінші сатыға жайғасты. Төртінші және бесінші орындарда – Түркия (1+0+0) мен Польша (0+2+5). Ал Қазақстан құрамасы алтыншы сатыға табан тіреді. Польшадағы жарысты біздің қыздар 2 күміс және 3 қола медальмен қорытындылады.