4-7 тамыз күндері қазақтың даңқты балуаны, Мәскеу Олимпиадасының чемпионы Жақсылық Үшкемпіровтің есімі берілген Нұр-Сұлтандағы «Жекпе-жек» спорт сарайында дзюдодан ерлер және әйелдер арасында Азия чемпионаты өтеді.
Қазақстан дзюдо федерациясының мәліметі бойынша, төрт күнге жалғасатын сары құрлық додасында татами шеберлері жекелей және аралас-командалық жарыс бойынша өзара мықтыны анықтайды. Халықаралық дзюдо федерациясының (IJF) күнтізбесіне сәйкес өткізілетін жарысқа Азияның 30 елінен 400-ге жуық дзюдошы қатысады деп жоспарланған.
«Қазақстан дзюдодан әлемдік бәсекелерді өткізу бойынша мол тәжірибеге ие. Осы уақытқа дейін Халықаралық дзюдо федерациясы елімізге әлемдік лицензиялық Гран-при жарыстарынан бөлек, ересектер арасындағы әлем чемпионаты (2015, Нұр-Сұлтан) мен жасөспірімдер арасындағы әлем біріншілігін (2019, Алматы) өткізуді сеніп тапсырған. 2017 жылдан бері Азия дзюдо одағының күнтізбесіне сәйкес, жылда елімізде жасөспірімдер, жастар және ересектер арасында дәстүрлі түрде екі рет Азия кубогы бәсекесі өткізіліп келе жатыр. Енді, міне, биыл Азия чемпионатын өткізу құқығына ие болдық. Бұл – спортшыларымыз үшін ғана емес, сондай-ақ отандық дзюдо спорты жанкүйерлері үшін де тамаша жаңалық. Мұндай ірі жарыстарды елімізде өткізу арқылы спортшыларымыздың тәжірибесін шыңдап қана қоймай, әлемдік аренада спорт державасы ретінде қалыптасқан имиджімізді нығайта түсеміз. Елорда татамиіне Азия үздіктері бас қосып, жаңа есімдер шығады деп үміттенеміз. Кумирлеріне қарап бой түзеп келе жатқан жас буын үшін де бұл қуанышты жаңалық әрі керемет мүмкіндік деп ойлаймын», дейді Қазақстан дзюдо федерациясы президентінің міндетін атқарушы Асхат Жіткеев.
Ұлттық құрама бапкерлерінің шешімімен елімізде өтетін сары құрлық бәсекесінде Қазақстанның ерлер және әйелдер құрамасы сапынан негізгі және қосалқы құрам спортшылары қатысады. Ұлттық құрама сапындағы дзюдошылар үшін құрлықтық бәсеке жылдың басты додасы – 6-13 қазан аралығында Өзбекстан астанасы – Ташкентте ұйымдастырылатын әлем чемпионатына дайындық жұмысы болса, құрама қатарына енді ғана қосылған жас дзюдошылар үшін елордадағы Азия чемпионаты сияқты ірі жарыстың атмосферасын сезініп, тәжірибе жинауға мүмкіндік бермек.
Айта кетерлігі, IJF ережесі бойынша, Азия чемпионатының жеңімпаздары мен жүлдегерлеріне Олимпиадалық рейтингте ұпай сандары қосылады. Атап айтқанда, жеңімпаз спортшы 700 ұпай еншілесе, 2-орын иегеріне – 490, ал 3-орын алған спортшыға 350 ұпай беріледі.