«Тур де Франстың» жазық жолда өткен 15-ші кезеңінің жеңімпазы спринтерлік жарыста анықталды.
Alpecin-Deceuninck велоклубының намысын қорғайтын бельгиялық спортшы Йеспер Филипсен Родез бен Каркасон қалаларын жалғаған 202,5 шақырым жолды 4 сағат 27 минут 27 секундта бағындырып, кезең жеңімпазы атанды. Екінші және үшінші орындарды тағы бір бельгиялық велошабандоз Ваут Ван Арт (Jumbo-Visma) пен даниялық Мадс Педерсен (Trek-Segafredo) иеленді. Мәреге пелотонмен бірге жеткен «Астана» капитаны Алексей Луценко 44-орынға ие болды.
Жалпы есепте даниялық Йонас Вингегор (Jumbo-Visma) бес кезеңнен бері дес бермей тұр. Одан кейінгі орындарды әдеттегідей словениялық Тадей Погачар (UAE Team Emirates) мен британиялық Герайнт Томас (INEOS Grenadiers) иеленуде. Ал Алексей Луценко 12-сатыға жайғасқан.