Бүгін Нидерланд пен Польшада волейболдан әйелдер арасында әлем чемпионаты басталды. Төрт жылда бір рет ұйымдастырылатын байрақты бәсекеде Қазақстан құрамасы да бақ сынайды.
Жерлестеріміз әлем чемпионатында Токио Олимпиадасының жеңімпазы АҚШ пен 2018 жылғы әлем чемпионы Сербия, сондай-ақ Германия, Болгария және Канада құрамаларымен бірге «С» тобында сынға түседі. Қазақстандық қыздар жаһандық додаға 2006 жылдан бері тұрақты түрде қатысып келеді. Әзірге ең үздік нәтижесі – 15-орын (2014 жыл).
Дарко Добресков жаттықтыратын Қазақстанның қыздар құрамасы алғашқы ойынын ертең АҚШ волейболшыларымен өткізеді. Екінші турда Германиямен (26 қыркүйек), үшінші турда Канадамен (29 қыркүйек), төртінші турда Сербиямен (30 қыркүйек) кездессе, соңғы турда Болгария құрамасымен (1 қазан) шеберлік байқасады. Матчтар Нидерландтың Арнхем қаласындағы «Гельредом» стадионында өтеді.