Өзбекстан астанасында ұйымдастырылған ауыр атлетикадан жастар және жасөспірімдер арасындағы Азия чемпионаты аяқталды. Сары құрлықтың 21 мемлекеті қатысқан жарыста жерлестеріміз 4 алтын, 4 күміс, 3 қола медаль жеңіп алды.
Атап айтар болсақ, Ташкенттегі толағайлар тартысында Едіге Емберді (73 кило), Әлішер Байбуров (67 кило), Денис Полубояринов (81 кило) және Никита Абдрахманов (102 кило) Азия чемпионы атанып, Әнұранымызды шырқатты. Ал күміс жүлдені Надежда Ли (64 кило), Аружан Дәулетова (71 кило), Алексей Чуркин (73 кило) және Айсамал Сансызбаева (87 кило) олжалады.
Ал Ерасыл Омаров (55 кило), Азамат Төлеген (61 кило) және Егор Шерер (81 кило) ел қоржынына қола жүлде салған болатын. Азия чемпионатының қорытындысы бойынша жастар арасындағы жалпыкомандалық есепте Өзбекстан құрамасы топ жарды. Қазақстан спортшылары екінші орынға ие болса, үшінші орынға Вьетнам құрамасы жайғасты. Жасөспірімдер бәсекесінде де жарыс қожайындары оза шапты.