Алматы қаласында бір тәулікте 3053 адам коронавирусқа қарсы вакцина салдырды, деп хабарлайды Egemen.kz.
Қалалық қоғамдық денсаулық сақтау басқармасы таратқан мәліметке сәйкес, 11 мамыр күні 3 053 алматылық вакцина салдырды. Биылғы жылдың 1 ақпаны мен 12 мамыр аралығында қалада барлығы 302 985 адамға екпе салынды. Вакцина егілгендер арасында 60 жастан асқан қарт кісілердің үлесі – 30 382.
«Жалпы дозадан қазақстандық QazVac вакцинасы 3 000 данасын құрайды, яғни, 17 күннің ішінде 2 990 адам вакцина алды. 3 мамыр күні қытайдың Sinopharm вакцинасы 15 000 дозасы жеткізілді, оның бірінші компоненті бойынша 1 514 адамға вакцина егілді», деп атап өтті басқарма өкілі.
Бүгінгі күні қалада 214 пункт жұмыс істеп тұр. 1 282 адамнан тұратын 315 егу бригадасы бар. Сонымен қатар 40 көшпелі мобильді бригада ұйымдастырылды.
«Қазіргі медициналық ұйымдарда, мектептерде, мәдениет, спорт объектілерінде, базарлар мен қаланың СОСО-да вакцинация пункті жұмыс істейді», деп нақтылады Қоғамдық денсаулық сақтау басқармасының өкілі.