Қазақстандық ауыр атлет Ерасыл Сәулебеков Мексиканың Леон қаласында өтіп жатқан ауыр атлетикадан жасөспірімдер арасындағы әлем чемпионатында топ жарды.
Жарыстың кезекті күнінде 67 килода сынға түскен жерлесіміз екі бағдарламада да үздік шығып, әлем чемпионатының алтынын жеңіп алды. Ерасыл Сәулебеков жұлқа көтеруде 123 кило зілтемірді еңсерсе, серпе көтеруде 158 килоны бағындырды. Сөйтіп, екі жаттығудың қорытындысы бойынша 281 киломен Мексикада Қазақстанның Әнұранын шырқатты. Екінші орынды жерлесімізден үш кило (278 кг) кем көтерген түркиялық Алааддин Саин иеленсе, қола жүлде польшалық Бартош Бурскикеге бұйырды. Ол қоссайыста 269 килоны (116+153) басынан асыра көтерді.
Айта кетейік, бұл – Қазақстан құрамасының жасөспірімдер арасындағы әлем чемпионатындағы алғашқы алтыны және үшінші медалі. Бұған дейін қыздар арасындағы 40 килода сынға түскен Александра Беленко мен ерлер арасындағы 55 килода Ерасыл Омаров әлем чемпионатының қола жүлдесін жеңіп алған болатын.